[1] Ke-sṳ̀, Yâ-lò-pô-ôn ke lai-é Â-pí-ngâ pot-phiang.
[2] Yâ-lò-pô-ôn tui kiâ pû-ngiòng kóng: “Ngì kói-chông yit-ha, pûn phe̍t-ngìn ngin m̀-chhut ngì he Yâ-lò-pô-ôn ke pû-ngiòng, yèn-heu to Sṳ-lò hi. Siên-tî Â-hî-ngâ he̍t chhai ke-vi; kì sṳt kóng ngài voi cho Yî-set-lie̍t-ngìn ke vòng.
[3] Ngì oi tai-pûn kì sṳ̍p-te piáng, yit-si̍t-é pho̍k-piáng, lâu yit-kon phûng-thòng. Kì voi lâu ngì kóng, ngài-têu ke lai-é voi ngióng-pân.”
[4] Só-yî, Yâ-lò-pô-ôn ke pû-ngiòng to Sṳ-lò, Â-hî-ngâ ke vuk-hâ hi. Â-hî-ngâ yí-kîn ngièn-ló, muk-chû khon m̀-tó.
[5] Song-chú siên lâu kì kóng, Yâ-lò-pô-ôn ke pû-ngiòng voi yîn-vi lai-é pot-phiang lòi khiù-mun kì; Song-chú ya chṳ́-sṳ kì yin-kôi kóng ke fa. Yâ-lò-pô-ôn ke pû-ngiòng to ke sṳ̀, kì kói-chông pien chhiong nang-ngoi yit-ke ngìn.
[6] Chúng-he Â-hî-ngâ thâng-tó kì ke kiok-phu sâng to mùn-héu, chhiu kóng: “Yâ-lò-pô-ôn ke pû-ngiòng, lo̍k-lòi â! Ngì cho-má-ke oi kói-chông cho nang-ngoi yit-ke ngìn nè? Ngài fung-min chiông fái sêu-sit lâu ngì kóng.
[7] Hi lâu Yâ-lò-pô-ôn kóng, Song-chú — Yî-set-lie̍t ke Song-ti án-ngiòng kóng: ‘Ngài tui ngìn-mìn chûng kién-sién ngì, sat-li̍p ngì cho Ngài Yî-set-lie̍t chṳ́-mìn ke thúng-chhṳ-chá.
[8] Ngài tui Thai-ví ke heu-thoi chiông koet-khièn chhióng ko-lòi su-pûn ngì; chúng-he ngì mò chhiong Ngài phu̍k-ngìn Thai-ví án-ngiòng yit-sîm yit-yi tui Ngài chûng-sîm, thâng-chhiùng Ngài ke min-lin, tân-chhiang cho Ngài khon-cho chho̍k ke sṳ.
[9] Ngì pí ngì yî-chhièn ke thúng-chhṳ-chá fam hàn-kha thai ke chhui. Ngì vì-poi Ngài, vi chhṳ-kâ sat-li̍p phe̍t ke sṳ̀n, yu chu-chho ngiéu-siong lòi-pai, ngiâ Ngài fat-khién.
[10] Só-yî, Yâ-lò-pô-ôn â, Ngài oi kong châi-fo pûn ngì ke kâ-chhu̍k; Ngài oi chiông só-yû su̍k ngì ke nàm-ngìn, mò-lun chhṳ-yù-sṳ̂n ke ya-he mò chhṳ-yù-sṳ̂n ke, chhiòn-phu tui Yî-set-lie̍t chûng chhṳ̀ chhiang-chhiang. Ngài oi chhù-me̍t ngì ke kâ-chhu̍k, chhiu-chhiong ngìn chiông lá-sap so-thet yit-yong.
[11] Ngì vuk-hâ só-yû ke ngìn, sí chhai sàng-tú ke yit-thin voi pûn kiéu-è sṳ̍t-thet, sí chhai sân-yâ ke yit-thin voi pûn tiâu-é sṳ̍t-thet. Ngài he Song-chú; liá he Ngài só-kóng ke.’ ”
[12] Â-hî-ngâ ki-siu̍k tui Yâ-lò-pô-ôn ke pû-ngiòng kóng: “Ngì hó chón vuk-hâ hi lé! Ngì yit ngi̍p-sàng, ngì ke lai-é chhiu voi sí-thet.
[13] Yî-set-lie̍t chhiòn-koet ke ngìn-mìn voi vi kì sông-sîm liù muk-chṳp, chiông kì mài-chong. Kì he Yâ-lò-pô-ôn kâ-chhu̍k tông-chûng vì-yit yû-ngìn mài-chong ke, yîn-vi chṳ́-yû kì he Song-chú — Yî-set-lie̍t ke Song-ti só fôn-hí ke.
[14] Song-chú oi sat-li̍p yit-ke vòng thúng-chhṳ Yî-set-lie̍t; liá-vòng voi kiet-suk Yâ-lò-pô-ôn ke vòng-chhèu, khì-sṳ̍t liá-ha chhiu-he ke sṳ̀-chiet lé!
[15] Song-chú oi chit-fa̍t Yî-set-lie̍t, yèu-thung kì, chhiong se hò-pa tú ke lù-chuk yèu-lòi yèu-hi. Kì oi chiông Yî-set-lie̍t ngìn-mìn tui Kì su-pûn kì-têu chú-siên liá-te tông-hó ke thú-thi song pâng hí-lòi, chiông kì-têu fûn-san to Yu-fat-lâ-tí-hò ke-phién hi, yîn-vi kì-têu chṳ-chho Â-sa-lâ ńg-sṳ̀n ke siong, ngiâ Song-chú fat-khién.
[16] Song-chú oi fit-thet Yî-set-lie̍t; yîn-vi Yâ-lò-pô-ôn fam-chhui, ya sṳ́ Yî-set-lie̍t ngìn-mìn ham chhai chhui-ok tông-chûng.”
[17] Yâ-lò-pô-ôn ke pû-ngiòng chón-to Tet-sat, yit ngi̍p kâ-mùn, se-ngìn-è chhiu sí-thet.
[18] Yî-set-lie̍t ngìn-mìn vi liá se-ngìn-è sông-sîm liù muk-chṳp, chiông kì mài-chong, chhiu-chhiong Song-chú thûng-ko Kì ke phu̍k-ngìn siên-tî Â-hî-ngâ só-kóng ke.
[19] Yâ-lò-pô-ôn khì-thâ ke sṳ, kì ngióng-pân siông-chhṳ̀ lâu thúng-chhṳ, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[20] Yâ-lò-pô-ôn cho vòng ngi-sṳ̍p-ngi ngièn, yèn-heu sí-thet. Kì ke lai-é Nâ-tap sṳ̀n-chiap kì cho vòng.
[21] Só-lò-mùn ke lai-é Lò-pô-ôn cho Yù-thai-vòng ke sṳ̀, he si-sṳ̍p yit-se. Kì chhai Yâ-lu-sat-lâng thúng-chhṳ sṳ̍p-chhit ngièn; liá-sàng he Song-chú tui Yî-set-lie̍t tak kî-chhu̍k tông-chûng sién chhut-lòi cho kin-pai Kì ke thi-fông. Lò-pô-ôn ke â-mê miàng ôn-to Nâ-mâ, he Â-mùn-ngìn.
[22] Yù-thai ke ngìn-mìn hàng Song-chú khon-cho sià-ok ke sṳ, pí kì-têu ke chú-siên só-cho ke hàn-kha ngiâ Kì fat-khién.
[23] Kì-têu chhai tak-chho sân-kông táng lâu tak-thèu thai-su hâ vi ká-sṳ̀n hí sṳ̀n-meu, yu tun sa̍k-chhû lâu Â-sa-lâ ńg-sṳ̀n siong lòi-pai.
[24] Chui khó-vu ke he chhai koet-nui ke sṳ̀n-meu yû nàm-chhông. Yù-thai ngìn-mìn cho liá yit-chhiet khó-vu ke sṳ, chhiu-chhiong Yî-set-lie̍t-ngìn ngi̍p-hi liá-thi yî-chhièn ke-têu pûn Song-chú kiuk-chéu ke ngoi-chhu̍k ngìn só-cho ke.
[25] Lò-pô-ôn chhai-vi ke thi-ńg ngièn, Âi-khi̍p-vòng Sṳ-sat lòi kûng-tá Yâ-lu-sat-lâng.
[26] Kì chiông Song-chú ke sṳn-thien lâu vòng-kiûng só-yû ke pó-vu̍t chhiòn-phu chhióng-chéu, pâu-hàm Só-lò-mùn chṳ-chho ke kîm tún-phài.
[27] Lò-pô-ôn-vòng vi-tó pú liá-têu kîm tún-phài, chhiu chho thùng tún-phài, chiông kì-têu kâu-pûn khon-sú vòng-kiûng thai-mùn ke sú-ví-chóng kón-lî.
[28] Vòng tak-pái to sṳn-thien hi ke sṳ̀, sú-ví chhiu nâ-tén liá-têu tún-phài, sṳ-heu yu piong-chón sú-ví-sṳt.
[29] Lò-pô-ôn khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[30] Liá-chham khì-kiên, Lò-pô-ôn lâu Yâ-lò-pô-ôn sòng-sòng chan-chên.
[31] Lò-pô-ôn sí-thet, chong chhai Thai-ví-sàng ke vòng-sṳt fùn-mu tú. Kiâ-mê ôn-to Nâ-mâ, he Â-mùn-ngìn; kiâ lai-é Â-pí-ngâ sṳ̀n-chiap kì cho vòng.