[1] Thai-ví lìm-chûng ke sṳ̀, fûn-fu kì ke lai-é Só-lò-mùn kóng:
[2] “Ngài lì-khôi sṳ-kiên ke sṳ̀ to lé. Ngì oi kiên-khiòng, oi cho thai-chhong-fû.
[3] Ngì oi chûn-sú Song-chú — ngì Song-ti ke min-lin, sṳ̍t-hàng Kì ke tho, sun-chhiùng Kì só-yû ke fap-li̍t kie-min, chhiu-he ke-têu ki chhai Mô-sî Fap-li̍t-sû ke min-lin. Án-ngiòng, mò-lun ngì to nai-vi, ngì só-cho ke tak-khien sṳ chhiòn-phu voi tông sun-li.
[4] Na-he ngì sun-fu̍k Song-chú, Kì yit-thin voi sú Kì ke yin-hí, chhiu-he kóng: Ngài ke heu-thoi na-he kiún-sú Kì ke min-lin, yit-sîm yit-yi tui Kì chûng-sîm, kì-têu chhiu cho-tet yún-yén thúng-chhṳ Yî-set-lie̍t.
[5] “Hàn-yû yit-khien sṳ, ngì tî Sé-lu-ngâ ke lai-é Yok-ap tet-chhui ngài, chhṳ̀-thet Yî-set-lie̍t kiûn-chhui ke lióng-ke ngièn-soi, Nì-ngí ke lai-é Ap-nì-ngí, lâu Yit-thiap ke lai-é Â-mâ-sat. Ngì oi ki-tet, kì chhai thai-phìn ke ngit-è chhṳ̀-thet kì-têu, chhiong chhai chan-chên chûng chhṳ̀ ngìn khiung-yong. Yîn-vi kì chhṳ̀-thet vù-kû ke ngìn, ngài sa vi kì só-cho ke sṳ lòi khâi chit-ngim, vi liá-sṳ ke heu-kó su-khú.
[6] Só-yî ngì oi yung ngì ke chṳ-fi lòi chhú-lî, m̀-hó pûn kì án hó-sí.
[7] “Ngì oi hó-hó lòi khoán-thai Kî-lie̍t-ngìn Pâ-sî-lòi ke lai-é, cheu-ku kì-têu; yîn-vi ngài thò-sám ngiâ-kô Ap-sâ-liùng ke sṳ̀, kì-têu hó khoán-thai ngài.
[8] “Hàn-yû, Pâ-fu-lìm ke Phien-ngâ-mén-ngìn, Kî-lâ ke lai-é Sṳ-mî; chhai ngài oi hi Mâ-ha̍p-ngiam ke-ngit, kì yung tông-thu̍k ke fa lòi chu-ma ngài. M̀-ko, heu-lòi kì to Yok-tan-hò ngiàng-chiap ngài ke sṳ̀, ngài chṳ́-tén Song-chú ke miàng fat-sṳ m̀ chhṳ̀ kì.
[9] Chúng-he ngì cho-m̀-tet son kì mò-chhui. Ngì he chhûng-mìn ngìn, ngì tî yin-kôi ngióng-pân cho; yit-thin oi sióng phan-fap chiông kì chhṳ̀-sí.”
[10] Thai-ví ko-sṳ̂n yî-heu, chong chhai Thai-ví-sàng.
[11] Kì cho Yî-set-lie̍t-vòng si-sṳ̍p ngièn: Chhai Hî-pak-lùn thúng-chhṳ chhit-ngièn, chhai Yâ-lu-sat-lâng thúng-chhṳ sâm-sṳ̍p sâm-ngièn.
[12] Só-lò-mùn sṳ̀n-chiap kiâ-pâ Thai-ví cho vòng; kì ke koet fî-sòng kiên-ku.
[13] Heu-lòi, Ha̍p-khi̍p ke lai-é Â-tô-nì-ngâ hi kien Só-lò-mùn ke â-mê Pha̍t-sṳ-pâ. Pha̍t-sṳ-pâ mun kì: “Ngì he vi-tó fò-phìn lòi ke mò?” Kì kóng: “He vi-tó fò-phìn.”
[14] Yèn-heu yu kóng: “Ngài yû fa oi lâu ngì kóng.” Pha̍t-sṳ-pâ kóng: “Ngì kóng.”
[15] Â-tô-nì-ngâ kóng: “Ngì tî ngài pún-lòi yin-kôi cho vòng; Yî-set-lie̍t-ngìn chhiòn-phu ya hî-mong ngài cho vòng. Chúng-he sṳ-chhìn ke kîn-ko pin m̀-he án-ngiòng; ngài ke ló-thâi fán-chón cho vòng, yîn-vi liá he Song-chú ke chṳ́-yi.
[16] Liá-ha ngài yû yit-khien sṳ oi pai-thok ngì; khiù ngì m̀-hó khî-chhie̍t.” Pha̍t-sṳ-pâ kóng: “Ngì kóng khon-é.”
[17] Â-tô-nì-ngâ kóng: “Pai-thok ngì thoi ngài yêu-khiù Só-lò-mùn-vòng chiông ke Sû-ngiam ke se-moi-é Ngâ-pí-sâ pûn ngài cho pû-ngiòng; ngài tî kì m̀-voi khî-chhie̍t ngì.”
[18] Pha̍t-sṳ-pâ kóng: “Hó, ngài thoi ngì hi hiong vòng yêu-khiù.”
[19] Só-yî Pha̍t-sṳ-pâ hi kien Só-lò-mùn-vòng, vi Â-tô-nì-ngâ hiong vòng kóng-chhìn. Vòng khî hí-lòi ngiàng-chiap kiâ-mê, hiong kì hàng-lî, yèn-heu chhô chhai pó-chho, yu ham-ngìn nang-ngoi piong yit-chak chho-vi chhai kì yu-phién, pûn kiâ-mê chhô.
[20] Pha̍t-sṳ-pâ kóng: “Ngài yû yit-khien se sṳ-chhìn yêu-khiù ngì, chhiáng m̀-hó khî-chhie̍t.” Vòng mun kóng: “Â-mê, he má-ke sṳ? Ngài m̀-voi khî-chhie̍t ngì.”
[21] Pha̍t-sṳ-pâ kóng: “Chhiáng ngì chiông Sû-ngiam ke se-moi-é Ngâ-pí-sâ pûn ngiâ-kô Â-tô-nì-ngâ cho pû-ngiòng.”
[22] Só-lò-mùn-vòng en kiâ-mê kóng: “Ngì cho-má-ke oi ngài chiông Sû-ngiam ke se-moi-é Ngâ-pí-sâ pûn Â-tô-nì-ngâ nè? Ngì ngióng m̀ ham ngài chiông vòng-vi ya ngiong-pûn kì! Ngì tî kì he ngài ke â-kô, hàn-yû chi-sṳ̂ Â-pí-â-thâ lâu Sé-lu-ngâ ke lai-é Yok-ap yúng-fu kì!”
[23] Só-yî Só-lò-mùn-vòng chṳ́-tén Song-chú ke miàng fat-sṳ: “Â-tô-nì-ngâ kám án-ngiòng yêu-khiù, ngài na mò sû kì ke miang, ngien Song-ti thai-thai chit-fa̍t ngài!
[24] Song-chú yí-kîn sién ngài, sṳ́ ngài vún-vún chhô chhai ngâ-pâ Thai-ví ke vòng-vi, yu yin-hí chiông liá koet pûn ngài lâu ngài ke heu-thoi. Ngài hiong yún-sên Song-chú fat-sṳ, Â-tô-nì-ngâ kîm-pû-ngit mò sí cho-m̀-tet!”
[25] Só-yî, Só-lò-mùn-vòng ha min-lin pûn Yâ-hò-yâ-thai ke lai-é Pí-nâ-ngâ; Pí-nâ-ngâ chhiu hi chiông Â-tô-nì-ngâ chhṳ̀-thet.
[26] Só-lò-mùn-vòng tui chi-sṳ̂ Â-pí-â-thâ kóng: “Ngì chón chhṳ-kâ ke kâ-hiông Â-nâ-thut hi! Ngì pún-lòi he kôi-sí ke, chúng-he ngài liá-ha m̀ chhṳ̀ ngì; yîn-vi ngì chhai ngâ-pâ Thai-ví ke sṳ̀-thoi kông-ko Song-chú ke yok-khui, ya sṳt lâu ngâ-pâ khiung-ha sṳ̀n-su chhin-tô khú-nan.”
[27] Só-lò-mùn chhiu kié-chhù Â-pí-â-thâ ke chṳt-vi, m̀ chún kì cho Song-chú ke chi-sṳ̂. Án-ngiòng chhiu sṳ̍t-hien Song-chú chhai Sṳ-lò só-kóng yû-koân chi-sṳ̂ Yî-li lâu kì heu-thoi ke fa.
[28] Yok-ap thâng-tó só fat-sên ke sṳ chhiu thò-to piong yok-khui ke sṳn-chong-phùng tú, châ-tén chi-thàn ke kok. (Sûi-yèn kì mò yúng-fu Ap-sâ-liùng, chúng-he yúng-fu Â-tô-nì-ngâ.)
[29] Só-lò-mùn-vòng thâng-tó liá-ke sêu-sit, kóng Yok-ap yí-kîn thò-to piong yok-khui ke sṳn-chong-phùng tú, khong chhai chi-thàn sùn-thèu, Só-lò-mùn chhiu phai ngìn hi mun Yok-ap cho-má-ke oi thò-to chi-thàn ke-vi. Yok-ap kóng kì thò-to Song-chú ke-vi he yîn-vi kiâng Só-lò-mùn. Só-yî, Só-lò-mùn-vòng chhiu phai Yâ-hò-yâ-thai ke lai-é Pí-nâ-ngâ hi chhṳ̀ Yok-ap.
[30] Pí-nâ-ngâ to piong yok-khui ke sṳn-chong-phùng ke-vi, tui Yok-ap kóng: “Vòng min-lin ngì chhut-lòi!” Yok-ap kóng: “Mò-oi! Ngài oi sí chhai liá-vi.” Pí-nâ-ngâ chón-to vòng ke-vi, hiong vòng po-ko Yok-ap só-kóng ke fa.
[31] Vòng kóng: “Cheu kì chhṳ-kâ ke fa chhṳ̀-sí kì, yèn-heu chiông kì mài-chong. Ngài lâu ngâ-pâ Thai-ví só-yû ke heu-thoi m̀-sṳ́ vi Yok-ap chhṳ̀ vù-kû ngìn ke chhui lòi fu-chit.
[32] Song-chú oi Yok-ap chhṳ-kâ pà chhṳ̀-ngìn ke chhui, yîn-vi kì màn-tén ngâ-pâ Thai-ví hi chhṳ̀-ngìn. Yok-ap chhṳ̀-thet lióng-ke pí kì kha-hó yu kha chṳn-chhṳ̍t ke ngìn, chhiu-he Yî-set-lie̍t kiûn-chhui ke ngièn-soi Nì-ngí ke lai-é Ap-nì-ngí lâu Yù-thai kiûn-chhui ke ngièn-soi Yit-thiap ke lai-é Â-mâ-sat.
[33] Yok-ap chhṳ̀-ngìn ke chhui oi yún-yén kûi kì lâu kì ke heu-thoi; chúng-he Song-chú oi sṳ́ Thai-ví ke heu-thoi sṳ̀n-chiap kì ke vòng-vi, tet-tó phìn-ôn chhṳ̍t-to yún-yén.”
[34] Só-yî, Yâ-hò-yâ-thai ke lai-é Pí-nâ-ngâ to piong yok-khui ke sṳn-chong-phùng ke-vi, chiông Yok-ap chhṳ̀-thet, chong chhai khóng-yâ Yok-ap chhṳ-kâ vuk-hâ ke fùn-mu.
[35] Vòng phai Yâ-hò-yâ-thai ke lai-é Pí-nâ-ngâ thoi Yok-ap cho chhiòn-kiûn ke ngièn-soi, yu yin-min chi-sṳ̂ Sat-tuk thoi Â-pí-â-thâ ke chṳt-vi.
[36] Vòng phai-ngìn ham Sṳ-mî lòi, tui kì kóng: “Ngì lòi, chhai Yâ-lu-sat-lâng vi chhṳ-kâ hí-vuk, oi he̍t chhai liá-vi, m̀ chún lì-khôi liá-sàng.
[37] Na-he ngì lì-khôi, chhêu-ko Khi̍p-lùn-hâi, ke-ngit ngì chhiu yit-thin voi sí; liù ngiâ hiet ke chhui kûi chhai ngì chhṳ-kâ.”
[38] Sṳ-mî en kóng: “Ngâ chú ngâ vòng, ngì kóng ke he chhin kûng-tong, phu̍k-ngìn voi cheu ngì ke fa hi-cho.” Só-yî Sṳ-mî chhai Yâ-lu-sat-lâng he̍t tông-kiú.
[39] Chúng-he sâm-ngièn heu, Sṳ-mî ke lióng-ke nù-chhòi thò-to Kâ-thi̍t-vòng Mâ-kâ ke lai-é Â-kit ke-vi. Sṳ-mî thâng-kóng kì-têu chhai Kâ-thi̍t,
[40] chhiu yi-phi lì-è, to Kâ-thi̍t-vòng Â-kit ke-vi chhìm kì ke nù-chhòi, chhìm-tó chhiu tai kì-têu chón-lòi.
[41] Só-lò-mùn-vòng thâng-tó Sṳ-mî lì-khôi Yâ-lu-sat-lâng, hi Kâ-thi̍t, yu chón-lòi ke sṳ,
[42] chhiu phai-ngìn ham kì lòi, tui kì kóng: “Ngài sṳt ham ngì chṳ́-tén Song-chú ke miàng fat-sṳ, chhie̍t-tui m̀ lì-khôi Yâ-lu-sat-lâng, yu kín-ko ngì kóng, ngì lì-khôi ke-ngit chhiu-he ngì sí ke ngit-è; ngì m̀-he tap-yin oi thâng-chhiùng ngài mâ?
[43] Ngì cho-má-ke vì-poi chhṳ-kâ só fat ke sṳ lâu ngài ke min-lin?
[44] Ngì sîm-tú ya tông chhîn-chhú ngì thèu-pái tui ngâ-pâ Thai-ví só cho ke fái-sṳ. Song-chú oi yîn-vi liá fái-sṳ chit-fa̍t ngì;
[45] chúng-he Song-chú oi su-fuk pûn ngài, sṳ́ Thai-ví ke vòng-vi yún-yén kiên-ku.”
[46] Só-yî, vòng ha min-lin pûn Yâ-hò-yâ-thai ke lai-é Pí-nâ-ngâ, kì chhiu hi chiông Sṳ-mî chhṳ̀-thet. Án-ngiòng, Só-lò-mùn chhiu vàn-chhiòn kiên-ku kì ke vòng-koet.