[1] Yî-set-lie̍t-vòng Yâ-lò-pô-ôn chhai-vi ke thi sṳ̍p-pat ngièn, Â-pí-ngâ cho Yù-thai-vòng.
[2] Kì chhai Yâ-lu-sat-lâng thúng-chhṳ sâm-ngièn. Kiâ-mê ôn-to Mâ-kâ, he Ap-sâ-liùng ke moi-é.
[3] Kì fam-tó lâu kiâ-pâ khiung-yong ke chhui, mò chhiong kiâ-thai Thai-ví án-ngiòng yit-sîm yit-yi chhai Song-chú — kì ke Song-ti mien-chhièn chûng-sîm.
[4] Chúng-he vi-tó Thai-ví ke yèn-ku, Song-chú — kì ke Song-ti pûn Â-pí-ngâ yit-ke lai-é, lòi sṳ̀n-chiap kì cho vòng, sṳ́ Thai-ví ke vòng-chhèu chhai Yâ-lu-sat-lâng m̀-voi thôn-thet, yu kiên-ku Yâ-lu-sat-lâng ke ôn-chhiòn.
[5] Song-chú án-ngiòng cho he yîn-vi Thai-ví hàng Song-chú khon-cho chho̍k ke sṳ; chhù-liáu Het-ngìn Vû-li-â ke-khien sṳ, Thai-ví yit-sên-ngìn m̀-sṳt vì-poi Song-chú ke min-lin.
[6] Â-pí-ngâ hàn-sâng ke sṳ̀, Lò-pô-ôn lâu Yâ-lò-pô-ôn sòng-sòng chan-chên.
[7] Â-pí-ngâ khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi. Â-pí-ngâ lâu Yâ-lò-pô-ôn sòng-sòng chan-chên.
[8] Â-pí-ngâ sí-thet, chong chhai Thai-ví-sàng. Kì ke lai-é Â-sat sṳ̀n-chiap kì cho vòng.
[9] Yî-set-lie̍t-vòng Yâ-lò-pô-ôn chhai-vi ke thi ngi-sṳ̍p ngièn, Â-sat cho Yù-thai-vòng.
[10] Kì chhai Yâ-lu-sat-lâng thúng-chhṳ si-sṳ̍p yit-ngièn. Kiâ-phò ôn-to Mâ-kâ, he Ap-sâ-liùng ke moi-é.
[11] Â-sat chhiong kiâ chú-siên Thai-ví án-ngiòng hàng Song-chú khon-cho chho̍k ke sṳ.
[12] Kì chiông só-yû chhai sṳ̀n-meu tú ke nàm-chhông chhiòn-phu kiuk chhut-hi koet-ngoi, yu chiông kiâ chú-siên só chho ke ngiéu-siong chhiòn-phu chhù-thet.
[13] Kì fi-thet kiâ-phò Mâ-kâ thai-heu ke miàng-fun, yîn-vi thai-heu vi Â-sa-lâ ńg-sṳ̀n chho sià-yìm ke chhû-siong. Â-sat chiông ńg-sṳ̀n siong chám-thôn, chhai Khi̍p-lùn hâi-sùn sêu-thet.
[14] Sûi-yèn Â-sat mò chiông só-yû chhai sân-kông táng ke sṳ̀n-meu fi-thet, chúng-he kì yit-sên-ngìn yit-sîm yit-yi chhai Song-chú mien-chhièn chûng-sîm.
[15] Kì chiông kiâ-pâ lâu chhṳ-kâ fung-hien pûn Song-chú ke tûng-sî, chhiu-he kîm-ngiùn lâu yung-phín, chhiòn-phu piong chhai sṳn-thien tú.
[16] Yù-thai-vòng Â-sat lâu Yî-set-lie̍t-vòng Pâ-sâ chhai-vi ke khì-kiên, sòng-sòng chan-chên.
[17] Pâ-sâ oi kûng-tá Yù-thai, chhiu siû-kien Lâ-mâ cho fòng-ví-sàng, muk-tit he oi chhiet-thôn chhut-ngi̍p Yù-thai só-yû ke kâu-thûng.
[18] Só-yî Â-sat chiông sṳn-thien lâu vòng-kiûng pó-khu hàn-chhûn ke kîm-é lâu ngiùn-è chhiòn-phu nâ-chéu, kâu-pûn kì ke thai-sṳ̀n, tai-hi Thai-mâ-sṳ-kiet, to Thâ-pak-li-mùn ke lai-é, Hî-sùn ke sûn-é Si-li-â-vòng Phien-Ha̍p-tha̍t ke-vi. Â-sat ke thai-sṳ̀n tai kì ke fa hi, kóng:
[19] “Ngiâ-pâ lâu ngâ-pâ yî-chhièn he thùng-mèn, ngài-têu ya lòi li̍p-yok cho thùng-mèn. Liá-têu kîm-é lâu ngiùn-è he sung-pûn ngì ke lî-vu̍t. Chhiáng chiông ngì lâu Yî-set-lie̍t-vòng Pâ-sâ ke mèn-yok fi-thet, kì chang voi tui ngài ke thú-thi chiông kiûn-chhui chha̍t-chéu.”
[20] Phien-Ha̍p-tha̍t thùng-yi Â-sat-vòng ke kien-ngi, chhiu phai kì ke ngièn-soi hi kûng-tá Yî-set-lie̍t ke sàng-sṳ. Kì-têu cham-liâng Yî-yùn, Tan, Â-pak-Pak-Mâ-kâ, Kâ-li-li-fù fu-khiun ke thi-khî, lâu Nâ-fut-thâ-li chhiòn-thi.
[21] Pâ-sâ thâng-tó só fat-sên ke sṳ, chhiu ngiàm-sṳ̀ thìn-chṳ́ siû-kien Lâ-mâ ke kûng-chhàng, thui-chón Tet-sat hi.
[22] Só-yî, Â-sat-vòng hiong chhiòn Yù-thai fat-chhut min-lin, kûi-thin tak-sà chhiòn-phu oi lòi hia̍p-chhu chiông Pâ-sâ yung-lòi siû-kien Lâ-mâ ke sa̍k-thèu lâu su-liau yun-chéu, m̀-chún yû-ngìn thôi-chhṳ̀. Â-sat-vòng yung liá-têu chhòi-liau chhai Mí-sṳ̂-pâ lâu Phien-ngâ-mén ke Kâ-pâ hí fòng-ví-sàng.
[23] Â-sat khì-thâ ke sṳ, kì ke yúng-kám lâu kien-sat sàng-sṳ ke kûng-lò, chhiòn-phu ki chhai Yù-thai Lie̍t-vòng Sṳ́ tî-poi. Kì ngièn-ló ke sṳ̀, yîn-vi kiok pot-phiang pien-cho pâi-kiok.
[24] Â-sat sí-heu, chong chhai Thai-ví-sàng ke vòng-sṳt fùn-mu tú. Kì ke lai-é Yok-sâ-fap sṳ̀n-chiap kì cho vòng.
[25] Yù-thai-vòng Â-sat chhai-vi ke thi-ngi ngièn, Yâ-lò-pô-ôn ke lai-é Nâ-tap cho Yî-set-lie̍t-vòng. Kì thúng-chhṳ Yî-set-lie̍t lióng-ngièn.
[26] Kì chhiong kiâ-pâ khiung-yong fam-chhui, hàng Song-chú khon-cho sià-ok ke sṳ, hoi Yî-set-lie̍t-ngìn ham chhai chhui-ok tông-chûng.
[27] Yî-sat-kâ chhu̍k-ngìn Â-hî-ngâ ke lai-é Pâ-sâ chho-fán Nâ-tap, chhai Nâ-tap lâu kì ke kiûn-chhui vì-khun Fî-li-sṳ ke Kî-pí-tun-sàng ke sṳ̀, Pâ-sâ chiông kì chhṳ̀-thet.
[28] Liá-sṳ fat-sên chhai Yù-thai-vòng Â-sat chhai-vi ke thi-sâm ngièn. Pâ-sâ sṳ̀n-chiap Nâ-tap cho Yî-set-lie̍t-vòng;
[29] kì yit cho vòng chhiu chiông Yâ-lò-pô-ôn kâ-chhu̍k ke ngìn chhṳ̀ chhiang-chhiang. Cheu Song-chú thûng-ko Kì phu̍k-ngìn Sṳ-lò-ngìn Â-hî-ngâ siên-tî só-kóng ke, Yâ-lò-pô-ôn kâ-chhu̍k ke ngìn chhiòn-phu pûn-ngìn chhṳ̀-sí, mò liù yit-ke.
[30] Liá he yîn-vi Yâ-lò-pô-ôn chhṳ-kâ fam-chhui, yu hoi Yî-set-lie̍t-ngìn ham chhai chhui-ok tông-chûng, ngiâ Song-chú — Yî-set-lie̍t ke Song-ti fat-khién.
[31] Nâ-tap khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[32] Yù-thai-vòng Â-sat lâu Yî-set-lie̍t-vòng Pâ-sâ chhai-vi khì-kiên, sòng-sòng chan-chên.
[33] Yù-thai-vòng Â-sat chhai-vi ke thi-sâm ngièn, Â-hî-ngâ ke lai-é Pâ-sâ cho Yî-set-lie̍t ke vòng. Kì chhai Tet-sat thúng-chhṳ ngi-sṳ̍p si-ngièn.
[34] Kì chhiong Yâ-lò-pô-ôn khiung-yong fam-chhui, hàng Song-chú khon-cho sià-ok ke sṳ, hoi Yî-set-lie̍t-ngìn ham chhai chhui-ok tông-chûng.