[1] Thai-ngì-vòng Hî-làn yit-liu-lî he Thai-ví ke phèn-yû; kì yit thâng-tó Só-lò-mùn sṳ̀n-chiap kiâ-pâ Thai-ví cho vòng, chhiu phai-ngìn lòi kien Só-lò-mùn.
[2] Só-lò-mùn phai-ngìn hi lâu Hî-làn kóng:
[3] “Ngì tî ngâ-pâ Thai-ví mò fap-thu vi Song-chú — kì ke Song-ti hí sṳn-thien, yîn-vi kì yit-chhṳ̍t lâu chû-vì ke koet-kâ siông-chhṳ̀. Kì oi tén-to Song-chú sṳ́ kì yàng-ko só-yû ke sù-thi̍t yî-heu chang cho-tet hí sṳn-thien.
[4] Liá-ha, Song-chú — ngài ke Song-ti yí-kîn sṳ́ ngài ke thiên-ha thai-phìn, mò sù-thi̍t, me mò châi-fo.
[5] Song-chú sṳt yin-hí ngâ-pâ Thai-ví kóng: ‘Ngài oi ke sṳ̀n-chiap ngì vòng-vi ke lai-é vi Ngài ke miàng hí sṳn-thien.’ Só-yî, ngài kiet-thin oi hí sṳn-thien, lòi kin-pai Song-chú — ngài ke Song-ti.
[6] Chhiáng ngì phai ngì ke kûng-ngìn to Lì-pâ-nun vi ngài chám hiông-pak-su. Ngài liá-phién ke kûng-ngìn voi lâu kì-têu khiung-ha kûng-chok; ngài ya voi cheu ngì só-thin ke kûng-chhièn pûn ngì ke kûng-ngìn. Ngì tî, ngài-têu m̀-chhiong ngì-têu Sî-tun-ngìn án voi chám su-é.”
[7] Hî-làn thâng-tó Só-lò-mùn ke fa, fî-sòng fôn-hí; kì kóng: “Ngien Song-chú kîm-pû-ngit tet-tó siung-chan! Kì su-pûn Thai-ví yit-ke yû chṳ-fi ke lai-é chhṳ-lî liá ví-thai ke mìn-chhu̍k!”
[8] Só-yî Hî-làn fì-tap Só-lò-mùn: “Ngài yí-kîn chiap-tó ngì chhòn-lòi ke fa; ngài chún-phi cheu ngì ke yêu-khiù kiûng-yin hiông-pak-su lâu chhiùng-su.
[9] Ngài ke kûng-ngìn voi tui Lì-pâ-nun chiông su-liau yun-to hói-tú, khún-cho muk-phài, phêu-to ngì chṳ́-thin ke só-chhai. Ngài ke kûng-ngìn voi chhai ke-vi chhak-khôi muk-phài, kâu-pûn ngì ke kûng-ngìn chhú-lî. Nang-ngoi, ngài hî-mong ngì kiûng-yin sṳ̍t-vu̍t pûn ngài ke kâ-chhu̍k.”
[10] Án-ngiòng, Hî-làn cheu Só-lò-mùn ke yêu-khiù kiûng-kip hiông-pak-su lâu chhiùng-su;
[11] Só-lò-mùn tak-ngièn pûn Hî-làn lióng-chhiên kûng-tún ma̍k-é lâu si-sṳ̍p van kûng-sṳ̂n sùn kám-lám-yù, cho kì kâ-chhu̍k ke sṳ̍t-vu̍t.
[12] Song-chú cheu Kì ke yin-hí, su-pûn Só-lò-mùn chṳ-fi. Hî-làn lâu Só-lò-mùn fò-phìn siông-chhu, pí-chhṳ́ li̍p-yok.
[13] Só-lò-mùn-vòng tui chhiòn Yî-set-lie̍t tho̍k sâm-van ngìn cho khú-kûng,
[14] phai Â-tô-nì-làn kón-lî kì-têu. Kì chiông kì-têu fûn-cho sâm-chhui, tak-chhui yit-van ngìn. Tak-chhui chhai Lì-pâ-nun yit-chak ngie̍t, chhai vuk-hâ lióng-chak ngie̍t.
[15] Só-lò-mùn ya phai pat-van sà chhai sân-táng chho̍k sa̍k-thèu, chhit-van sà pân-yun sa̍k-thèu,
[16] yu-yû sâm-chhiên sâm-pak ke kûng-thèu lòi kam-tuk kì-têu kûng-chok.
[17] Kì-têu cheu Só-lò-mùn-vòng ke min-lin chho̍k kui-chhung ke thai sa̍k-thèu, cho sṳn-thien ke thi-kî sa̍k.
[18] Só-lò-mùn lâu Hî-làn ke kien-chuk kûng-ngìn, hàn-yû tui Kâ-pâ-le̍t-sàng lòi ke ngìn chho̍k sa̍k-thèu, chún-phi sa̍k-thèu lâu su-liau hí sṳn-thien.