[1] Song-chú tui Ha̍p-nâ-nì ke lai-é siên-tî Yâ-fu kóng-fa, oi kì chiông yî-ha ke sêu-sit lâu Pâ-sâ kóng:
[2] “Ngài tui nài-fún chûng chiông ngì thì-sṳ̂n, sat-li̍p ngì cho Ngài ke chṳ́-mìn Yî-set-lie̍t ke liâng-chhiu. Ngì fán-chón fam-chhui, chhiong Yâ-lò-pô-ôn khiung-yong, hoi Ngài ke chṳ́-mìn ham chhai chhui-ok tông-chûng. Kì-têu ke chhui ngiâ Ngài fat-khién,
[3] só-yî Ngài oi chhù-me̍t ngì lâu ngì ke kâ-chhu̍k, chhiong Ngài tui-thai Yâ-lò-pô-ôn ke kâ-chhu̍k khiung-yong.
[4] Ngì vuk-hâ só-yû ke ngìn, sí chhai sàng-tú ke yit-thin voi pûn kiéu-è sṳ̍t-thet, sí chhai sân-yâ ke yit-thin voi pûn tiâu-é sṳ̍t-thet.”
[5] Pâ-sâ khì-thâ ke sṳ, lâu kì yîn-yúng ke só-cho, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[6] Pâ-sâ sí-heu chong chhai Tet-sat. Kì ke lai-é Yî-lâ sṳ̀n-chiap kì cho vòng.
[7] Ha̍p-nâ-nì ke lai-é siên-tî Yâ-fu kóng-chhut Song-chú chit-phi Pâ-sâ lâu kì kâ-chhu̍k ke fa, yîn-vi Pâ-sâ fam-chhui, hàng Song-chú khon-cho sià-ok ke sṳ. Kì ngiâ Song-chú fat-khién, yîn-vi kì lâu Yâ-lò-pô-ôn kâ-chhu̍k khiung-yong hàng sià-ok ke sṳ, ya yîn-vi kì chhṳ̀-thet Yâ-lò-pô-ôn kâ-chhu̍k só-yû ke ngìn.
[8] Yù-thai-vòng Â-sat chhai-vi thi ngi-sṳ̍p liuk-ngièn, Pâ-sâ ke lai-é Yî-lâ cho Yî-set-lie̍t-vòng. Kì chhai Tet-sat thúng-chhṳ lióng-ngièn.
[9] Yû yit-ke kiûn-kôn Sîm-li, kì chṳ́-fî vòng-sṳt yit-pan ke chan-chhâ, sióng-oi chho-fán. Tông vòng chhai Tet-sat kón-lî vòng-kiûng sṳ-vu thai-sṳ̀n Â-chha̍p vuk-hâ sṳ̍t-chiú-chui ke sṳ̀,
[10] Sîm-li ngi̍p-hi vuk-tú, chiông Yî-lâ chhṳ̀-sí, chhon kì ke vòng-vi. Liá-sṳ fat-sên chhai Yù-thai-vòng Â-sat chhai-vi thi ngi-sṳ̍p chhit-ngièn.
[11] Sîm-li yit chhô vòng-vi chhiu chiông Pâ-sâ chhiòn-kâ ke ngìn chhṳ̀-thet, lièn kì ke chhîn-chhit lâu phèn-yû, fàm-he nàm-ngìn ya chhiòn-phu chhṳ̀-sí.
[12] Sîm-li chhṳ̀-thet Pâ-sâ chhiòn-kâ, liá-sṳ he yin-ngiam Song-chú thûng-ko siên-tî Yâ-fu chit-phi Pâ-sâ ke fa.
[13] Yîn-vi Pâ-sâ lâu kiâ lai-é Yî-lâ pai ngiéu-siong, yu hoi Yî-set-lie̍t-ngìn fam-chhui, kì-têu chhiu ngiâ Song-chú — Yî-set-lie̍t ke Song-ti fat-khién.
[14] Yî-lâ khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[15] Yù-thai-vòng Â-sat chhai-vi thi ngi-sṳ̍p chhit-ngièn, Sîm-li chhai Tet-sat cho vòng chhit-ngit. Ke-sṳ̀, Yî-set-lie̍t ke kiûn-chhui tú-hó chhai ke-vi ôn-yàng vì-kûng Fî-li-sṳ ke Kî-pí-tun-sàng.
[16] Kì-têu thâng-tó Sîm-li chho-fán, chhṳ̀-thet vòng, kì-têu tông-ngit chhiu chhai yàng-tú li̍p ngièn-soi Am-li cho Yî-set-lie̍t-vòng.
[17] Am-li lâu kì ke kiûn-chhui lì-khôi Kî-pí-tun chón-hi vì-kûng Tet-sat.
[18] Sîm-li khon-tó sàng yí-kîn pûn-ngìn cham-liâng, chhiu ngi̍p vòng-kiûng nui ke sàng-pó, piong-fó sêu vòng-kiûng, chiông chhṳ-kâ sêu-sí.
[19] Liá he yîn-vi Sîm-li fam-chhui, hàng Song-chú khon-cho sià-ok ke sṳ. Kì chhiong Yâ-lò-pô-ôn khiung-yong m̀ tân-chhiang chhṳ-kâ fam-chhui, yu hoi Yî-set-lie̍t-ngìn fam-chhui, ngiâ Song-chú fat-khién.
[20] Sîm-li khì-thâ ke sṳ, pâu-hàm kì yîm-mèu chho-fán vòng ke kîn-ko, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[21] Yî-set-lie̍t ngìn-mìn fûn-cho lióng-phai: Yit-phai oi sat-li̍p Kî-na̍p ke lai-é Thì-pí-nì cho vòng, nang-ngoi yit-phai yúng-fu Am-li.
[22] Chui-heu, ke-têu yúng-fu Am-li ke ngìn yàng lé. Thì-pí-nì sí-thet, Am-li chhiu cho vòng.
[23] Yù-thai-vòng Â-sat chhai-vi ke thi sâm-sṳ̍p yit-ngièn, Am-li cho Yî-set-lie̍t-vòng. Kì chhai-vi sṳ̍p-ngi ngièn, chhièn liuk-ngièn chhai Tet-sat.
[24] Heu-lòi, kì yung liuk-chhiên chak ngiùn-pi tui yit-ke miàng-ham Sat-mâ ke ngìn ke-vi chiông Sat-mâ-li-â-sân mâi ko-lòi. Am-li chhai liá sân-táng hí yit-chho sàng, cheu liá-sân ngièn-chú Sat-mâ ke miàng lâu kì ôn-to Sat-mâ-li-â.
[25] Am-li pí kì yî-chhièn só-yû ke vòng fam hàn-kha chhûng ke chhui, hàng Song-chú khon-cho sià-ok ke sṳ.
[26] Kì chhiong Yâ-lò-pô-ôn khiung-yong, m̀ tân-chhiang chhṳ-kâ fam-chhui, yu hoi Yî-set-lie̍t-ngìn fam-chhui, pai ngiéu-siong, ngiâ Song-chú — Yî-set-lie̍t ke Song-ti fat-khién.
[27] Am-li khì-thâ ke sṳ lâu kì yúng-kám ke hàng-vì chhiòn-phu ki chhai Yî-set-lie̍t Lie̍t-vòng Sṳ́ tî-poi.
[28] Am-li sí-thet yî-heu chong chhai Sat-mâ-li-â. Kì ke lai-é Â-ha̍p sṳ̀n-chiap kì cho vòng.
[29] Yù-thai-vòng Â-sat chhai-vi thi sâm-sṳ̍p pat-ngièn, Am-li ke lai-é Â-ha̍p cho Yî-set-lie̍t-vòng. Kì chhai Sat-mâ-li-â thúng-chhṳ ngi-sṳ̍p ngi-ngièn.
[30] Â-ha̍p fam-chhui, hàng Song-chú khon-cho sià-ok ke sṳ, pí kì yî-chhièn só-yû ke vòng hàn-kha li-hoi.
[31] Kì só-fam ke chhui pí Yâ-lò-pô-ôn-vòng hàn-kha chhûng, kì yu thó Sî-tun-vòng Yet-pâ-li̍t ke moi-é Yâ-sé-pit cho pû-ngiòng, hàn hi-pai Pâ-li̍t.
[32] Kì chhai Sat-mâ-li-â hí Pâ-li̍t ke meu, chhai meu-tú vi Pâ-li̍t hí yit-chho chi-thàn.
[33] Â-ha̍p yu tun yit-kî Â-sa-lâ ńg-sṳ̀n ke chhû-siong lòi-pai. Kì só-fam ke chhui pí kì yî-chhièn só-yû ke Yî-set-lie̍t-vòng hàn-kha chhûng, ngiâ Song-chú — Yî-set-lie̍t ke Song-ti fat-khién.
[34] Kì chhai-vi ke sṳ̀, Pak-thi̍t-li-ngìn Hî-yî-le̍t chhùng-kien Yâ-li-kô-sàng. Cheu Song-chú thûng-ko Nun ke lai-é Yok-sû-â só-kóng ke yi-ngièn, Hî-yî-le̍t chhai Yâ-li-kô-sàng tá thi-kî ke sṳ̀, thai ke lai-é Â-pí-làn sí-thet; tông kì ôn sàng-mùn ke sṳ̀, se ke lai-é Sî-kot sí-thet.