[1] Si-li-â ke vòng Phien-Ha̍p-tha̍t seu-si̍p kì só-yû ke kiûn-chhui, tai-liâng su̍k kì ke sâm-sṳ̍p ngi-ke vòng lâu kì-têu ke chan-chhâ, chan-mâ chhut-hi siông-chhṳ̀, vì-kûng Sat-mâ-li-â.
[2] Kì phai-têu sṳ́-chá to sàng-tú hi lâu Yî-set-lie̍t-vòng Â-ha̍p kóng: “Phien-Ha̍p-tha̍t án-ngiòng kóng:
[3] Ngì oi chiông kîm-é, ngiùn-è, ngì ke-têu pû-ngiòng, hàn-yû ngiâ ke-têu tông-chap, tông-chiâng ke chṳ́-ńg chhiòn-phu kâu-pûn ngài.”
[4] Yî-set-lie̍t-vòng fì-tap kì ke fa kóng: “Chhiáng lâu ngài ke chú Phien-Ha̍p-tha̍t-vòng kóng, ngài voi cheu kì só-kóng ke hi-cho. Ngài lâu ngài só-yû ke chhiòn-phu cho-tet pûn kì.”
[5] Mò kí-kiú, ke-têu sṳ́-chá yu to-chón-lòi, tai-tén Phien-Ha̍p-tha̍t nang-ngoi ke yêu-khiù kóng: “Ngài lâu ngì kóng-ko, ngì oi chiông ngì ke kîm-ngiùn, ngì ke-têu pû-ngiòng, hàn-yû chṳ́-ńg chhiòn-phu kâu-pûn ngài.
[6] Chúng-he thiên-kông-ngit liá sṳ̀-chiet, ngài oi phai ngài ke kôn-yèn to ngì ke vòng-kiûng lâu ngì thai-sṳ̀n ke vuk-hâ sêu-chhà, chiông ngì só khon-cho ta̍t-chhièn ke tûng-sî chhiòn-phu nâ-chéu.”
[7] Yî-set-lie̍t-vòng chiông koet-nui ke-têu chóng-ló chhiòn-phu seu-si̍p lòi, tui kì-têu kóng: “Ngì-têu khon, liá-ke ngìn oi lòi hoi ngài-têu. Kì siên phai-ngìn pet ngài kâu-chhut ngài ke pû-ngiòng, chṳ́-ńg lâu kîm-ngiùn, ngài pin-mò khî-chhie̍t.”
[8] Só-yû ke chóng-ló lâu ngìn-mìn chhiòn-phu kóng: “M̀-hó thâng kì ke! M̀-hó tap-yin kì!”
[9] Só-yî, Â-ha̍p fì-tap Phien-Ha̍p-tha̍t ke-têu sṳ́-chá kóng: “Chhiáng lâu ngài ke chú Phien-Ha̍p-tha̍t-vòng kóng: Phu̍k-ngìn voi tap-yin ngì thi-yit pái ke yêu-khiù, chúng-he liá-pái ngài mò phan-fap tap-yin!” Ke-têu sṳ́-chá chhiu chón-hi hiong vòng po-ko,
[10] mò kí-kiú yu tai-tén Phien-Ha̍p-tha̍t ke fa chón-lòi, kóng: “Ngài oi tai thai-chhui ngìn-mâ hi pho-fái Sat-mâ-li-â. Na-he sàng-tú ke nài-fún la kì-têu tak-sà púng yit-púng, ngien sṳ̀n-mìn chhûng-chhûng chit-fa̍t ngài!”
[11] Yî-set-lie̍t-vòng kóng: “Ngì-têu chón-hi lâu kì kóng: Chṳ̂n-sṳ̍t ke chan-sṳ m̀-he chhai siông-chhṳ̀ chhièn phùn kiê-kôi, he chhai tá-yàng heu khoâ-khiéu.”
[12] Phien-Ha̍p-tha̍t chiap-tó Â-ha̍p ke tap-fu̍k, kì lâu khì-thâ ke vòng tú-hó chhai yàng-tú ke chong-phùng lîm-chiú. Kì ha-lin kóng: “Chún-phi kûng-sàng!” Kì-têu chhiu chún-phi hó-se oi hi kûng-tá Sat-mâ-li-â.
[13] Liá-sṳ̀, yû yit-ke siên-tî hi kien Yî-set-lie̍t-vòng Â-ha̍p, tui kì kóng: “Song-chú kóng: ‘Ngì yû khon-tó tui-fông ke kiûn-chhui án thai-chhṳn mò! Khon nâ! Ngài kîm-pû-ngit oi sṳ́ ngì tá-yàng kì-têu, ngì chhiu tî Ngài he Song-chú.’ ”
[14] Â-ha̍p mun: “Má-ngìn oi hi tá thèu-chhṳn nè?” Siên-tî kóng: “Song-chú kóng: Chhai tak-sén ke-têu thèn sén-chóng su̍k-hâ ke seu-chong kiûn-kôn.” Vòng yu mun: “Má-ngìn cho chúng chṳ́-fî nè?” Siên-tî kóng: “Chhiu-he ngì.”
[15] Só-yî, vòng seu-si̍p chhai tak-sén ke-têu thèn sén-chóng su̍k-hâ ke seu-chong kiûn-kôn lióng-pak sâm-sṳ̍p ngi-sà, yu seu-si̍p Yî-set-lie̍t kiûn-chhui chhit-chhiên sà.
[16] Tông-chu, Phien-Ha̍p-tha̍t lâu hia̍p-chhu kì ke sâm-sṳ̍p ngi-ke vòng chhai yàng-tú ke chong-phùng chiú-chui ke sṳ̀, Yî-set-lie̍t-ngìn khôi-sṳ́ kûng-kit.
[17] Ke-têu seu-chong kiûn-kôn siên chhut-fat. Phien-Ha̍p-tha̍t phai-hi ke tham-é chhiu fì-po kóng: “Yû ngìn tui Sat-mâ-li-â chhut-lòi.”
[18] Kì chhiu ha-lin: “Chiông kì-têu sâng-sâng chok hí-lòi! M̀-kón kì-têu he lòi siông-chhṳ̀ ya-he lòi kóng-fò ke.”
[19] Ke-têu seu-chong kiûn-kôn tai-thèu chhut-chan; Yî-set-lie̍t kiûn-chhui thèn chhai heu-poi.
[20] Tak-sà lûng-chúng chhṳ̀-sí só tù-tó ke thi̍t-ngìn. Yîn-vi án-ngiòng, Si-li-â-ngìn chhiu thò-chéu, Yî-set-lie̍t-ngìn chhai heu-poi tûi. Si-li-â-vòng Phien-Ha̍p-tha̍t khì-tén mâ, lâu kí-ke khì-pîn khiung-ha thò-chéu.
[21] Yî-set-lie̍t-vòng yit-chhṳ̍t tûi-to sàng-ngoi, hi-chhióng ke-têu chan-chhâ lâu mâ-é, chiông Si-li-â-ngìn tá-to vang-kòng vang-thoi.
[22] Heu-lòi, ke siên-tî hi kien Yî-set-lie̍t-vòng, kóng: “Chón-hi kâ-khiòng ngì ke kiûn-li̍t, hó-hó kie-va̍k, yîn-vi Si-li-â-vòng màng-ngièn chhûn-thiên yit-thin hàn-voi lòi kûng-tá ngì.”
[23] Si-li-â-vòng ke kôn-yèn tui kì kóng: “Yî-set-lie̍t-ngìn ke sṳ̀n he sân-sṳ̀n, só-yî Yî-set-lie̍t-ngìn tá-yàng ngài-têu. Chúng-he, ngài-têu chhai phìn-ngièn lâu kì-têu siông-chhṳ̀, ngài-têu yit-thin voi tá-yàng kì-têu.
[24] Thai-vòng, ngì oi án-ngiòng cho: Chha̍t-thet ke sâm-sṳ̍p ngi-ke vòng ke kiûn-khièn, kói-phai khì-thâ ke chiông-kiûn lòi thoi kì-têu,
[25] yèn-heu chhùng-sîn phiên yit-chhui kiûn-pîn, song-pái sṳt-thet ke chan-mâ lâu chan-chhâ ya oi pú-chiuk. Ngài-têu oi chhai phiàng-thi lâu Yî-set-lie̍t-ngìn siông-chhṳ̀; liá-pái ngài-têu yit-thin voi tá-yàng.” Vòng chhái-na̍p kì-têu ke kien-ngi.
[26] Thi-ngi ngièn chhûn-thiên, Phien-Ha̍p-tha̍t seu-si̍p Si-li-â-ngìn to Â-fut-sàng, oi hi kûng-tá Yî-set-lie̍t-ngìn.
[27] Yî-set-lie̍t-ngìn ya seu-si̍p kiûn-chhui, hó-hó chún-phi, kì-têu fûn-cho lióng-chhui chhut-hi, mien-hiong Si-li-â-ngìn ôn-yàng. Chúng-he Yî-set-lie̍t-ngìn lâu thièn-yâ cha̍t-cha̍t ke Si-li-â-ngìn pí hí-lòi, chhiu-chhiong he lióng se-khiùn ke sân-yòng.
[28] Yû yit-ke sṳ̀n-ngìn hi kien Yî-set-lie̍t-vòng, kóng: “Song-chú án-ngiòng kóng: ‘Yîn-vi Si-li-â-ngìn kóng Ngài he sân-sṳ̀n, m̀-he phìn-ngièn ke sṳ̀n, só-yî Ngài oi sṳ́ ngì tá-yàng kì-têu ke thai-kiûn, ngì-têu chhiu tî Ngài he Song-chú.’ ”
[29] Si-li-â-ngìn lâu Yî-set-lie̍t-ngìn tui-chhṳn ôn-yàng chhit-ngit kiú. To thi-chhit ngit, kì-têu chhiu kâu-chan. Ke-ngit, Yî-set-lie̍t-ngìn chhṳ̀-thet Si-li-â sṳ̍p-van phu-pîn.
[30] Chhûn-tó ke ngìn thò-ngi̍p Â-fut-sàng; sàng-chhiòng vang hâ-lòi, yu chak-sí lióng-van chhit-chhiên ngìn. Phien-Ha̍p-tha̍t ya thò-ngi̍p sàng-tú, khong chhai yit-chho vuk-è chui tî-poi ke kiên-fòng.
[31] Kì ke kôn-yèn tui kì kóng: “Ngài-têu thâng-kóng Yî-set-lie̍t ke-têu vòng chhiòn-phu chhin chhṳ̀-pî. Chhiáng chún ngài-têu hi kien liá Yî-set-lie̍t-vòng. Ngài-têu oi chhai yêu-sṳ̂n vì mà-pu, chhai kiáng-kîn thak sok-è; án-ngiòng, mò yit-thin kì voi ngièu ngì ke miang.”
[32] Só-yî kì-têu nâ mà-pu vì chhai yêu-sṳ̂n, yung sok-è thak chhai kiáng-kîn, to Yî-set-lie̍t-vòng ke-vi hi, kóng: “Ngì ke phu̍k-ngìn Phien-Ha̍p-tha̍t khiù ngì ngièu kì yit-miang.” Â-ha̍p kóng: “Kì hàn-sâng he-mò? Kì he ngài ke hiûng-thi!”
[33] Phien-Ha̍p-tha̍t ke kôn-yèn yit khon-tó kî-fi nàn-tet, chhiu kiak-kiak sun kì ke fa kóng: “Chhiu-chhiong vòng só-kóng ke, Phien-Ha̍p-tha̍t he ngì ke hiûng-thi!” Â-ha̍p ha-lin kóng: “Hi tai kì lòi!” Phien-Ha̍p-tha̍t to ke sṳ̀, Â-ha̍p chhiáng kì lâu chhṳ-kâ khiung-ha chhô-sông chan-chhâ.
[34] Phien-Ha̍p-tha̍t kóng: “Ngài oi chiông ngâ-pâ tui ngiâ-pâ ke-vi chhióng-lòi ke sàng-sṳ kûi-vàn ngì, yu pûn ngì chhai Thai-mâ-sṳ-kiet sat-li̍p méu-yi̍t chûng-sîm, chhiong ngâ-pâ chhai Sat-mâ-li-â só cho ke.” Â-ha̍p en-kóng: “Hó, ngài voi cheu-yok piong ngì chéu.” Â-ha̍p chhiu lâu kì li̍p-yok, yèn-heu piong kì chéu.
[35] Yû yit-khiùn siên-tî, khì-chûng yit-ke fung Song-chú min-lin hiong nang-ngoi yit-ke thùng-phân kóng: “Lòi tá ngài!” Chúng-he ke siên-tî m̀-hén tá kì.
[36] Só-yî kì tui ke siên-tî kóng: “Yîn-vi ngì mò thâng-chhiùng Song-chú ke min-lin, ngì yit lì-khôi ngài, chhiu voi yû sṳ̂-é lòi ngâu-sí ngì.” Ke siên-tî chéu-khôi yî-heu, ton-chṳ̂n tù-tó sṳ̂-é, chiông kì ngâu-sí.
[37] Siên-chhièn kóng-fa ke siên-tî yu chhìm-tó nang-ngoi yit-sà, tui kì kóng: “Lòi tá ngài!” Ke-sà ngìn chhiu tá kì, chiông kì tá-sông lé.
[38] Siên-tî yung pu-é chiông muk-chû êm hí-lòi, ká-cho phe̍t-ngìn, chhai lu-sùn khî-tén, tén Yî-set-lie̍t-vòng kîn-ko.
[39] Vòng kîn-ko ke sṳ̀, siên-tî thai-sâng hêm: “Koet-vòng, ngài siông-chhṳ̀ ke sṳ̀, yû yit-ke sṳ-pîn chiông yit-ke chok-lòi ke thi̍t-ngìn kâu-pûn ngài, kóng: ‘Chóng-tén liá-ke ngìn; na-he kì chéu-thet, ngì oi yung miang phòi-miang, ya-he fa̍t sâm-chhiên chak ngiùn-pi.’
[40] Chúng-he ngài chhin mò-hàn ke sṳ̀, liá-ke ngìn sa chéu-thet hi.” Yî-set-lie̍t-vòng kóng: “Ngì yí-kîn phan chhṳ-kâ ke chhui lé; ngì yit-thin oi chiap-su hìn-fa̍t.”
[41] Siên-tî ngiàm-sṳ̀ chiông êm muk-chû ke pu-é nâ hâ-lòi, Yî-set-lie̍t-vòng chhiu ngin-chhut kì he siên-tî.
[42] Só-yî siên-tî tui vòng kóng: “Song-chú án-ngiòng kóng: ‘Yîn-vi ngì chiông Ngài min-lin ngì oi chhù-thet ke ngìn piong-chéu, ngì yit-thin oi yung ngì ke miang phòi-miang, ya oi yung ngì ke ngìn-mìn phòi kì ke ngìn-mìn.’ ”
[43] Yî-set-lie̍t-vòng chón-to Sat-mâ-li-â ke vòng-kiûng, sîm-tú pot-at tông mò fôn-hí.