[1] Só-lò-mùn thâm-lien tông-tô ngoi-koet se-moi-é. Chhù-liáu Âi-khi̍p-vòng ke moi-é yî-ngoi, kì yu thó Het-ngìn ke se-moi-é lâu Mô-ap, Â-mùn, Yî-tûng, lâu Sî-tun ke se-moi-é.
[2] Song-chú sṳt min-lin Yî-set-lie̍t-ngìn cho-m̀-tet lâu liá-têu ngoi-chhu̍k ngìn thûng-fûn, yîn-vi kì-têu voi yín-yu Yî-set-lie̍t-ngìn hi-pai kì-têu ke sṳ̀n-mìn. Chúng-he Só-lò-mùn thâm-lien liá-têu se-moi-é.
[3] Kì thó chhit-pak ke kûng-chú cho pû-ngiòng, nang-ngoi yu yû sâm-pak ke se-chiá; kì-têu sṳ́ Só-lò-mùn lì-khôi Song-ti.
[4] Chhai Só-lò-mùn ngièn-ló ke sṳ̀, kì-têu yín-yu kì hi-pai ngoi-koet ke sṳ̀n-mìn; kì mò-chhiong kiâ-pâ Thai-ví án-ngiòng tui Song-chú — kì ke Song-ti chûng-sîm.
[5] Kì ya hi-pai Sî-tun-ngìn ke Â-sṳ̂-thâ-liu̍k ńg-sṳ̀n lâu Â-mùn-ngìn sià-ok ke sṳ̀n Mô-lo̍k.
[6] Só-lò-mùn hàng Song-chú khon-cho sià-ok ke sṳ, mò-chhiong kiâ-pâ Thai-ví án-ngiòng vàn-chhiòn sun-fu̍k Song-chú.
[7] Kì chhai Yâ-lu-sat-lâng tûng-phién ke sân-táng hí yit-chho chi-thàn pai Mô-ap sià-ok ke sṳ̀n Kî-mat, yu hí yit-chho chi-thàn pai Â-mùn-ngìn sià-ok ke sṳ̀n Mô-lo̍k.
[8] Kì yu vi só-yû ngoi-koet thó-lòi ke pû-ngiòng se-chiá hí chhin-tô pai ngiéu-siong ke thi-fông, pûn kì-têu cho-tet chhai ke-vi hiong chhṳ-kâ ke sṳ̀n-mìn sêu-hiông hien-chi.
[9] Sûi-yèn Song-chú — Yî-set-lie̍t ke Song-ti sṳt lióng-pái hiong Só-lò-mùn hién-hien, min-lin kì cho-m̀-tet pai ngoi-koet ke sṳ̀n-mìn, chúng-he Só-lò-mùn mò thâng-chhiùng Song-chú, fán-chón lì-khôi Kì. Só-yî Song-chú hiong Só-lò-mùn fat-khién,
[11] tui kì kóng: “Yîn-vi ngì ku-yi phoi-ngia̍k Ngài lâu ngì li̍p ke yok, m̀ chûn-sú Ngài ke min-lin, Ngài yit-thin voi chiông ngì ke koet chhióng-chéu, pûn ngì ke yit-ke thai-sṳ̀n.
[12] Chúng-he, vi-tó ngiâ-pâ Thai-ví ke yèn-ku, ngì hàn-sâng ke sṳ̀, Ngài m̀ cho liá-sṳ, oi tén-to ngiâ lai-é cho vòng ke sṳ̀ chang sṳ̍t-hàng.
[13] Chúng-he Ngài m̀ chiông kûi-chak koet-kâ tui kì sú-chûng chhióng-chéu; vi-tó Ngài phu̍k-ngìn Thai-ví, ya vi-tó Ngài sién-li̍p ke Yâ-lu-sat-lâng-sàng, Ngài voi liù-hâ yit-ke kî-chhu̍k pûn kì.”
[14] Só-yî, Song-chú hîn-hí Yî-tûng-vòng heu-thoi ke Ha̍p-tha̍t cho Só-lò-mùn ke tui-thi̍t.
[15] Chhai liá yî-chhièn, Thai-ví chṳ̂n-fu̍k Yî-tûng ke sṳ̀, Thai-ví kiûn-chhui ke ngièn-soi Yok-ap sṳt to ke-vi hi mài-chong chan-chên sí-thet ke ngìn.
[16] Yok-ap lâu kì ke phu-ha liù chhai Yî-tûng liuk-ke ngie̍t. Ke-chham khì-kiên, kì-têu chhṳ̀-thet Yî-tûng só-yû ke nàm-ngìn,
[17] chṳ́-yû Ha̍p-tha̍t lâu kiâ-pâ ke kí-ke Yî-tûng phu̍k-ngìn thò-to Âi-khi̍p, mò pûn-ngìn chhṳ̀-sí. (Ke-sṳ̀ Ha̍p-tha̍t hàn-he yit-ke se-ngìn-è.)
[18] Kì-têu lì-khôi Mí-thien to Pâ-làn, lâu chhai ke-vi ke kí-ke ngìn fi-ha̍p, yèn-heu thò-to Âi-khi̍p. Âi-khi̍p-vòng chiông thièn-thi, fòng-vuk su-pûn Ha̍p-tha̍t, ya kiûng-kip kì sṳ̍t-vu̍t.
[19] Âi-khi̍p-vòng chung-yi Ha̍p-tha̍t, sṳm-chṳ chiông vòng-heu Tap-pí-nì ke ló-moi pûn kì cho pû-ngiòng.
[20] Kì lâu Ha̍p-tha̍t kiung yit-ke lai-é, ôn-to Kî-nú-pha̍t. Vòng-heu yông-yuk kì, sṳ́ kì chhai vòng-kiûng tî-poi lâu ke-têu vòng-chṳ́ khiung-ha he̍t.
[21] Ha̍p-tha̍t chhai Âi-khi̍p thâng-tó Thai-ví ko-sṳ̂n, ngièn-soi Yok-ap ya yí-kîn sí-thet, chhiu tui vòng kóng: “Chhiáng pûn ngài chón chhṳ-kâ ke koet-kâ!”
[22] Vòng kóng: “Ngì chhai ngài liá-vi kám yû khiam má-ke? Cho-má-ke oi chón ngì ke koet-kâ hi?” Ha̍p-tha̍t en-kóng: “Ngài mò khiam má-ke! Chṳ́-yû khiù vòng chún ngài chón-hi!”
[23] Song-ti ya hîn-hí Yî-li-â-thai ke lai-é Li-sun cho Só-lò-mùn ke tui-thi̍t. Li-sun tui kiâ chú-ngìn Só-pâ-vòng Ha̍p-thai-tí-chhia ke-vi thò chhut-lòi;
[24] kì chêu yit-khiùn khiòng-tho lòi, chhṳ-kâ cho kì-têu ke thèu-muk. (Liá-sṳ fat-sên chhai Thai-ví tá-yàng Ha̍p-thai-tí-chhia, chhṳ̀-thet kì ke Si-li-â thùng-mèn yî-heu.) Li-sun lâu kì ke phu-ha hi-to Thai-mâ-sṳ-kiet, chhai ke-vi he̍t. Kì ke phu-ha yúng-fu kì cho vòng.
[25] Só-lò-mùn hàn-sâng ke sṳ̀, Li-sun lâu Ha̍p-tha̍t khiung-yong he Yî-set-lie̍t ke tui-thi̍t, Li-sun chen-kâ Yî-set-lie̍t ke châi-fo, yu cho Â-làn-ngìn ke vòng.
[26] Nang-ngoi yû yit-ke Só-lò-mùn-vòng ke tui-thi̍t, chhiu-he vòng ke yit-ke kôn-yèn, Yî-fap-lièn kî-chhu̍k ke Sé-li-tha̍t-ngìn, Nì-pat ke lai-é Yâ-lò-pô-ôn. Kiâ-mê he koá-fu, ôn-to Sé-lû-ngâ.
[27] Yî-ha chhiu-he kì chho-fán ke kîn-ko. Tông Só-lò-mùn thùn-phiàng Yâ-lu-sat-lâng sàng-tûng ke tâi-vô thi, pin siû-pú kiâ-pâ Thai-ví sàng-chhiòng ke sṳ̀,
[28] Yâ-lò-pô-ôn he yit-ke phan-sṳ nèn-li̍t tông-khiòng ke chhiâng-ngièn ngìn. Só-lò-mùn fat-hien kì kûng-chok ngin-chṳ̂n, chhiu phai kì kam-tuk só-yû chhai Mâ-nâ-sî lâu Yî-fap-lièn kî-chhu̍k thi-khî ke lò-kûng.
[29] Yû yit-ngit, Yâ-lò-pô-ôn tui Yâ-lu-sat-lâng chhut-lòi, Sṳ-lò-ngìn siên-tî Â-hî-ngâ chhai khóng-yâ ke lu-song tù-tó kì; ke-sṳ̀ chhai khóng-yâ chṳ́-yû kì lióng-sà. Â-hî-ngâ chok yit-liâng sîn-sâm,
[30] kì chiông sîn-sâm thot hâ-lòi, chhá-cho sṳ̍p-ngi te,
[31] yèn-heu tui Yâ-lò-pô-ôn kóng: “Ngì nâ sṳ̍p-te hi, yîn-vi Song-chú — Yî-set-lie̍t ke Song-ti án-ngiòng kóng: ‘Ngài oi chiông Só-lò-mùn ke koet chhá khôi-lòi, fûn sṳ̍p-ke kî-chhu̍k pûn ngì.
[32] Chúng-he vi-tó Ngài ke phu̍k-ngìn Thai-ví, ya vi-tó Ngài tui Yî-set-lie̍t kok kî-chhu̍k chûng só-sién ke Yâ-lu-sat-lâng-sàng ke yèn-ku, Só-lò-mùn hàn cho-tet pó-liù yit-ke kî-chhu̍k.
[33] Ngài án-ngiòng cho he yîn-vi Só-lò-mùn lì-khôi Ngài, hi-pai ngoi-koet ke sṳ̀n-mìn: Chhiu-he Sî-tun ke ńg-sṳ̀n Â-sṳ̂-thâ-liu̍k, Mô-ap-sṳ̀n Kî-mat, Â-mùn-sṳ̀n Mô-lo̍k. Só-lò-mùn phoi-ngia̍k Ngài; kì mò hàng Ngài khon-cho chho̍k ke sṳ, ya mò chhiong kiâ-pâ Thai-ví án-ngiòng chûn-sú Ngài ke fap-li̍t kie-min.
[34] Chúng-he Ngài m̀ tui kì ke-vi chiông kûi-chak koet-kâ chhióng-chéu; Ngài voi pûn kì chhai hàn-sâng ke sṳ̀ ki-siu̍k chóng-khièn. Ngài án-ngiòng cho he vi-tó Ngài kién-sién ke phu̍k-ngìn Thai-ví ke yèn-ku, yîn-vi kì chûn-sú Ngài ke fap-li̍t lâu kie-min.
[35] Ngài oi tui Só-lò-mùn lai-é ke sú-chûng chiông koet-khièn chhióng-chéu, pûn ngì sṳ̍p-ke kî-chhu̍k,
[36] chúng-he liù yit-ke kî-chhu̍k pûn Só-lò-mùn ke lai-é. Án-ngiòng, Ngài chhiu yún-yén yû Ngài ke phu̍k-ngìn Thai-ví ke heu-thoi thúng-chhṳ Yâ-lu-sat-lâng; liá-sàng he Ngài só sién-li̍p cho kin-pai Ngài ke thi-fông.
[37] Yâ-lò-pô-ôn nâ, Ngài oi li̍p ngì cho Yî-set-lie̍t ke vòng; ngì voi thúng-chhṳ ngì só hî-mong tet-tó ke thú-thi.
[38] Na-he ngì vàn-chhiòn thâng-chhiùng Ngài, chûn-hàng Ngài ke tho, cho Ngài só fôn-hí ke sṳ, chûn-sú Ngài ke fap-li̍t, sṳ̍t-hàng Ngài ke min-lin, chhiong Ngài ke phu̍k-ngìn Thai-ví án-ngiòng, Ngài chhiu yún-yén lâu ngì thùng-chhai. Ngài voi sṳ́ ngì cho Yî-set-lie̍t ke vòng, yu sṳ́ ngì ke heu-thoi ki-siu̍k thúng-chhṳ, chhiu-chhiong Ngài hiong Thai-ví só-cho ke yit-yong.
[39] Ngài oi yîn-vi Só-lò-mùn ke chhui chit-fa̍t Thai-ví ke heu-thoi, chúng-he liá chit-fa̍t m̀-he yún-yén ke.’ ”
[40] Só-yî, Só-lò-mùn sióng phan-fap oi chhṳ̀ Yâ-lò-pô-ôn; chúng-he Yâ-lò-pô-ôn thò-to Âi-khi̍p-vòng Sṳ-sat ke-vi hi, he̍t chhai Âi-khi̍p, chhṳ̍t-to Só-lò-mùn ko-sṳ̂n chang chón-lòi.
[41] Só-lò-mùn khì-thâ ke sṳ, mò-lun kì ke sṳ̀n-chhiu ya-he kì ke chṳ-fi, chhiòn-phu ki chhai Só-lò-mùn Sṳ́ tî-poi.
[42] Só-lò-mùn chhai Yâ-lu-sat-lâng cho vòng, thúng-chhṳ chhiòn Yî-set-lie̍t si-sṳ̍p ngièn.
[43] Kì ko-sṳ̂n heu, chong chhai kiâ-pâ Thai-ví ke sàng; kì ke lai-é Lò-pô-ôn sṳ̀n-chiap kì cho vòng.