[1] Só-lò-mùn ya vi chhṳ-kâ hí yit-chho vòng-kiûng, yung sṳ̍p-sâm ngièn ke sṳ̀-kiên chang vàn-kûng.
[2] Lì-pâ-nun Lìm-kiûng chhòng si-sṳ̍p si kûng-chhak, fat ngi-sṳ̍p ngi kûng-chhak, kô sṳ̍p-sâm kûng-chhak pan; yû sâm-hòng hiông-pak-su ke chhû-é, tak-hòng sṳ̍p-ńg kî, táng-kô ka-tén hiông-pak-su ke vàng-liòng. Thiên-fâ-pán ya he hiông-pak su-liau cho ke, theu-to chhông-khu; chhông-khu yû chhû-é chhang-tén.
[4] Lióng-phién ke piak-hong kok-yû sâm-phài chhûng-mùn.
[5] Mùn-khiông lâu chhûng-mùn chhiòn-phu he si-kok hìn ke. Liá-phién ke sâm-phài chhûng-mùn lâu ke-phién ke sâm-phài chhûng-mùn siông-tui.
[6] Kì yu hí Yèn-chhû Thai-thâng, chhòng ngi-sṳ̍p ngi kûng-chhak, fat sṳ̍p-sâm kûng-chhak pan, yu tap yit-chho yû phùng-è ke chéu-lòng, yung yèn-chhû chhang-tén.
[7] Kì yu hí Pó-chho-thâng, nang-ngoi ham-cho Sṳ́m-phan-thâng, he kì sṳ́m-phan on-khien ke thi-fông. Thâng-nui tui thi-piông to thiên-fâ-pán chhiòn-phu he hiông-pak su-liau cho ke.
[8] Chhai Sṳ́m-phan-thâng heu-poi ke yit-ke thìn-yen tú yû Só-lò-mùn ke kiên-fòng; liá kiên-fòng ya hí-to chhiong khì-thâ ke kien-chuk khiung-yong. Só-lò-mùn ya vi kì ke pû-ngiòng — Âi-khi̍p kûng-chú hí khiung-yong ke kiên-fòng.
[9] Só-yû liá-têu kien-chuk lâu thai-yen, tui thi-kî to vuk-yàm, chhiòn-phu he yung kui-chhung ke sa̍k-thèu hí ke, liá-têu sa̍k-thèu he tui chhái-sa̍k-chhòng cheu chhak-chhun tá chhut-lòi, yung ki-é nui-ngoi lióng-mien chṳ́n-lî ko ke.
[10] Thi-kî he yung phín-chṳt chhin-hó ke thai sa̍k-thèu phû ke, yû sâm kûng-chhak pan chhòng ke, ya yû si kûng-chhak chhòng ke.
[11] Chhai liá táng-kô yû cheu chhak-chhun chho̍k-sṳ̀n ke sa̍k-thèu lâu hiông-pak-su ke liòng.
[12] Mò-lun thai-yen, sṳn-thien ke nui-yen, ya-he Song-chú sṳn-thien ke mùn-lòng chhiòn-phu yû sâm-chhèn chho̍k-hó ke sa̍k-thèu kak yit-chhèn hiông-pak-su liòng ke piak.
[13] Só-lò-mùn-vòng phai-ngìn hi Thai-ngì-sàng ham Fu-làn lòi.
[14] Kiâ-pâ he Thai-ngì-ngìn, he chu-chho thùng-hi ke sṳ̂-fu, chúng-he yí-kîn sí-thet; kiâ-mê he Nâ-fut-thâ-li kî-chhu̍k ke ngìn. Fu-làn he fî-sòng chhûng-mìn yu-yû kîn-ngiam ke chhut-miàng sṳ̂-fu; kì chiap-su Só-lò-mùn-vòng ke phín-chhiáng, fu-chit só-yû ke thùng-hi kûng-chhàng.
[15] Fu-làn chu-chho lióng-kî thùng-chhû, tak-kî kô pat kûng-chhak, chû-vì ńg kûng-chhak sâm kûng-chhun.
[16] Kì ya chu-chho lióng-chak thùng ke chhû-thèu, tak-chak kô lióng kûng-chhak lióng kûng-chhun, ôn chhai thùng-chhû táng.
[17] Tak-kî thùng-chhû thèu ôn-tén yit-chak piên-chṳt ke lien-é thù-hìn,
[18] lâu lióng-phài thùng sa̍k-liù châ-tén chhû-thèu.
[19] Mùn-lòng ke chhû-é táng ke chhû-thèu kô yit kûng-chhak pat kûng-chhun, hìn-chhong chhiong pak-ha̍p-fâ,
[20] ôn chhai lien-é thù-hìn táng-kô. Yû lióng-pak ke sa̍k-liù fûn lióng-phài vì-tén tak-kî chhû-táng ke chhû-thèu.
[21] Fu-làn chiông liá lióng-kî thùng-chhû tun chhai sṳn-thien ke ngi̍p-mùn héu: Nàm-phién ke-kî ham-cho Ngâ-kîn; pet-phién ke-kî ham-cho Pô-â-sṳ̂.
[22] Pak-ha̍p-fâ hìn-chhong ke chhû-thèu ôn chhai thùng-chhû táng. Án-ngiòng, chho thùng-chhû ke kûng-chhàng chhiu vàn-sṳ̀n lé.
[23] Fu-làn chu-chho yit-ke yèn ke thùng-hói, chhṳ̂m lióng kûng-chhak lióng kûng-chhun, tui liá-phién to ke-phién si kûng-chhak si kûng-chhun, chû-vì sṳ̍p-sâm kûng-chhak lióng kûng-chhun.
[24] Thùng-hói piên-sùn ke ngoi-poi he lióng-phài thùng fù-lù, liá-têu thùng fù-lù lâu thùng-hói chhiòn-phu he yung kûi-te thùng chu-chho ke.
[25] Thùng-hói ôn chhai sṳ̍p-ngi chak thùng-ngiù poi-nòng táng; ngiù-thèu hiong-ngoi, sâm-chak hiong-tûng, sâm-chak hiong-sî, sâm-chak hiong-nàm, sâm-chak hiong-pet.
[26] Thùng-hói phûn chhit kûng-fûn pan, piên-sùn chhiong pî-é ke piên-sùn, khat yû pak-ha̍p-fâ ke fâ-phan. Thùng-hói cho-tet chông si-van kûng-sṳ̂n.
[27] Fu-làn yu chu-chho sṳ̍p-chak cho-tet sái-lòi sái-hi ke thùng-phùn-chho, tak-chho chhòng yit kûng-chhak pat kûng-chhun, fat yit kûng-chhak pat kûng-chhun, kô yit kûng-chhak sâm kûng-chhun.
[28] Thùng-phùn-chho he yung si-kok-hìn ke siông-pán chho ke; siông-pán ke piên-sùn he yung khiông-ka lòi ku-thin,
[29] siông-pán mien-táng yû sṳ̂-é, ngiù-kú lâu kî-lu-pak ke siong. Khiông-ka ngoi-hiong, chhiu-he sṳ̂-é lâu ngiù-kú ke táng-kô lâu tái-hâ, khat-tén phò hí-lòi ke fâ-vùn.
[30] Tak-chho yû si-chak thùng lin-é, chhâ-sîm ya he thùng ke. Tak-chho tái-hâ yû si-kî thùng-kiok chhang-tén, kiok-song khat-tén phò hí-lòi ke fâ-vùn.
[31] Phùn-héu chui táng-kô yû yit-chak yèn-khiông, kô-chhut thùng-chho ke chui táng-kô si-sṳ̍p ńg kûng-fûn, pûn thùng-chho châ-tó ke phu-fun yû sṳ̍p-pat kûng-fûn, chû-vì chhiòn-phu yû tiâu-khiet ke thù-on.
[32] Thùng-phùn-chho ke lin-é kô liuk-sṳ̍p liuk kûng-fûn, chhai siông-pán hâ-poi. Chhâ-sîm lâu thùng-phùn-chho chhiòn-phu he yung kûi-te thùng chu-chho ke.
[33] Lin-é ke yong-sṳt chhiong chan-chhâ ke lin-é; lin-sîm, lin-khiông, lin-kang lâu chhâ-sîm chhiòn-phu he thùng chu-chho ke.
[34] Tak-chho hâ-poi yû si-kî kiok chhang-tén; liá-têu kiok lâu thùng-phùn-chho chhiòn-phu he yung kûi-te thùng chu-chho ke.
[35] Tak-chho mien-táng yû kô hí-lòi ngi-sṳ̍p ngi kûng-fûn ke yèn-khiên-é. Chho ke kiok, siông-pán lâu thùng-phùn-chho chhiòn-phu he yung kûi-te thùng chu-chho ke.
[36] Kiok lâu siông-pán khat yû sṳ̂-é, chûng-su lâu kî-lu-pak, chû-vì ke khiông-ka khat-tén yû phò hí-lòi ke fâ-vùn.
[37] Sṳ̍p-chak thùng-phùn-chho chhiu-he án-ngiòng chu-chho ke. Tak-chho ngoi-hìn chhiòn-phu khiung-yong, thai-se ya khiung-yong.
[38] Fu-làn yu vi thùng-phùn-chho chu-chho sṳ̍p-chak thùng-phùn; tak-chak thùng-phùn tui liá-phién to ke-phién yit kûng-chhak pat kûng-chhun, cho-tet chông pat-pak kûng-sṳ̂n.
[39] Kì chiông ńg-chak thùng-phùn-chho piong chhai sṳn-thien nàm-phién, nang-ngoi ńg-chak piong chhai pet-phién, chiông thùng-hói piong chhai sṳn-thien ke tûng-nàm phién.
[40] Fu-làn ya chu-chho vo̍k-thèu, vo̍k-chhán lâu vón. Kì vi Só-lò-mùn-vòng vàn-sṳ̀n kì só fu-chit Song-chú sṳn-thien ke kûng-chhàng. Kì só chu-chho ke yung-phín lie̍t chhai hâ-poi: Lióng-kî thùng-chhû, ôn chhai thùng-chhû táng-kô ke lióng-chak vón-hìn chhû-thèu, chhû-táng piên-chṳt ke lien-é ke thù-hìn, si-pak chak thùng sa̍k-liù — tak-chak chhû-thèu thù-hìn khiêu-tén lióng-phài sa̍k-liù, yit-phài yit-pak chak, sṳ̍p-chak thùng-phùn-chho, sṳ̍p-chak thùng-phùn, thùng-hói, chhang-tén thùng-hói ke sṳ̍p-ngi chak thùng ngiù-kú, vo̍k-thèu, vo̍k-chhán lâu vón. Fu-làn vi Só-lò-mùn-vòng chu-chho Song-chú sṳn-thien ke yung-phín, chhiòn-phu he yung thùng chu-chho nò-to kîm-kîm.
[46] Liá-têu tûng-sî chhiòn-phu he cheu vòng ke min-lin, chhai Yok-tan phìn-ngièn, Sû-kot lâu Sat-lâ-tan tûng-ông ke chu-chho-chhòng chu-chho ke.
[47] Só-lò-mùn-vòng mò ham-ngìn chhṳn liá-têu thùng-hi; yîn-vi su-liong tông-tô, só-yî chhiùng-lòi m̀-sṳt son-ko ke-têu yung-phín yû kí-chhûng.
[48] Só-lò-mùn ya ham-ngìn vi Song-chú ke sṳn-thien chṳ-chho kîm-hi: Yû kîm-thàn, pài-sat kiûng-piáng ke kîm chok-è,
[49] piong chhai chṳ-sṳn-só thèu-chhièn ke sṳ̍p-chak sùn-kîm tên-thòi (ńg-chak chhai nàm, ńg-chak chhai pet), kîm fâ, tên, fó-khiàm,
[50] lâu sùn-kîm phùn, tên-sîm chién-tô, vón, piong-hiông ke thia̍p-é, chông fó-than ke phùn-è, pin chṳ-sṳn-só ke mùn-kau-é lâu sṳn-thien ngoi-mùn ke mùn-kau-é. Liá-têu yung-phín chhiòn-phu he yung kîm-é chṳ-chho ke.
[51] Só-lò-mùn-vòng vàn-sṳ̀n Song-chú sṳn-thien só-yû ke kûng-chhàng, chhiu chiông kiâ-pâ Thai-ví hien-pûn Song-chú ke kîm-ngiùn lâu khì-thâ yung-phín chhiòn-phu piong chhai sṳn-thien ke chhông-khu tú.