[1] Kun mullata Yesuus Kiristoos, kan waan dafee tahuun irra jiru, kaadamtoota isaa agarsiisuuf Rabbiin kanneefi; inni maleeykaa isaa ergee ti, mullata kana kaadamaa isaa Yohannis beeysise.
[2] Yohannisiis waan arkee fi waan dhagaye hundumaa ni hime; qoowlii Rabbiin dubbatee fi waan Yesuus Kiristoos mullisee mirkaneeyseefiis ragaa dha bahe.
[3] Waytiin raawwatamuuf waan dhihaatteef jecha, namticha qoowlii raajii tanaa, sagalee isaa nama dhageeysisaa dubbisu, warri qoowlii raajii dubbatamte tana dhagayanii, waan isii keeysatti katabame eegan eeybifamo!
[4] Ani Yohannis, waldoota kiristaanaa torban kutaa biyya Asiyaa keeysa jirtaniif kana barreeysuu kiyya. “Ni'imaanii fi nagayni niis Rabbi kan ammaas jiru, kan duriis ture, kan dhufa jiru biraa, ammaas ruuhaanota torban kanneen arshii isaa dura jiran biraa hiisi.
[5] Ammaas Yesuus Kiristoos, raga-baatuu amanamaa, kan du'a keeysaa ka'utti angafaa, mooticha mootoota biyya addunyaa kan tahe biraa hiis isiniif haa tahu!” jedhee tiin nagaya kiyya isiniif dhiheeysa. Inni nu jaalatee ti, dhiiga isaa tiin, dilii teenya irraa bilisa nu baase.
[6] Inni mootummaa takka nu godhee, Rabbii fi ammaas Abbaa isaa tiif luboota akka taanu nu godhee ti jira, Yesuus Kiristoosiif ulfinninii fi amriin bara baraaf haa taahan! Aammiin.
[7] Kunoo, inni duumeeysa irra taa'ee dhufaa ti jira; ijji hundinuu isa arkuufi teeysi, warri isa waraanan illeen isa arkuufi taa'u qomoon biyya addunyaa irraa hundinuu isaaf ni waywaatu; eeyye, akkasuma taha. Aammiin.
[8] Rabbi Gooytaan, inni amma jiru, inni duriis ture, inni dhufuuf deemu, inni hundumaa dandayu, “Ani Alfaa dha, Ani Omeegaa dha” jedha; [akkana jechuun, “Ani kan duraa ti, kan boodaa tiisi” jechuu dha].
[9] Ani Yohannis obboleeysi keeysan, kan isiniin wajji maqaa Kiristoosiif jecha rakkatu, kan mootummaa isaa irraa hirmaatu, obsaan dandayuu dhaan eeggachutti gola teeysan kan tahe kun, qoowlii Rabbii tii fi ammaas ragaa Yesuusiif bahuuf jecha, gara biyya bishaan keeysaa tan “Phaaximoo” jedhamtu takkatiin geeyfame.
[10] Guyyaa Gooftaatti ani Ruuhaan guutamee odoon jiruu, if duubatti sagalee guddoo, tan akka sagalee garrii fakkaattu takkaan dhagaye.
[11] Sagaleen saniis, “Waan arkaa jirtu kanneen kitaabatti katabii tii, gara waldoota kiristaanaa magaalaa Efesoon, magaalaa Simiirnaa, magaalaa Phergamoon, magaalaa Tiyaatiraa, magaalaa Saardes, magaalaa Filaadelfiyaa tii fi ammaas gara magaalaa Laa'odiiqeyaa jiran torbaniif ergi!” anaan jette.
[12] Eegas booda sagalee anatti dubbachaa turte san laaluufiin if duubatti garagale, akkumaan duubatti garagaleeniin kunoo, qabduu ibsaa torba kanneen ziqeeya irraa tolfamaniin arke.
[13] Baattoowwan ibsaa san jidduu ammoo Ilma Namaa kan fakkaatu tokkootu uffata dheeraa miila gadi gahu uffatee, waan akka waraansillee ziqeeyaa takka qoma isaatti hidhatee tu ture.
[14] Rifeensi mataa isaa akka suufa adiitti yookiin akka cabbitti addaatee ti walaqqisa; ijji isaa tiis akka barbada ibiddaa ti.
[15] Miilli isaa akka sibiila diimaa kan boolla ibiddaa keeysatti finiinee ifuu ti, sagaleen isaa tiis akka sagalee gooha bishaan hedduu ti.
[16] Harka isaa kan mirgaa keeysaa urjoota torba qaba; afaan isaa keeysaa habalee gama lamaaniin qaraatu baha; fuulli isaa tiis akka aduu wayta orraatti ifa.
[17] Hogguun isa arke, akka nama du'ee tahee tiin miillan isaa jalattiin kufe. Inni ammoo harka isaa kan mirgaa ana irra kaayee ti, “Hin sodaatin! Ani kan duraa, ammaas kan boodaa tiisi.
[18] Ani jiraataa dha. Du'ee tiin ture, amma ammoo kunoo ani bara baraaf jiraata; maftaan du'aa tii fi tan bakka azaabaa tiis ana harka jiru.
[19] Ammaas waan agarte, warra amma jiranii fi kanneen booda tahuuf deemaniis katabi!
[20] Ma'anaan dhokattuun tan urjoota torban harka kiyya kan mirgaa keeysatti agartee tii fi ammaas tan baattoowwan ibsaalee torban ziqeeya irraa hojjatamanii tiis akkana; urjoonni torban maleeykoota waldoota torbanii ti, baattoowwan ibsaalee torbanii tiis waldoota torbani jechu.” jedhe.