[1] Eegas booda ani ilaallaan, kunoo hoolicha gaara Xiyoon gubbaa irra dhaabbatuun arke; namoonni kuma dhibba tokkoo fi afurtamii afur, warra maqaan isaa, maqaan Abbaa isaa tiis adda isaanii irratti katabamee tu isaan wajjiin ture.
[2] Sagalee akka gooha bishaan hedduu dhaa, tan akka didirrisa mandiisuu guddoo dhaa tiin, samii keeysatti dhagaye; sagaleen ani dhagaye, tan akka sagalee kiraara gurguddaa warri kiraara rukutan muziiqaa itti dhageeysisanii ti turte.
[3] Isaan faarfannaa haaraya fuula arshichaa, fuula uumama lubbuu qaban afranii fi fuula manguddootaa duratti faarfatu; faarfannaa san ammoo warra kuma dhibba tokkoo fi kuma afurtamii afran, kanneen biyya addunyaa keeysaa eewalaman qofa malee, namni biraa tokko illeenuu barachuu hin dandayu.
[4] Isaan kun warra dubartootatti odoon hin ida'amin bikrummaan xaaharummatti if eegani. Isaan kanneeni warri bakka hoolichi dhaqu hundumaa isa duukaa bu'an. Isaan kanneen warra shanyii namaa hunduma keeysaa Rabbii fi hoolichaaf jalqaba dura najaa bahani.
[5] Kijibni tokko illeenuu afaan isaanii keeysatti hin arkamne; isaan warra illaa hin qabneesi.
[6] Kana booddee maleeykaan biraa tokko, Wangeela bara baraa baadhatee, warra lafa irra jiraatanitti, saba hundumatti, gosa hundumatti, afaanuma dubbatamu hundumatti, ummata hundumattis labsuuf kan walakkaa bantii samii keeysa bararutti jiruun arke.
[7] Inni niis sagalee guddoo dhaan, “Kunoo, wayti Rabbi firdii isaa itti kannu waan geeyseef jecha, isa sodaadhaa, ulfinaas kannaafi! Isuma kan samii fi dachiis, ammaas baharii fi burqitoota bishaanii tiis uumeef sagadaa!” jedhe.
[8] Maleeykaan lamadaa tiis maleeykaa duraa duukaa bu'ee ti, “Kuftee ti jirti, Baabiloon guddittiin, isiin ummata hundumaa daadhii si'oo zinaa fiddu isii irraa akka dhugan tan goote, kuftee ti jirti!” jedhe.
[9] Maleeykaan biraa sadeeysaaniis isaan lamaan san duukaa bu'ee ti sagalee guddoo dhaan, “Namticha bineensaa fi bifa fakkeenya isaa tiif sagade, kan asxaa saniis adda isaa irratti yookiin harka isaa irratti fudhate,
[10] ammaas inni matummaan isaatuu daadhii lola Rabbii, tan makaa hin qabne, tan geeba lola isaatitti qicamte dhuguuf taa'a; fuula maleeykoota qulqullootaa tii fi fuula hoolichaa durattiis ibiddaa fi dannyoo bobawuun azzabamuuf taa'a.
[11] Aarri ibidda isaan azzabuu ammoo bara baraaf irraa ol ka'a; warri bineensichaa fi bifa fakkeenya isaa tiif sagadan, ammaas warri asxaa maqaa isaa agarsiisu fudhataniis, halkanii fi guyyaas humaa shikifii hin qaban” jedhe.
[12] Warra Rabbiif qulqullaawanii ajaja isaa tiis eegan, obsaan dandayuu fi ammaas Yesuusiif amanamoo tahuu tu isaan irraa eegama.
[13] Ani ammaas sagalee takka tan samii keeysaa, “Asii achi warri Gooftaa irratti amantaa qabaatanii du'an eeybifamoo dha jedhii tii katabi!” tan naan jettuun dhagaye. Ruuhal Qudusiis, “Eeyye, dadhabbii isaanii irraa haara ni galfatu, faaydaan hojii isaanii tiis isaan duukaa dha deemti” jedha.
[14] Kana booddee ilaallaan, kunoo duumeeysa adii tokkoon arke; ammaas Ilma Namaa fakkaatu tokkoos gonfoo ziqeeyaa matatti kaayatee, haamtuu qara qabdu takka harkatti qabatee, duumeeysa san irra taa'a ture.
[15] Maleeykaan biraa tokko ammoo Beeytal Maqdas san keeysaa gadi bahee ti, sagalee guddoo dhaan namticha duumeeysa irra taa'e saniin, “Wayti biiyti addunyaa tun itti oomishamtu geeyse, walumaa galattiis bilchaattee daalistee ti jirtii, haamtuu tee jala kaahii tii haami!” jedheeni.
[16] Akkasitti namtichi duumeeysa irra taa'e saniis haamtuu isaa biyya addunyaa jala kaayee ti haame, dachiiniis ni oomishamte.
[17] Ammaas maleeykaan biraa tokko Beeytal Maqdas samii irraa keeysaahi gadi bahe; inni niis ammaas haamtuu qara qabdu if harkaa qaba ture.
[18] Kana booddee maleeykaan biraa, kan ibidda irratti amrii qabu tokko, bakka aarsaa tii gadi bahee ti, sagalee guddoo dhaan maleeykicha haamtuu qara qabdu qabu saniin, “Firiin inabaa waan bilchaatteef, haamtuu tee jala kaahii tii hurbuu inaba biyya addunyaa haamii walitti qabi!” jedhe.
[19] Kanaaf maleeykaan sun haamtuu isaa biyya addunyaa jala kaayee, hurbuu inabaa tiis muka isaa irraa ciree ti, boolla guddoo lola Rabbii tan firii inaba itti cunfan keeysatti darbe.
[20] Ammaas inabni bakka itti cunfan keeysa jirtuus, magaalaa duubatti cunfame; bakka cunfaa inabaa san keeysaa dhiiyni bahee ti, hanga luugama fardaa bira gahutti ol ka'ee, ammaas toora kiilo meetira dhibba sadihii takka lafa irra yaa'e.