[1] Eegas ammaas maleeykaa jabaa biraa tokko, samii keeysaa odoo gadi bu'aa jiruutiin arke. Inni duumeeysa uffatee, mataa isaa gubbaa irraa sabbata-gaaloo ti qaba ture; fuulli isaa akka adutti walaqqisa, miillan isaa tiis akka utubaa ibiddaa ti turan.
[2] Inni kitaaba maramu xiqqaa banaa dha if harkaa qaba ture; miila isaa kan mirgaa bahar irra, miila isaa kan bitaa tiis lafa goggooyduu irra kaayate.
[3] Sagalee guddoo akka sagalee leenca aaduu tiini iyye. Hogguu inni iyye, mandiisuun torbanuu sagalee isaanii ni dhageeysisan.
[4] Hogguma isaan dubbatan san, ani waan isaan jedhan san barreeysuufiin ka'e; ammoo sagaleen samii keeysaa, “Waan mandiisuun torban dubbatan dhooysii tii garatti qabadhu malee, hin katabin!” tan anaan jettuun dhagaye.
[5] Maleeykichi bahar irraa fi lafa goggooyduu irraas dhaabbatee arke sun, harka isaa kan mirgaa gara samiitti ol qabe.
[6] Maqaa isa kan bara baraaf jiraatu, kan samii fi waan isii keeysa jiruus, lafaa fi waan isii keeysa jiruus, baharii fi waan isa keeysa jiruus, uume saniin kakatee, “Eegana dhibaawuun hin jiru.
[7] Guyyaa garriin torbeeysaan afuufamtu ammoo, wanni Rabbi dhooysatti akeeke, akkuma inni nabiyyoota kaadamtoota isaatitti himee ture sanitti, raawwatamuufi deemti” jedhe.
[8] Hogguus sagaleen duraan samii irraa anatti dubbachuu isii dhagaye sun, ammaas anatti dubbatte, “Deemii tii kitaaba maramu banamaa, maleeykicha miila tokkoon bahar irra, ammaas miila tokkoon lafa goggooyduu irra dhaabbate san harkaa fudhadhu!” naan jette.
[9] Ani hogguus gara maleeykichaa deemee tiin, kitaaba xiqqaa maramu san akka anaaf kannuun gaafadhe. Inni ammoo, “Kitaabticha fudhadhuu nyaadhu! Inni garaa kee keeysatti ni hadhaawa, afaan kee keeysatti ammoo mi'aawaa akka deymaa ti taha” naan jedhe.
[10] Hogguus ani kitaaba xiqqaa maramu san, harka maleeykichaa keeysaa fuudhee tiin nyaadhe; inni afaan kiyya keeysatti akka deymaatti mi'aawa ture; eegaan isa nyaadhee booda ammoo, garaan kiyya na hadhaawe.
[11] Akkasumatti ammaas, “Ati waa'ee namoota hedduu, saba hedduu, afaan hedduu, mootoota hedduu irrattiis raajii dubbachuu dha qabda” jedhamee ti anatti himame.