[1] Maleeykaan shaneeysaan garrii isaa ni afuufe. Hogguus ani urjii samii keeysaa lafatti kufte takkaan arke; urjicha saniifiis maftaan boolla lafa jala gadi fagoo hoonga hin qabnee tu kannameefi.
[2] Urjichi afaan boolla lafa jala gadi fagoo hoonga hin qabne san ni bane; aarri akka aara bakka ibidda guddaa tii ka'uutiis boollicha keeysaa ni bahe; ifni aduu tii fi hawaaniis aara boolla keeysaa bahuun ni dukkaneeyfaman.
[3] Aara san keeysaa ammaas awwaannisni lafa irratti gadi yaa'e; awwaannisa saniif humna akka qajjeebbuu tu kannameefi.
[4] Isaan citaa lafaa, meeyraa fi mukaas odoo hin miidhin, namoota warra sumuda Rabbii adda isaanii irraa hin qabne qofa akka miidhaniif ajajaman.
[5] Awwaannisni namoota ajjeesuuf odoo hin tahin, ji'uma shan qofaaf musiibaa akka isaanitti buusuufi amriin kannamteefi; laalaan isaan nama irraan gayaniis, tan akka qajjeebbuun nama ciniintee ti.
[6] Wayta san keeysatti namoonni du'a ni barbaadu, ammoo du'a hin arkatan; du'uus ni hawwu, duuti ammoo isaan dheeysiti.
[7] Bifti awwaannisa sanii, faradoo duulaaf qopheeyfaman fakkaata; waan akka gonfoo ziqeeyaa ti mataa irraa qabu turan. Fuulli isaanii fuula namaa ti fakkaata.
[8] Rifeensi isaanii akka rifeensa mataa dubartii ti; ilkeen isaanii tiis akka ilkaan leencaa ti.
[9] Qoma isaaniitti waan akka sadariiyyaa sibiilaa uffatanii ti turan; didichaan goblaa isaanii tiis akka didichaa konkolaattoota faradoo hedduun harkifamaa duulatti didichanii ti.
[10] Eegee fi waan namaan iddan kanneen akka qajjeebbuun qabduu fakkaatanii ti qabu turan; humniti isaan ji'a shaniif ittiin namaan miidhan ammoo eegee isaanii keeysa jirti.
[11] Isaaniis mootii isaan bulchu ni qabu turan, inni ammoo maleeykaa qilee lafa jalaa sanii ti; maqaan maleeykichaa afaan Yihudootaatti “Abadoon”, afaan Giriigitti ammoo “Apholiyon” jedhama; inni niis “Balleeyso” jechuu dha.
[12] Maganiin duraa dabartee ti jirti. Kunoo, kana booda ammaas maganii lamaatu amma illee hafee dhufa jira.
[13] Maleeykaan jaheeysaan garrii isaa ni afuufe. Hogguus ani sagalee ruknii afran aarsaa ziqeeyaa kanneen fuula Rabbii dura dhaabbatan irraa dhuftuun dhagaye.
[14] Sagaleen, maleeykaa jaheeysaa garrii baatu saniin, “Maleeykoota afran laga Efraaxiis guddichatti hidhaman san hiiki!” jette.
[15] Maleeykoonni afran suniis ni hiikaman; isaan warra namoota irraa harka sadih keeysaa harka tokko sa'aa tanatti, guyyaa kanatti, ji'a kanatti, ammaas bara kanattiis ajjeesuuf qopheeyfamanii turani.
[16] Lakkooysi loltuu warra faradoo dhaa, miliyoona dhib lama tahuu isaa niin dhagaye.
[17] Hogguus ani faradoo sanii fi, warra faradoo san irra taa'an, mullata keeysattiin arke. Isaan sadariiyyaa sibiilaa diimaa, bifa buuloo gurraacha, ammaas hurdii akka dannyoo ti qabu turan. Mataan faradoo sanii tiis mataa leencaa ti fakkaata ture; afaan isaanii keeysaa ammoo ibidda, aaraa fi dhagaan bobawuus ni bahu turan.
[18] Ibidda, aara, dhagaa bobawu, balaa sadeen afaan faradoo keeysaa bahan saniin, namoonni harka sadih keeysaa harki tokko ni ajjeefaman.
[19] Humniti faradoo sanii afaan isaanii keeysaa fi eegee isaanii keeysa jirti; eegeen isaanii bofa mataa qabu fakkaatti, namootaan miidhuuf itti fayyadamu.
[20] Namoonni balaa saniin odoo hin ajjeefamin hafan hundinuu, toowbatanii waaqayyolii harka isaanii tiin tolfatan irraa hin deebine; ruhaanota hamoo fi waaqayyolii ziqeeya irraa, meeta irraa, sibiila diimaa irraa, dhagaa irraa, muka irraahiis tolfaman, kan ammoo arkuus, dhagayuus, asii fi achi deddeemuus hin dandeenyeef gombifamanii sagaduus isaan warra hin dhiifne.
[21] Isaan toowbatanii nama ajjeesuu irraa, falfala namatti godhuu irraa, halalummaa isaanii irraa, hanna isaanii irraahiis hin deebine!