[1] Kana booddee maleeykoonni afur kanneen ruknii lafaa afran irra dhadhaabbatanii, qilleensi lafa irratti, bahar irratti, mukattiis akka hin qilleensofneef qilleensota ruknii afranii warra ittisuun arke.
[2] Ammaas maleeykaan biraa kan sumuda Rabbii jiraataa dhaa qabu tokko gara baha biiftuu tii kan ol bahuun arke. Maleeykichi niis maleeykoota afran warra lafaa fi bahar miidhuun isaaniif kanname san sagalee guddoo dhaan yaamee ti,
[3] “Hanga nuti adda kaadamtoota Rabbii keenyaa irratti sumuda goonuu, lafaa fi bahar, mukaas hin miidhinaa!” isaaniin jedhe.
[4] Lakkooysa warra mallateeyfamanii tiis niin dhagaye; gosa joollee Israa'el hundumaa keeysaa kuma dhib tokkoo afurtamii afurtu mallateeyfame.
[5] Gosa Yihudaa keeysaa kum kudha lamaatu mallateeyfame; gosa Ruuben keeysaa kum kudha lama, gosa Gaadi keeysaa kum kudha lama,
[6] gosa Asheer keeysaa kum kudha lama, gosa Niftaalem keeysaa kum kudha lama, gosa Minaasee keeysaa kum kudha lama,
[7] gosa Shimi'oon keeysaa kum kudha lama, gosa Lewii keeysaa kum kudha lama, gosa Yisaakor keeysaa kum kudha lama,
[8] gosa Zebuloon keeysaa kum kudha lama, gosa Yoseef keeysaa kum kudha lama, gosa Beniyaamin keeysaa kum kudha lamaatu mallateeyfaman.
[9] Kana booddee ilaallaan, kunoo dilli hedduun namaa saba hundumaa keeysaa, gosa hundumaa keeysaa, ummata hundumaa keeysaa, afaan dubbatamu hundumaa keeysaa kanneen dhufan, kanneen namni tokko illeenuu isaan lakkaawuu hin dandeenyeen arke; isaaniis uffata adaadii uffatanii, damee muka meeyxii dhaa harka isaaniitti qabatanii arshicha dura, hoolicha duraas ni dhadhaabbatu turan.
[10] Isaan kun sagalee guddoo dhaan, “Najaatni Rabbii keenya kan arshicha irra taa'uu fi ammaas, hoolicha biraahi arkama!” jedhan.
[11] Maleeykoonni arshii, manguddootaa tii fi uumama lubbuu qaban afranitti naannawanii warri dhaabbatan hundinuu, arshii duratti adda isaanii tiin gombifamanii ti Rabbiif sagadan.
[12] Sagada isaanii keeysattiis, “Aammiin! Rabbii keenyaaf hamdiin, guddinni, hikmaan, galanni, ulfinni, humniti, amriiniis bara baraaf haa tahu! Aammiin!” jedhan.
[13] Ergasii manguddoota keeysaa inni tokko, “Warri uffata adaadii uffatan kun eenyu, eeysaahi dhufan?” jedhee ti na gaafate.
[14] Ani ammoo, “Yaa Gooftaa koo, sumaatu beeka!” jedhee tiin deebiseefi. Hogguus inni, “Isaan kanneen warra rakkina guddaa keeysaa bahanii dhufani; uffata isaanii tiis dhiiga hoolichaa tiin miicanii addeeysanii ti jiru.
[15] Kanaaf isaan arshii Rabbii duratti arkamanii, halkanii fi guyyaas Beeytal Maqdas isaa keeysatti isa kaadamu; inni arshii irra taa'uus dukkaana isaa isaan irratti dhaabuuni dahoo tahaafi.
[16] Eegaa, isaan kanaan booda hin beelawan, hin dheebotaniisi; aduu fi amajjiiniis isaanitti hin bu'an.
[17] Hoolichi arshii jidduu jiraatu isaan waan tiysuuf jecha, gara burqaa bishaan jireenya kannuttiis isaan geeysa; Rabbiis imimmaan hundumaa huu ija isaanii irraa haqa” naan jedhe.