[1] “Gara maleeykaa waldaya Efesoonitti, ‘Ergaan tun tan isa harka isaa kan mirgaa tiin urjoota torban qabee, qabduu ibsaalee torban jidduu deddeebi'uu ti’ jedhii tii barreeysi”
[2] Ergaaniis, “Ani hojii tee, akkaataa ati itti laffaatee fi, ammaas obsaan dandayuu kee tiis niin beeka; namoota hamoos caluma jettee akka hin dhiifne, ammaas warra ergamoota odoo hin tahin ‘Nuti ergamoota’ ifiin jedhaniis xiinxaltee laaltee kijiboo tahuu isaanii akka agartees, hubadhee tiin jira.
[3] Ati maqaa kiyyaaf jecha, rakkina obsaan dandeeysee akka hin dadhabi niis ani niin beeka.
[4] Haa tahu malee, waan tanaan si irratti arka, ati jaalala dur qabdu gadi dhiiftee ti jirta.
[5] Ammaas eeysa irraa akka gadi kufte hubadhuu tii toowbadhu, hojii jalqaba duraa hojjachaa turte saniis hojjadhu! Yoo toowbachuu baatte ammoo, ani sitti dhufee tiin, qabduu ibsaa kee tii bakka isaa irraa niin buqqaasa.
[6] Haa tahu malee, waan gaarii takka ni qabda; isiiniis, hojii Niqolaawotaa taniin ani jibbu san atiis ni jibbita.
[7] “Namni gurra dhagayu qabu, waan Ruuhal Qudus waldoota kiristaanaa tiin jedhu haa dhagayuu! Warra moohuuf muka jannata Rabbii keeysa jiru, kan firii isaa nyaatanii jiraatan irraa akka nyaataniif mirga isaaniif niin kannaaf” tan jettuu dha.
[8] “Gara maleeykaa waldaya Simiirnaatti, ‘Ergaan tun tan isa duraa tii fi isa boodaa, kan du'ee, deebi'ee jiraate biraahi dhufte’ jedhii tii barreeysi!”
[9] Ergaaniis, “Rakkina si irra gahe, hiyyuma tee tiis niin beeka, ati ammoo taajira! Hanjamaa warri Yihudoota hin tahin, kanneen nuti Yihudoota ifiin jedhan si irratti godhan san ani niin beeka; warri nuti Yihudoota ifiin jedhan suniis jammaata Sheeyxaanaa ti.
[10] Rakkina dhihotti si irra gahuuf deemu kana hin sodaatin! Kunoo, Sheeyxaanni, fitinamtanii akka laalamtaniif jecha, isin keeysaa hanga tokko zabxiyyatti naquufi deema, guyyaa kudhan rakkachuufi deemtu; hamma du'atti illee taanaan isin warruma amanamoo anaaf tahaa, aniis badhaasa injifannoo teeysanii, gonfoo jireenyaa tiin isiniif kanna.
[11] “Namni gurra dhagayu qabu, waan Ruuhal Qudus waldayoota kiristaanaa tiin jedhu haa dhagayuu! ‘Warri moohu du'a lamadaa tiin hin miidhaman’” tan jettuu dha.
[12] “Gara maleeykaa waldaya Phergaamoonitti, ‘Ergaan tun isa kan habalee gara lamaaniin qara qabdu qabuu biraahi dhufte’ jedhii barreeysi!”
[13] Ergaaniis, “Ani bakka ati jirtu niin beeka, bakki sun lafa teeysoo Sheeyxaanaa ti. Ati ammoo maqaa kiyya jabeeysitee qabdee ti jirta, bara Antiiphaas raga-baatuun amanamaan kiyya isin jiddutti bakka Sheeyxaanni jiraatu sanitti ajjeefame illee, ati anatti amanuu hin dhiifne.
[14] Haa tahu malee, waaniin si irratti arke waa xiqqo ni jiru; namoonni kanneen barsiisa Bala'aamiin qabamanii tu isin jidduu jira. Bala'aam, Bala'aaq joollee Israa'el afajaanjeeysuuf gufuu isaan dura kaayee ti, qalma waaqayyolii tolfamaniif dhihaate akka nyaatanii fi, ammaas zinaas akka hojjatan gochisiisuu dhaani dilitti isaan naqe.
[15] Haaluma san fakkaatutti, warri barsiisa Niqolaawotaa fudhataniis isin keeysa ni jiru.
[16] Ammaas taanaan toowbadhu! Tana yoo didde ammoo, ani dafee tiin sitti dhufa; jarreen saniis habalee afaan kiyya keeysaa baatuuniin lolaani.
[17] “Namni gurra dhagayu qabu, waan Ruuhal Qudus waldoota kiristaanaa tiin jedhu haa dhagayuu! ‘Warra moohuuf maannaa dhooyfamte san keeysaahiin kannaafi; dhagaa adii maqaan haarayni irratti barreeyfame tokkoos niin kannaafi; maqaa saniis warruma fudhate malee, namni biraa tokko illeenuu hin beeku’” tan jettuu dha.
[18] “Gara maleeykaa waldaya Tiyaatiraatti, ‘Ergaan tun, tan Ilma Rabbii kan ija akka barbada ibiddaa qabuu, kan miilli isaa akka sibiila diimaa naziifamee walqisuu biraahi’ jedhii barreeysi!”
[19] Ergaaniis, “Ani hojii tee, jaalala tee tii fi amantii tee tiis niin beeka; warra biraa gargaaruuf if kannuu tee, obsaan dandayuu tee, hojii tee tan duraa irra tan ati amma hojjattu tun akka irra caaltuus niin beeka.
[20] Ammoo dubartittii Yezaabel jedhamtu, tan ‘Ani nabiyyii dha’ jettee if yaamtu, tan kaadamtoota kiyyaas akka zinaa godhan barsiiftee, ammaas qalma waaqayyolii tolfamanii akka nyaataniif isaan dogongorsiisaa jirtu san, caluma jettee dhiisuu tee si irratti arkee tiin jira.
[21] Ani, isiin dilii isii tii irraa akka toowbattuuf, wayta kannee tiifiin jira; isiin ammoo ejjummaa isii tii irraa deebi'uu hin barbaanne.
[22] Kunoo, ani akka isiin dhukkubsattee siree irra ciiftu niin godha, warra isiin wajji zinaa hojjatan ammoo, toowbatanii hojii isii irraa yoo deebi'uu baatan, rakkoo guddoo keeysattiin isaan darba.
[23] Joollee isii tiis dhawee tiin ajjeesa; hogguus waldayoonni kiristaanaa hundinuu, kan qalbii namaa tii fi yaada garaa namaa tiis xiinxalu, ana tahuu kiyya ni hubatu. Aniis ammaas hunduma keeysaniifuu matuma matatti akkuma hojii teeysaniititti isiniif kannuufiin taa'a.
[24] “Tiyaatiraa keeysatti warri haftan, kanneen barsiisa kana duuka hin bu'in, ammaas ‘Hiccitiin Sheeyxaanaa gadi fagoo dha’ barsiisa jedhaniin sanitti warra hin seenin irratti, ba'aa biraa godhee hin kaahu, isiniin jedha.
[25] Waan qabdan ammoo hangaan ani deebi'ee dhufu jabeeysaa tii qabadhaa!
[26] Nama moohuuf, kan fedha kiyya hanga dhumatti eegee hojjatuuf, saboota saba Israa'el hin tahin irratti amrii niin kannaafi.
[27] Inni ulee sibiilaa tiin saboota san bulcha, akka meeshaa suphee irraa tolfatamtetti isaan ni hurreeysa. Akkumaan ani Abbaa kiyya biraa amrii fudhadhetti,
[28] ani bakkalcha bariisaa isaaf niin kanna.
[29] Namni gurra dhagayu qabu, waan Ruuhal Qudus waldayoota kiristaanaa tiin jedhu haa dhagayuu!” tan jettuu dha.