[1] Eegas booda kunoo waan hedduu nama ajaa'ibsisu tokkoo tu samii keeysatti mullate; dubartii aduu uffattee, ji'a miillan isii jalaa qabdu, tan ammaas gonfoo urjii kudha lamaa, mataa isii irraa qabdu takkaa tu mullate.
[2] Isiin ulfa dhala geeyse turte; cimiimmuuniis cinqamtee ti iyyite.
[3] Ammaas waan biraa kan nama ajaa'ibsisu tokkoo tu samii keeysatti mullate; kunoo bineensa akka jawwee guddoo dhaa, diimaa akka ibiddaa, kan mataa torbaa fi gaanfa kudhan qabu, ammaas gonfoo torbaas matoota isaa torban irraa qabuu tu ture.
[4] Eegeen isaa urjoota samii keeysa jiran harka sadih keeysaa harka tokko haxooytee ti, lafatti gadi harcaafte. Bineensi akka jawwee suniis hogguu dubartittiin deeysu ilmoo isii liqimsuuf jecha, isii dahuuf dhihaatte dura dhaabbate.
[5] Isiiniis ilma dhiiraa kan saboota hundumaa huu siiqqee sibiilaa tiin tiysuuf deemu tokko deeyse; ilmi isii ammoo gara Rabbitti, gara arshii isaatittiis ol fuudhame.
[6] Dubartittiin ammoo gara lafa huffee gammoojjii, bakka Rabbi guyyaa kum tokkoo fi dhibba lamaa fi jahaatamaaf keeysa jiraattee, akka itti gargaaramtuuf qopheeyseefitti baqatte.
[7] Kana booda samii keeysatti lolli ka'e. Mikaa'el, maleeykoota isaa tiin wajjiin bineensa akka jawwee san irratti lola bane; bineensi akka jawwee suniis maleeykoota isaa tiin wajjiin deebisee ti isaaniin lole.
[8] Warri bineensaa ammoo ni moohaman, achiin booda isaa fi maleeykoota isaa tiifiis samii keeysatti bakki hin arkamneefi.
[9] Bineensi guddichi akka jawwee, bofni dur sun, kan Diiyaabilos, ammaas Sheeyxaanaas jedhame, kan biyya addunyaa hunda dogongorsiisuuf gara lafaatti gadi darbame; maleeykoonni isaa tiis isumaan wajjiini gadi darbame.
[10] Ani ammaas sagalee guddoo takkaan samii keeysaa dhagaye; isiiniis, “Kunoo, amma najaatni, humniti, mootummaan tan Rabbii keenyaa, ammaas amriin Masiihii isaa tiis dhuftee ti jirti; kasastuun obboleeyyan keenyaa, kan halkanii fi guyyaa Rabbii keenya duratti isaan kasasaa ture amma gadi darbamee ti jira.
[11] Obboleeyyan keenya ammoo dhiiguma hoolichaa tiin, ammaas qoowlii ragaa bahaniini isa moohan; hanga du'atti illee taanaan isaan lubbuu isaanii tiif hin mararfanne.
[12] Yaa bantiiwwan samii, isiniis warri isaan keeysa jiraattan gammadaa! Yaa dachii, yaa bahariis, Sheeyxaanni gara keeysanitti waan gadi bu'eef isiniif ammoo magan! Sheeyxaanni waytiin isaa gabaabduu akka taate waan beekuuf hedduu aaree ti jira!” jedhe.
[13] Bineensi akka jawwee sun gara lafaatti gadi darbamuu isaa hogguu arke, dubartittii ilma deeyse san arihutti ka'e.
[14] Dubartittiin ammoo boficha duraa gara lafa huffee gammoojjii, bakka bara sadihii fi walakkaa dhaaf waan ittiin jiraattu arkattu sanitti, akka barartuuf goblaan risaa guddichaa lamaa tu kannamaniifi.
[15] Hogguus jawwichi, bishaan afaan isaa keeysaa akka galaanatti yaa'see ti, dubartittii galaanni haa fuudhuuf jecha, isii duubaan jala gadi dhangalaase.
[16] Dachiin ammoo dubartittiif dirmattee ti; afaan banattee laga bineensi akka jawwee sun afaan isaa keeysaa yaase san gadi liqimsite.
[17] Hogguus bineensi akka jawwee sun dubartitti aaree ti, shanyii isii warra hafan kaan irrattiis duula kaasuufi deeme; isaaniis warra ajaja Rabbii eegan, kanneen ammaas Yesuusiif ragaa bahutti amanamoo tahanii turani.
[18] Bineensi suniis cirracha bahar moggaa jiru irra dhaabbate.