[1] Kana booddee ammaas, milikkita biraa guddaa nama ajaa'ibsisu tokkoon samii keeysatti arke; inni niis maleeykota torba warra balaa gara dhumaa torban if harkaa qabanii tu ture; lolli Rabbii isaan kanaan waan raawwatamuuf jecha, isaan balaa gara xumuraa ti jedhaman.
[2] Ammas kunoo waan akka bahar daawwitii kan ibiddaan walitti makame fakkaatu tokkoon arke. Akkasumatti ammaas warri bineensaa fi bifa fakkeenya bineensaa, ammaas lakkooysa maqaa isaa tiif dhaabbatu irrattiis injifannoo arkatan, kiraara Rabbi isaaniif kanne harkatti qabatanii, bahar daawwitii san cinaa dhadhaabbachaa ti turan.
[3] Isaan faarfannaa Musee gabricha Rabbii, faarfannaa hoolichaa tiis, “Yaa Rabbi Gooytaa hundumaa huu dandeeysu, hojiin tee guddoo dha, ajaa'ibsiftuusi! Ati yaa mootii saboota hundumaa, karaan kee hundinuu qaceelaa dha, dhugaa dhaasi!
[4] Yaa Gooytaa! Namni si hin sodaanne, maqaa kee tiis kan hin kabajne eenyu? Suma qofaa tu qulqulluu dha; sabni hundinuu ni dhufu, siifiis ni sagadu; gochi kee qaceelaaniis mullifamee ti jira!” jechaa ti faarfatu turan.
[5] Kana booddee ammaas waan biraatiin arke; Beeytal Maqdas samii irraa banamee, kan dukkaanni ragaa keeysa jiruun arke.
[6] Maleeykoonni torban warri balaa torban harkaa qaban sun, uffata hariira adii walaqqisu uffatanii, qoma isaanii tiis waraansillee ziqeeyaa tiin hidhatanii, Beeytal Maqdas san keeysaahi gadi bahan.
[7] Uumama lubbuu qaban afran keeysaa tokko, qoriilee ziqeeya irraa tolfaman torba, kanneen lola Rabbii bara baraaf jiraatuun guutamani, maleeykota torbaniifi kanne.
[8] Beeytal Maqdas saniis aara durrii ulfina Rabbii tii fi ammaas amrii isaa tii irraa ka'uuni guutame; hanga balaan torban maleeykonni torban fidan sun raawwatamanitti, eenyu illeenuu Beeytal Maqdas san seenuu hin dandeenye.