[1] Kana booda bantii samii haarayaa fi dachii haarayaan arke; samiin duraa tii fi, dachiin duraa tiis dabranii ti jiru, bahariis deebi'ee hin arkamu.
[2] Yerusaaleem mandarri qulqulluun haarayni, Rabbi biraa bantii samii keeysaa, akka aruuztittii uffattee jaarsa isii tiif qophooytetti tan gadi dhufaa jirtuun arke.
[3] Sagalee guddoo takka tan arshii irraa akkana jettee dubbattuun dhagaye, “Kunoo, amma bakki teeysuma Rabbii namootuma jidduu taatee ti jirti; inni isaan jidduu dha jiraata, isaaniis ummata isaa ti tahu. Rabbi matummaan isaa tuu isaaniin wajjiin taha, inni Rabbii isaanii ti taha.
[4] Rabbi imimmaan hundaa huu ija isaanii irraa haqa; wanni kanneen dur turan waan dabarteef jecha, eegana duuti hin jirtu, naasuun, booyuun, laalaaniis asii achi hin hafne” jette.
[5] Ammaas inni arshii irra taa'ees, “Kunoo, ani waan hundumaa huu haarayaan godha!” jedhe. Itti dabaluuniis, “Qoowliin tun amanamtuu fi dhugaa waan taateef jecha, kana barreeysi!” naan jedhe.
[6] Ammaas, “Raawwatamee ti jira! Ani Alfaa dha, Ani Omeegaa dhaasi, isa jalqabaa ti, isa dhumaa tiisi. Ani nama dheeboteef, burqaa bishaan jireenya kannu irraa, bilaashumattiin kannaafi.
[7] Warri obsaan dandayanii moohan kana arkatu; ani Rabbii isaanii tiin taha, isaaniis joollee tiyya naaf tahu.
[8] Qoodni warra luynootaa, warra amantii hin qabnee, warra najifamoo, warra nama ajjeesuu, warra zinaa godhuu, warra falaanfala namatti godhuu, warra waaqayyolii tolfamaa ibaaduu, akkasumatti kan warra kijiboo hundinuu, hara ibidda danyoon bobawuu keeysa taha. Tuniis du'a lamadaa ti” naan jedhe.
[9] Eegasii, maleeykoota torban warra qorii torba kanneen balaa gara dhumaa torban keeysa guutan if harkaa qaban turan keeysaa, tokko anatti dhufee ti, “Koottuu tii, aruuztittii, jaartii hoolichaa tiin si agarsiisaa!” naan jedhe.
[10] Ruuhaa dhaaniis maleeykichi ol na fuudhee ti, gaara guddaa dheeraa tokko irra na geeyse. Yerusaaleem magaalaa qulqullittii Rabbi biraa bantii samii keeysaa gadi buutuus ana agarsiise.
[11] Isiin ulfina Rabbii ti qabdi, walaqqisni isii tiis akka lu'ulu'aatti ibsa, akka Yaasphis, akka cabbii aduu keeysaa tiisi.
[12] Dallaya darbii kan hedduu dheeraa tahe qabdi turte, dallayni niis karra kudha lama qaba; karreen san irraas maleeykoota kudha lamaatu ture. Karran gubbatti maqaan gosa joollee Israa'el kudha lamaantu barreeyfamee jira.
[13] Karaa bahaa tiin karra sadih, karaa kaabaa tiin karra sadih, karaa kibbaa tiin karra sadih, karaa dhihaa tiiniis karra sadihii tu ture.
[14] Bu'urri dallayni darbii sun irratti ijaarame dhagaa kudha lama, kanneen irratti maqaa kudha lamaan ergamoota hoolichaa katabamanii ti jiru.
[15] Maleeykichi anatti dubbatees, magaalaattii, karra isii tii fi dallaya isii tiis dhuundhuma dhawuuf, ulee ziqeeya irraa tolfamte takka qaba ture.
[16] Mandarri jihaa afraniinuu waluma qixa, dheerinni isaa tii fi bal'inni isaa tiis waluma qixa ture. Maleeykichi niis ulee isaa tiin mandarticha dhuundhuma dhawe; cinaachi isaa kiilo metrii kuma lamaa fi dhibba afur tahe; dheerinni isaa, bal'inni isaa, ammaas dhaabbanni isaa tiis waluma qixa ture.
[17] Dallaya isaa tiis dhuundhuma dhawe; inni niis akka dhuundhuma namaatti kan maleeykichi itti fayyadameetti, dhuundhuma dhibbaa fi afurtamii afur tahe.
[18] Dallayni isaa dhagaa Yaasphis irraa hi hojjatame; mandartichi ammoo ziqeeya aslii akka daawwitii qulqulluu taheeni ijaarame.
[19] Bu'urri dallaya magaalaa sanii, dhagaa lu'ulu'aa adda addaa tiin miidhagfamee ti ture. Bu'urri duraa dhagaa Yaasphis, inni lamadaa Safiiros, inni sadeeysaan Kaalqedon, inni afreeysaan Simaaragidosi.
[20] Inni shaneeysaan Sardoniikis, inni jaheeysaan Saardiyon, inni torbeeysaan Kirisoliixos, inni saddeeteysaan Beerilos, inni sayleeysaan Tophaaziyon, inni kurneeysaan Kirisophraasos, inni kudha tokkeeysaan Hiiyaakinxos, inni kudha lammeeysaan Ametiisxosi ture.
[21] Karreen kudha lamaan lu'ulu'a kudha lama turan, karreen suniis adduma addaan lu'ulu'a tokko irraa hojjataman; karaan magaalaa sanii ziqeeya aslii akka daawwitii irraahi hojjatame.
[22] Beeytal Maqdas isaa, Rabbi Gooytaa hundumaa dandayuu fi hoolicha waan tureef jecha, magaalaa san keeysatti ani Beeytal Maqdas hin agarre.
[23] Magaalicha aduunii fi jiini akka ibsaniif hin barbaachifne; durriin ulfina Rabbii ifaa isii ti, hoolichi niis ibsaa isii ti!
[24] Saboonni ifa isaa tiini deddeebi'u, mootoonni biyya addunyaa tiis faaya ulfina isaanii gara magaalaatti fidu.
[25] Karreen isaa guyyaa itti cufaman gonkumaa hin qaban, halkan ammoo achi hin jiru.
[26] Wanni ulfina qabu, faaya saba biyya addunyaa bira jiruus gara magaalaatti fidamu.
[27] Kitaabticha hoolichaa kan warri jireenya arkachuuf deeman keeysatti barreeyfaman san keeysatti, warra arkaman qofa malee, wanni najisni takka illeen, warri waan hamtuu dalagan, yookiin warri kijiboon tokko illeen achi hin seenan.