[1] Kana booddee maleeykichi laga bishaan jireenya namaaf kannu, kan bishaan isaa xaliila akka cabbiitti addaatu, arshii Rabbii tii fi ammaas tan hoolichaa irraa burqu na agarsiise.
[2] Karaa magaalichaa walakkaa, bishaantu yaa'a; laga gamaa fi gamanaas muka jireenya namaaf kannu tokkoo tu dhaabbata; mukni kun amatatti wayta kudha lama firii kanna, ji'a ji'aan firiin irraa arkama; baalli muka sanii tiis saboota biyya addunyaa kan aafihu.
[3] Wanni abaarame takka illeenuu achitti hin arkamtu; arshiin Rabbii tii fi tan hoolichaa tiis mandaruma san keeysa taha, kaadamtoonni isaa tiis isuma ibaadu.
[4] Isaan fuula Rabbii ni arku, maqaan isaa tiis adda isaanii irratti katabama.
[5] Halkaniis achiin booda hin jiraatu; Rabbi Gooytaan ifa isaanii waan tahuuf jecha, ifni ibsaa dhaa yookiin ifni aduu tiis isaan hin barbaachisu. Isaan bara baraaf mootomuuf taa'u.
[6] Hogguu san maleeykichi, “Qoowliin tun hundinuu amanamtuu dha, dhugaasi; Rabbi Gooytaan inni ruuhaa nabiyyoonni ittiin dubbatan ajaju, wanta dafee tahuun irra jiru kaadamtoota isaatitti agarsiisuufi maleeykaa isaa erge” naan jedhe.
[7] Yesuus, “Kunoo, ani dafee tiin dhufa, namni qoowlii kitaaba kana keeysatti raajii dubbatamte kana eegu, akkaan eeybifamaa dha!” jedhe.
[8] Aniis Yohannis, kan kanneen hundumaa arkee dhagayees, kanneen dhagayuu fi arkuus eegaan raawwadhee booda, maleeykicha kana hundumaa anatti agarsiiseef sagaduufiin miila isaa jalattiin kufe.
[9] Inni ammoo, “Akkana godhuu hin qabdu! Ani bar sii fi obboleeyyan kee tiif, nabiyyootaa fi warra qoowlii kitaaba kanaa eeganiifiis gola kaadamtoota Rabbii ti; ati ammoo Rabbumaaf sagadi!” naan jedhe.
[10] Itti dabalee tiis, “Barri kun raawwatamuuf waan dhihaateef jecha, qoowlii kitaaba kana keeysatti raajii dubbatamte sumudan hin cufin!
[11] Namni jallaan, jallinuma isaa ti itti fura; najisa kan tahees, najisummatti jiraata; kan keeyraata hojjatuus, keeyraatuma haa dalaguu; kan qulqulluu tahees, qulqullummaa itti haa furuu!” jedhee ti anatti hime.
[12] Yesuus ammoo, “Kunoo, ani dafee tiin dhufa, isaan hundumaafuu adduma addaan, akkuma dalagaa isaaniititti kafaluuf ujuraa ifiin wajji fuudhee tiin dhufa.
[13] Ani Alfaa, ani Omeegaa dha, kan duraa, ammaas kan boodaa tiisi, kan jalqabaa, ammaas kan dhumaa tiisi” jedhe.
[14] Warri uffata isaanii miicanii naziifeeysan haa gammadanii! Isaan muka jireenya namaaf kannu irraa nyaachuuf, warra mirga qabu; karreen saniiniis mandaricha ni seenu.
[15] Ammoo warri najisni, warri falfala namatti godhu, warri zinaa godhu, warri nama ajjeesu, warri waaqayyolii tolfamoo ibaadu, warri kijiba jaalatan hundi niis alatti hafu.
[16] Yesuus ammaas, “Wanni kun hundinuu waldayoota kiristaanaa akka gahuuf jechaan, ani maleeykaa kiyya ergee isiniif ragaa baasisee tiin jira. Ani dhaloota abaabuu Daawwidi, shanyii isaa tiisi, ani bakkalcha bariisaa walaqqisaa ti” jedhe.
[17] Ruuhaanii fi aruuztittiiniis, “Koottu” jedhu; namni tana dhagayuus, “Koottu” haa jedhu! Namni dheebote haa dhufuu, namni bishaan barbaaduus bilaashumatti bishaan jireenya kannu haa fudhatuu!
[18] Ani Yohannis namtichi kana barreeyse, nama qoowlii raajii kitaaba kana keeysatti dubbatamte dhagayuun, jabeeysee tiin if eeggachiisa. Namni qoowlii tana irratti waa dabale, Rabbi iqaabaa isaa irratti, ammaas balaa kitaaba kana keeysatti barreeyfaman isa irratti dabaluufi taa'a.
[19] Namticha qoowlii raajii dhaa, tan kitaaba kana keeysatti dubbatamte irraa waa irrise ammoo, Rabbi muka jireenya kannuu fi magaalaa qulqulluu kanneen waa'een isaanii kitaaba kana keeysatti barreeyfaman keeysaa qooda isaa irrisuuf taa'a.
[20] Inni waan kanneen hundumaaf ragaa bahees, “Haa tahu! Ani dafee tiin dhufa” jedha. Aammiin! Koottu, Gooftaa Yesuus!
[21] Ni'imaan Gooftaa Yesuus hundumaa wajjiin haa taatu!