[1] “Gara maleeykaa waldaya Saardesitti, ‘Ergaan tun, isa ruuhaanota Rabbi kaadaman torbaa fi urjoota torbaas qabu biraa dhufte’ jedhii barreeysi!” Ergaaniis, “Ani hojii tee niin beeka, maqumaafi jiraataa jedhamtee yaamamta malee, ati nama du'aa dha.
[2] Dammaqii ka'ii tii! Hammuma hafe kan du'uu bira gahe san jajjabeeysi! Ani fuula Rabbii kiyyaa duratti hojiin tee fiinxaan bahuu isii hin agarre.
[3] Eegasuu ammaas, waan dhageeysee fi fudhatte san yaadadhuu eegii, toowbadhu! Yoo dammaqaa tahuu baatte ammoo, ani akka hattuun dhuftuttiin dagutti dhufaa, waytaan ani sitti dhufuus gonkumaa hin beeytu!
[4] Haa tahu malee, amma illee Saardes keeysaa namoota muraasa warra uffata isaanii odoo hin najisin jiran ni qabda. Isaan kun uffata adii uffatanii, anaa wajjiin deddeemuufi taa'u; isaan warra kanaan malani.
[5] Warra moohuuf akkasumatti uffata adiitu uwwifama; ani Kitaaba Jireenyaa, kan warri jireenya arkachuuf deeman keeysatti barreeyfaman keeysaa maqaa isaanii hin balleeysu; Abbaa kiyya duratti, maleeykoota isaa durattiis, maqaa isaanii yaamee tiin, kiyya tahuu isaanii beeysisa.
[6] “Namni gurra dhagayu qabu, waan Ruuhal Qudus waldayoota kiristaanaa tiin jedhu haa dhagayuu!” tan jettuu dha.
[7] “Gara maleeykaa waldaya Filaadelfiyaatti, ‘Ergaan tun tan isa qulqulluu, kan dhugaa, kan maftaa Daawwid if harkaa qabu, kan waan inni banu namni tokko illeen cufuu hin dandeenye, waan inni cufuus namni tokko illeen banuu hin dandeenye san biraa dhufte’ jedhii barreeysi!”
[8] Ergaaniis, “Ani hojii tee niin beeka; ati humna xiqqoo dha qabda, ammoo qoowlii tiyya eeydee ti jirta, maqaa kiyyaas hin kaadne. Kunoo, ani balbala banamaa, kan namni tokko illeenuu cufuu hin dandeenye, fuula kee dura kaayee, siif kannee tiin jira.
[9] Kunoo, ani warra jammaata Sheeyxaanaa keeysaa Yihudoota odoo hin tahin, kijibaan nuti Yihudoota ifiin jedhan san sittiin kanna. Kunoo, isaan dhufanii miila kee jalatti akka kufanii fi, ammaas ani si jaalachuu kiyyaas akka beekaniin godha.
[10] Ati, qoowlii tiyya tan obsaan dandayi jettu waan eeydeef jecha; eegasuu aniis za'aa fitinaa tan guutummaa biyya addunyaa irratti dhuftee namoota lafa irra jiraatan hundumaa fitinuuf dhuftu jalaa akka baatu siin eega.
[11] Aniis daddafee tiin dhufaa jiraa; nam tokko illeenuu gonfoo moohicha kee tii si duraa akka hin fudhanne, waan harkaa qabdu jabeeysii tii eeggadhu!
[12] Nama moohu, Beeytal Maqdas Rabbii kiyyaa keeysattiin isa utubaa godha; achi keeysaahiis gonkumaa deebi'ee hin baafamu. Maqaa Rabbii kiyyaa, maqaa magaalaa Rabbii kiyyaa Yerusaaleem haaraya tan Rabbii kiyya biraa samii keeysaa gadi buutuu fi, maqaa kiyya haarayaas isa irrattiin kataba.
[13] “Namni gurra dhagayu qabu, waan Ruuhal Qudus waldayoota kiristaanaa tiin jedhu haa dhagayuu!” tan jettuu dha.
[14] “Gara maleeykaa waldaya Laa'odiiqeyaatti, ‘Ergaa tana isa “Aammiin” jedhamu, raga-baatuu amanamaa dhugaaf ragaa bahu, kan madda waan Rabbi uume hundumaa tahee sanii tu erge’ jedhii katabi!”
[15] Ergaaniis, “Ani hojii tee niin beeka; hojii tee keeysatti ati oowwaa yookiin qabbanaawaas hin taane; oowwaa yookiin qabbanaawaa odoo taatee irra wayya ture!
[16] Ati ammoo buhaawaa dha; ati qabbanaawaa yookiin oowwaa waan hin tahiniif jecha, ani afaan kiyya keeysaa si tufuu bira gahee tiin jira.
[17] “Atiis, ‘Ani sooreysa, diinaggees walitti qabadhee tiin jira, wanni natti irrate hin jiru’ jetta; ati nama gad-galoo, kan booyuun barbaachisuufi, yaa deegaa, jaamaa, qullaa saaxil tahuu kee if hin beeytu.
[18] Ani ammoo akka ati ziqeeya aslii ibiddaan naziifame ana irraa bitattee taajiroomtuu fi, ammaas qullaa taatee satrii dhabuun tee akka hin mullanneef, uffata adii, ammaas arkuu akka dandeeysuuf kuula ijatti naqattuus anuma irraa bitadhuun si gorsa.
[19] Warraan jaaladhu hundumaa balleeysaa isaanii ittiin hima, niin ibraanaasi; eegasuu itti yaadii tii toowbadhu!
[20] Kunoo, ani balbala dura dhaabbadhee tiin hulaa dhadhawa; namni sagalee tiyya dhagayee balbala yoo anaaf bane, ani ol niin seena, isaan wajjiiniis maadditti niin dhihaadha, inni niis anaa wajjiin ni nyaata.
[21] Akkumaan ani ifii moohee Abbaa kiyya wajjiin arshii isaa irra taa'e kanatti, namticha moohu anaa wajjiin arshii tiyya irra akka taa'uuf mirga niin kannaafi.
[22] “Namni gurra dhagayu qabu, waan Ruuhal Qudus waldayoota kiristaanaa tiin jedhu haa dhagayuu!” tan jettuu dha.