[1] Kana booddee ani ilaallaan, kunoo samii keeysa balbala banamtuu takkaa tu ture. Sagaleeniin duraan dhagaye tan akka garriitti anatti dubbattu takka, “As ol koottu, aniis waan kana booddee tahuun irra jiruun si agarsiisa!” jette.
[2] Hogguusumaan ani Ruuhaan guutame; kunoo, arshiin takka samii keeysa dhaabbattee, inni tokkoos irra taa'ee ti ture.
[3] Inni arshii irra taa'ees akka lu'ulu'a dhagoota Yaasphisii fi Saardiyonitti walaqqisee ti mullata ture; naannawa arshichaa tiis sabbata-gaaloo kan lu'ulu'a aslii Simaaragidos jedhamu fakkaatuu tu ture.
[4] Arshitti naannawanii arshoota biraa diiydamii afurii tu ture; isaan irraas manguddoonni diiydamii afur tattaa'anii ti turan. Manguddoonni kun ammoo uffata adaadii uffatanii, matattiis gonfoowwan ziqeeyaa kaayatanii ti turan.
[5] Arshii irraa walaqqisa hangaasuu tii fi ammaas didirrisa sagalee mandiisuu tu baha ture; arshii fuula dura ibsaaleen torba ni belbelu turan; isaaniis ruuhaanota torban Rabbi kaadamani.
[6] Akkasumatti ammaas arshicha fuula dura, waan akka bahar daawwitii fakkaatu, walaqqisaa akka culunqee tu ture. Naannawa arshichaa cinaachan isii hundumaanuu uumama lubbuu qaban afurii tu ture; isaaniis fuula duraa fi duuyda duubaaniis ija hedduu dha qabu turan.
[7] Uumamni lubbuu qabu sun inni duraa leenca fakkaata ture; inni lamadaa dibicha fakkaata ture; inni sadeeysaan fuula akka namaa ti qaba ture; inni afreysaan risaa bararu fakkaata ture.
[8] Uumamni lubbuu qaban afranuu, matumatti goblaa jaha jaha qaban; keeysaa fi duubaaniis ijaatu itti tarrifamee waliin gahe. Halkanii fi guyyaas odoo gargar hin kutin, “Rabbi Gooytaan kan hundumaa dandayu, kan duriis ture, kan ammaas jiru, kan dhufuuf deemuus, qulqulluu dha, qulqulluu dha, qulqulluu dha!” jechaa ti faarfatu.
[9] Uumamni lubbuu qaban kanneen isa arshii irra taa'e, kan bara baraaf jiraatu saniif guddina, ulfinaa fi hamdiis ni dhiheeysu turan.
[10] Wayta tanattiis manguddoonni diiydamii afran, isa arshii irra taa'e, kan bara baraaf jiraatu saniif gombifamanii ti sujjuudu; gonfoowwan isaanii tiis arshicha dura kaayanii ti faarfatu.
[11] Hogguus, “Ati waan hundumaa waan uumteef, isaaniis fedha kee tiin waan uumamaniif, waan jiraataniifiis Gooytaa keenya, Rabbii keenya, guddina, ulfinaa fi, amriis fudhachuun siif gaha” jedhu.