[1] Ani Yihudaan, gabrichi Yesuus Kiristoos, obboleeysi Yaaqoob, isin warra yaamamtanii, Rabbi Abbaan jaalatamtanii, Yesuus Kiristoosiin eegamtaniifiin xalayaa tana barreeysa.
[2] Araarri, nagayni, jaalalti niis isiniif haa hoddommaatu!
[3] Yaa saahibban koo! Waa'ee najaata wajjiin qabnuu ilaalchisee isiniif katabuuf hamilaa tiin ture; haa tahu malee, amma hatattamaan isin amantii Rabbiin hoggu takka bara baraaf ummata isaa tiif kanne saniif qabsooytanii akka dhaabbattaniif, isiniif katabuun dirqama anatti tahee ti jira.
[4] Warri dur yakkamuuf herregaman, hulluuqanii isin keeysa seenanii ti jiru. Jarri kun warra Rabbi hin beeyne, warra ni'imaa Rabbii keenyaa akka hin taanetti jijjiiranii, ma'anaa ni'imaa waliin dhawaa, Gooftaa keenya Yesuus Kiristoos, kan kophaa isaa Gooftummaa qabuus warra kaadani.
[5] Isinuu, waaniin ani amma isin yaadachiisuu kajeelu kanneen hundumaa huu warra qaceellotti beeku. Kuniis Gooytaan ummata isaa, biyya Misraa keeysaa eewalee akka baase, booddee ammoo warra amanuu didaniis akka turaab godhe ni yaadattu.
[6] Rabbi, maleeykoota warra angoo isaanii hin eegin, kanneen ammaas bakka teeysuma isaanii gadi dhiisan san shanshalata bara baraa tiin boolla bililee dukkanaa keeysatti hidhee, firdii guyyaa guddaa dhaa eegaa akka jiran yaadadhaa!
[7] Mandaroota Sodoomii fi Gomoraa, ammaas warra mandaroota naannoo sanii tiis hin irraanfatinaa! Ummanni sun akkuma kanneenitti halalummaa keeysa kutanii, ejjummaan waan hin fakkaanne hunduma keeysa jasadaan deemaa ti turan. Isaan adaba ibidda bara baraa fudhachuu dhaan, waan namoota akkasii irratti dhufuuf taa'u agarsiisuuf fakkeenya godhamanii ti jiru.
[8] Ammaas akkasumatti warri hulluuqanii isin jidduu galaniis, yaada manaama keeysatti arkaniin jasada ni najisu, aangoo Rabbi isaan irratti qabuus fudhachuu dha didu; warra samii irraa kanneen ulfina qabaniis ni arrabsu.
[9] Mikaa'el alaqaan maleeykootaa illeen, wayta reefka Musee irratti Sheeyxaanaan walitti falamanii wal lolan, “Gooytaan siin haa lolu!” isaan jedhe malee, arrabsee maqaa isa balleeysee firdii irratti dabarsuuf ija hin jabaanne.
[10] Isaan kun garuu waanuma hubachuu dadhaban hundumaa huu ni arrabsu; ammoo akka saawa yaadaan waa gargar hin baafannetti baa'imummaa uumamaa tiin yaaduu dhaani badu.
[11] Isaaniif magan! Isaan karaa Qaayyin irra deemaa ti jiru, faaydaa horii arkachuuf jecha dogongora Bala'aamitti if gadi dhiisanii ti jiru; ammaas mormii Qoraahi Rabbi irratti kaaseen ni dhabamu.
[12] Jarri kanneen warra qaanii hin qabne, ammaas isaan hiraata jaalalaa keeysanitti dhihaatanii nyaachuuf warra duubatti hin deebine aybii dha isinitti tahu. Isaan garaa isaanii qofaaf yaadu; isaan akka duumeeysa rooba hin qabne, kan qilleensaan oofamuu ti; akka muka manziila silaa firii itti kannitutti, firii dhabee ti; akka muka hundee dhaan buqqa'ee goggogee horqee ti.
[13] Akkuma bahar wal dhawee hoomacha baasutti, isaaniis hojii isaanii tan nama if qaanfachiiftu akka hoomacha sanitti ol baasu; isaan akka urjiilee golollee isaanii keeysaa bahanii dukkanti cillimiin bara baraa isaaniif herregamtee ti jirti.
[14] Henook Aadamii jalqabee dhaloota torbeeysaa dha ture; inni waa'ee isaan kanaa raajii wayta dubbatu, “Kunoo, Gooftaan kumaatama qulqulloota isaa tiin wajjiini dhufa!
[15] Inni nama hundumaa irratti firdii godhuuf taa'ee, waan warri Rabbi-dhablummaan jiraatan haala akkasii keeysatti hojjatan hundumaa, jechoota arrabaa kanneen dilaawoonni warri Rabbi dhablummaan jiraatan isa irratti dubbatan hundumaa, dirretti baasee amansiisee ti, namayyuu irrattuu addumaani firdii dabarsa” jedhe.
[16] Jarri kanneen warra guungumu, warra niis alaan'alu, akka kajeellaa hamtuu isaaniititti jiraatu, afaaniin hedduu dha if dhaadatu, isaan warra namoota waa irraa arkachuuf abdatan tanuma kijibaa faarsuu dha.
[17] Isin garuu saahibban koo, qoowlii ergamoonni Gooftaa keenyaa Yesuus Kiristoos kanaan dura dubbatan yaadadhaa!
[18] Isaan, “Zamaan-aakir qishna-gootuun warri Rabbi-dhablummaan akka kajeellaa jasada isaaniititti jiraatan dhufuufi deemu” jedhanii isinitti himanii ti jiru.
[19] Warra dhufan kanaatu gargar bahuu isin jiddutti fida, yaada jasadaa tiif ni oggolu, Ruuhaa Rabbii tiis if keeysaa hin qaban.
[20] Isin garuu saahibban koo, amantii teeysan tan hundumaa irra caalaa qulqulluu taate irratti ijaaramaa tii jabaadhaa! Ruuhal Qudusiin geggeeyfamaa kadhadhaa!
[21] Jaalala Rabbii keeysatti if eegaa; araara Gooftaan keenya Yesuus Kiristoos, jireenya bara baraa tiin itti isin geeysu eeggadhaa!
[22] Warra shakkii irra jiraniif, rahamata agarsiisaa!
[23] Warra kaan, ibidda keeysaa butaatii eewalaa! Warra hafan ammoo, uffata isaanii kan si'oo dilaawaa isaanii tiin najifame san balfaa, mataa keeysaniif sodaachaa isaaniif ammoo rahamata agarsiisaa!
[24] Rabbummaan dandayaan, kufuu irraa isin haa eegu, gammachuu guddoon, illaa takkaan maletti, ulfinaan fuula isaa dura dhaabbachuu isin haa dandeeysisu.
[25] Rabbi naja-baasoo keenya tokkichaaf karaa Gooftaa keenyaa Yesuus Kiristoosiin ulfinni, guddinni, amriin, gooftummaaniis uumamuu waytaa duraa jalqabee, ammaas, bara baraafiis isumaaf haa tahan. Aammiin.