[1] Uleen akka ulee dhuundhumaan dhawanii takka anatti kannamte; hogguus inni tokko, “Ka'ii tii Beeytal Maqdas Rabbii bakka aarsaa tiis dhuundhuma dhawii, namoota achitti sagadaniis lakkaawi!
[2] Ammoo abaada Beeytal Maqdas dhuundhuma hin dhawin, inni haa hafuu! Abaadni saba qomoo Israa'el hin tahiniif waan kannameef jecha, isaaniis hanga ji'a afurtamii lamaa tiif magaalaa qulqulluu san miilaan irra yaa'anii balleeysuufi taa'u.
[3] Ragoonni kiyya lamaanuu uffata gaddaa uffatanii, guyyaa kum tokkoo fi dhibba lamaa fi jahaatamman san raajii akka dubbataniin godha” anaan jedhe.
[4] Isaan kanneen muka ejersaa lamaanii fi qabduu ibsaa lamaan kanneen Rabbi Gooytaa biyya addunyaa dura dhadhaabbatani.
[5] Eenyu illeen isaan miidhuu barbaannaan, ibiddumaa tu afaan isaanii keeysaa bahee diina isaanii fixa; eegaa eenyu illeen isaan miidhuu barbaannaan, haaluma kanatti ajjeefamuun isaa hin hafu.
[6] Jarreen kun lamaan wayta raajii dubbatan, roobni akka hin roobne samii cufuuf warra amrii qabu; bishaan dhiigatti jijjiiruufiis amrii ni qabu; ammaas biyya addunyaa dhaa balaa adda addaa tiin, wayta barbaadan dhawuufiis amrii warra qabu.
[7] Hogguu isaan ragaa bahanii fixatan, bineensi boolla lafa jalaa tan hoonga hin qabne san keeysaa bahee, duula isaan irratti ni kaasa; isaaniis moohee ti ajjeesa.
[8] Reefki isaanii tiis magaalaa guddicha gooftaan isaanii duraan itti fannifame keeysatti karaa gubbatti arkamuufi taa'a; mandarri suniis fakkeenya Sodoomii fi kan Misratti yaamama.
[9] Nama hundumaa keeysaa, gosa hundumaa keeysaa, afaan hundumaa keeysaa, saba hundumaa keeysaa warri dhufan, guyyaa sadihii fi walakkaa dhaaf reefka isaanii lafatti ilaalu malee, awwaalamuu itti hin dhiisan.
[10] Warri biyya addunyaa irra jiraatan du'a jara lamaanii kanatti ni gammadu, gammachuuniis badhaasa waliif kannu; sababni isaa tiis, nabiyyoonni lamaan sun ummata biyya lafaa irratti, cinqii hedduu waan fidaniif jecha ture.
[11] Guyyaa sadihii fi walakkaa booddee ammoo, Ruuhaan jireenya kannu Rabbi biraa dhufee, nabiyyoota du'an san keeysa seene. Isaaniis ka'anii ti dhaabbatan; warri isaan arke hundinuu hedduu dha sodaatan.
[12] Hogguus nabiyyoonni lamaan sun samii keeysaa sagalee guddoo tan, “As ol koottaa!” jettee isaan yaamtu takka dhagayan. Isaaniis diinni isaanii tiis oduma arkanii ti, duumeeysa keeysa gara samiitti ol bahan.
[13] Wayta san dachiin hedduu dha sossoote; mandarri niis harka kudhan keeysaa harki tokko ni jijjige. Namoonni beekamoon kumni torbaas sossooha lafaa saniin ajjeefaman, warri hafan ammoo sodaatanii ti Rabbi Gooytaa samii tiif ulfina kannan.
[14] Maganiin lamadaa dabartee, maganiin sadeeysaan kunoo daftee ti dhufa jirti.
[15] Kana booddee maleeykaan torbeeysaan garrii isaa ni afuufe. Samii keeysaa ammaas sagaleen guddoon, “Mootummaan biyya addunyaa tan Gooytaa keenyaa, tan Masiihii isaa tiis taatee ti jirti; inni bara baraaf ni mootoma” tan jettuu tu dhagayame.
[16] Manguddoon diiydamii afran, warri fuula Rabbii dura arshii isaanii irra tattaa'an, adda isaanii tiin lafa gayanii ti Rabbiif sagadan.
[17] Isaaniis, “Yaa Rabbi, Gooytaa hundumaa dandeeysu, kan jirtu, kan jiraattees, humna tee guddoo fudhattee waan mootomteef, hamdii dha siif dhiheeysina!
[18] Saboonni Rabbi hin beeyne ni aaran, ammaas wayti lola kee tii geeysee ti jirti; wayti warri du'an firdii itti arkataniis geeysee ti jirti; wayti kaadamtoonni kee Nabiyyoonni, warri qulqulloonni kee tii fi warri si sodaatan xiqqaa fi guddaaniis, badhaasa isaanii wayti itti arkataniis geeysee ti jirti; wayti warri biyya addunyaa balleeysan itti balleeyfamaniis geeysee ti jirti” jedhan.
[19] Kana booddee Beeytal Maqdas Rabbii kan samii keeysaa sun banamee, sanduuqni irbuu tiis Beeytal Maqdas isaa keeysatti mullatee arkame; hogguus hangaasuun ni hangaate, niis ni didirrise, mandiisuuniis wal jalaa qabde; dachiin ni sossoote, hancabbiin gurguddooniis ni buute.