[1] Kana booddee sagalee guddoo namoota dila hedduu dhaa samii keeysaa gootuun dhagaye; isiiniis, “Haalleluyaa! Najaatni, guddinninii fi amriin tan Rabbii keenyaa ti!
[2] Firdiin isaa dhugaa fi qaceelaa waan taateef, inni gumnaa guddittii, tan zinaa isii tiin biyya addunyaa balleeysite san irratti firdii godhee ti jira; dhiiga kaadamtoota isaa kan isiin dhangalaafteef adabee haluu irraa bahee ti jira” jechaa ti turte.
[3] Ammaas itti dabalanii, “Haalleluyaa! Aarri magaalattii gubattu san irraa bara baraaf ol ni ka'a” jedhan.
[4] Manguddoonni diiydamii afran, uumamni lubbuu qaban afraniis gadi gombifamanii, Rabbi kan arshii irra taa'eef sagadanii, “Aammiin, haalleluyaa!” jedhan.
[5] Sagaleen takka ammaas arshii irraa baate, “Isin warri kaadamtoonni isaa hundinuu, isin warri isa sodaattaniis, xiqqaa fi guddaaniis Rabbii keenya galateeyfadhaa!” jette.
[6] Kana booddee ammaas waan akka sagalee namoota hedduu dhaa, tan akka gooha bishaan hedduu tii fi didirrisa mandiisuu guddoo takkaan dhagaye; isiiniis, “Haalleluyaa! Gooytaan keenya Rabbi, inni hundumaa dandayu mootome.
[7] Koottaa tii, gammachuu dhaan ililchaa! Ulfina isaa tiifiis ni hamdeeyfannaa! Kunoo, guyyaan aruuza hoolichaa tiis gahee ti jira, aruuztittiin isaa tiis isaaf if qopheeysitee ti jirti!
[8] Uffata quncee qoonxar irraa hojjatame, calalaqaa fi naziifaas uffachuun isiif kannamee ti jira” jette; uffanni quncee qoonxar saniis hojii qaceelaa warra Rabbiif qulqullaawanii ti.
[9] Hogguusi maleeykaan sun, “Warri aruuza hoolichaatti afeeraman eeybifamoo dha! Atiis kana barreeysi!” Itti dabalee tiis, “Kannen Qoowlii Rabbii dhugaa dha” naan jedhe.
[10] Hogguus isaaf sagaduuf miila isaa irrattiin kufe; inni ammoo, “Akkana godhuu hin qabdu! Aniis akkuma kee tii fi, akka obboleeyyan kee warra Yesuusiif ragaa bahuu irratti bobbahan wajjiin kaadamaa gola teeysanii ti, ati Rabbuma qofaaf sagadi! Ragaan Yesuus, ruuhaa raajii dubbachuu dhaa ti” naan jedhe.
[11] Kana booddee laalee, bantiin samii banamtee, farda adii tokkoos niin arke. Kan fardicha irra taa'ees maqaan isaa, “Amanamaa, dhugaasi” jedhama; firditti, lolattiis qaceelummaa dhaani hojjata.
[12] Ijji isaa akka barbada ibiddaa ti, mataa isaa irra waan akka gonfoo hedduu tu jira; maqaa isa irratti barreeyfamee jiru tokko qaba, ammoo isuma malee, namni biraa tokko illeenuu hin beeku.
[13] Uffata dhiiga keeysatti hallame tokko uffata, maqaan isaa tiis, “Qoowlii Rabbii ti” jedhame.
[14] Loltoonni samii keeysaa ammoo uffata quncee qoonxar aslii adii uffatanii, faradoo adaadii irra tattaa'anii ti, isa duukaa dha bu'an.
[15] Afaan isaa keeysaa habalee qara qabdu, tan saboota ittiin dhawuutu bahe. Inni saboota san ulee sibiilaa tiin bulcha, inni ammaas bakka cuunfaa inabaa keeysatti, lola sodaachisaa Rabbii hundumaa dandayuu irra ejjetee camaquufi deema.
[16] Uffata isaa irratti, gudeeda isaa irrattiis maqaa, “Mootii mootootaa, Gooftaa gooftotaa” jedhu barreeyfamee ti jira.
[17] Kana booddee maleeykaan tokko kan aduu irra dhaabbatuun arke. Inni niis allaattii bantii samii walakkaa bararan hundumaa sagalee guddoo dhaan, “Koottaa tii, azuumaa guddoo Rabbi isiniif qopheeyseef walitti qabamaa!
[18] Foon mootootaa, foon abboota duulaa, foon warra goototaa, foon faradoo tii fi kan warra isaan irra tattaa'anii tiis, foon nama hundumaa, kan bilisaa, kan gabraa tiis, kan guddaa dhaa, kan xiqqaa tiis nyaachuuf koottaa!” jedhe ti iyye.
[19] Eegas ammaas bineensichaa fi mootoonni biyya addunyaa dhaa, loltoota isaanii wajjiin walitti qabamaniitiin arke; isaaniis isa kan farda adii irra taa'ee fi loltoota isaa tiini lolan.
[20] Bineensichi ni qabame; nabiyyichi kijibaan kan fuula isaa duratti milikkita agarsiisees isaa wajjiin qabame; inni, warra asxaa bineensichaa if irraa qabaatanii, bifa fakkeenya isaa tiif sagadan, milikkituma saniin gowwoomsee ti ture. Warri qabaman kun lamaanuu, fayyuma, haroo ibiddaa tan dhagaa bobawuun falaqqisu keeysatti darbaman.
[21] Warri hafan ammoo habalee afaan isa farda irra taa'uu san keeysaa baatuuni ajjeefaman; allaattiin hundinuu foon isaan kanaa nyaatanii ti quufan.