[1] Hogguus ani isa arshii irra taa'ee jiru harka isaa kan mirgaatti kitaaba maramee taa'u tokkoon arke; kitaabtichi niis keeysaa fi duubaan barreeyfamee, eega cufame ammaas sumuda torbaan cufamee ti ture.
[2] Maleeykaan jabaan tokko sagalee isaa ol fuudhee ti, “Sumuda kitaabtichi ittiin cufame irraa muree, kitaabticha banuuf kan male eenyu?” jechaa kan labsuun arke.
[3] Samii keeysaa taanaan, lafa irraahiis, lafa jalaahiis nam tokko illeenuu kitaabticha banuu yookiin keeysa isaa laaluu hin dandeenye.
[4] Nam tokko illeenuu kitaabticha banuuf yookiin keeysa isaa laaluuf kan male waan hin argaminiif jecha hedduu dhaan booye.
[5] Manguddoota keeysaa inni tokko ammoo, “Hin booyin! Kunoo, leencichi shanyii Yihudaa, hidda Daawwid keeysaa ka'ee moohee ti jira, inni sumuda kanneen torban mummuree kitaabticha banuu ni dandaya” naan jedhe.
[6] Arshii fuula duraas, uumama lubbuu qaban afranii fi manguddoota jidduu, hoolaa akka waan gorra'ame fakkaatee dhaabbatu tokkoon arke. Hoolaan kuniis gaanfa torbaa fi ija torba qaba ture; isaan kun ruuhaanota torban kanneen Rabbi kaadamani gara guutummaa biyya addunyaatti erge.
[7] Hoolichi niis deemee ti harka mirgaa isa arshii irra taa'ee jiru keeysaa kitaabticha fudhate.
[8] Hogguu inni kitaabticha fudhate, uumamni lubbuu qaban afran, manguddoonni diiydamii afraniis hoolicha duratti sujjuudan. Adduma addaan kiraaraa fi girgiraa libaanata itti aarsan, tan ziqeeya irraa tolfamte if harkaahi qabu; libaanatni girgiraa keeysa guutuu dha ture; inni niis kadhata warra Rabbiif qulqullaawanii ti.
[9] Isaan faarfannaa haaraya hogguu faarfatan, “Ati kitaabticha maramaa fudhachuu dhaaf, sumuda isaa tiis banuuf kan malte; ati ifii gorra'amtee, ammaas gosa namaa hunduma keeysaa, afaan hundumaa keeysaa, ummata hundumaa keeysaa, saba hundumaa keeysaahiis, namoota gumaa dhiiga kee tii tiin Rabbiif bitte.
[10] Ati mootummaa fi luboota Rabbii keenya tajaajilan isaan goote, isaaniis lafa irratti mootomuufi taa'u” jedhan.
[11] Kana booddee ani maleeykoota hedduu warra arshichatti, uumama lubbuu qaban sanitti, manguddoota sanittiis naannawaniin arke; lakkooysi isaanii tiis halfa halfaa fi ammaas kumaatama kumaatamaa ti ture; sagalee isaanii tiis niin dhagaye.
[12] Isaan sagalee guddaa dhaan, “Hoolichi inni qalame amrii, badhaadhummaa, hikmaa, humna, ulfina, guddina, hamdiis fudhachuun kan male” jedhan.
[13] Wanni samii irratti, lafa irratti, lafa jalatti, bahar keeysatti uumamanii, isaan keeysa jiruus hundinuu, “Hamdiin, ulfinni, guddinni, amriin, isa arshii irra taa'ee jiru saniif, hoolichaafiis baraa hanga bara baraatti haa tahan!” jechuu isaanii tiis niin dhagaye.
[14] Uumamni lubbuu qaban afraniis, “Aammiin!” jedhan; manguddooniis gombifamanii ti sagadan.