[1] Kana booddee maleeykaa maftaa boolla hoonga hin qabne tan lafa jalaa tii fi, ammaas shanshalata guddaa harkaa qabu tokko, samii keeysaa kan gadi bu'aa jiruun arke.
[2] Inni bineensa akka jawwee, bofa dur, Diiyaabilos, Sheeyxaanticha san qabee ti, bara kuma tokkoof isa hidhe.
[3] Barri kumni sun hanga raawwatamutti, akka inni deebi'ee saba biyya addunyaa hin gowwoomsineef, boolla lafa jalaa san keeysatti darbee ti, balbala itti cufee sumuda itti godhe; achiin booda ammoo waytuma gabaabduuf gadi dhiifamuu tu irra jira.
[4] Tana booddee kunoo arshootaa fi warra firdii kannuuf amriin isaaniif kanname, kanneen arshoota san irra tattaa'aniin arke; akkasumatti ammaas lubbuu warra Yesuusiif ragaa bahanii fi ammaas Qoowlii Rabbii tiis waan labsaniif jecha gorra'amaniitiin arke; isaan warra bineensichaa fi fakkeenya isaa tiifiis hin sagadin, ammaas warra asxaa bineensichaa adda isaanii irratti yookiin harka isaanii irratti hin fudhatinii dha. Isaan deebi'anii jiraatanii ti, bara kuma tokko Kiristoosii wajjiin ni mootomu.
[5] Tun qiyaamaa duraa ti, warra du'an keeysaa isaan kana malee, warri hafan kaan, barri kumni sun hanga raawwatamutti deebi'anii lubbuun hin jiraanne.
[6] Namni qiyaamaa duraa tana keeysaa qooda qabu hedduu eeybifamaa qulqullaawa! Duuti lamadaa warra akkasii irratti humna hin qabdu; isaan luboota Rabbii, luboota Kiristoosiis ni tahan, ammaas isaan wajjiin bara kum tokko mootomuufi taa'u.
[7] Barri kumni sun hogguu raawwatamu, Sheeyxaanni bakka itti hidhamee ture sanii gadi ni dhiifama.
[8] Inni saba ruknii afran biyya lafaa keeysa jiran Googii fi Maagoogiis gowwoomsuuf, lolaaf walitti isaan qabuuf jecha ni baha; lakkooysi isaanii tiis akka cirracha bahari.
[9] Isaan kun lafa ballinaan keeysa deddeemanii ti, qubata warra Rabbiif qulqullaawanii, magaalaa jaalatamaa sanittiis ni marsan; haa tahuu malee, ibiddi samii keeysaa bu'ee ti isaan fixe.
[10] Sheeyxaanni isaan gowwoomsees, hara ibiddaa, tan dannyoon bobawutti, bakka bineensichinii fi nabiyyiin kijibaan sun jiranitti gadi darbame; isaan bara baraaf halkanii fi guyyaa zaliilamuufi deemu.
[11] Kana booddee kunoo arshii adii guddoo takkaa fi isa kan arshicha irra taa'een arke; dachiinii fi samiiniis fuula isaa duraa dheeysan, bakki niis isaaniif hin argamne.
[12] Warra du'aniis xiqqaa fi guddaan arshicha dura odoo dhadhaabbataniitiin arke. Kitaabban ni banaman; kitaabni biraa tiis, kan warri jireenya argachuuf taa'an keeysatti barreeyfaman tokkoos ni baname; warri du'aniis akkaatuma hojii isaan hojjatan, kanneen kitaabota keeysatti barreeyfamanitti firdii arkatan.
[13] Bahariis warra du'oo isa keeysa turan baasee ti kanne. Duutinii fi Si'ooliis warra du'oo isaan harka turan baasanii ti kannan; namni hundinuu adduma addaan akka hojii isaatitti firdii ni arkate.
[14] Kana booddee duutinii fi Si'ooliis hara ibiddaatti gadi darbaman; harri ibiddaa sun du'a lamadaa ti.
[15] Namtichi maqaan isaa kitaaba warri jireenya arkachuuf deeman keeysatti barreeyfaman keeysatti hin argaminiis, hara ibiddaatti gadi darbaman.