[1] Kana booddee maleeykota torban qorii torba qaban san keeysaa tokko dhufee ti anaan, “Koottuu tii, firdii dubartittii zinatti beekamtuu taate, tan bishaan hedduu irra teeysu saniin si agarsiisaa!
[2] Mootoonni biyya addunyaa tanaa tiis isiin wajjiin zinaa hojjatanii ti jiru, daadhii halalummaa isii tiiniis warri lafa irra jiraatan farshaananii ti jiru” jedhe.
[3] Ammaas maleeykichi Ruuhaan huffee gammoojjii keeysa na geeyse; achittiis dubartii takka tan bineensa halluu diimaa tokko irra teeysuun arke. Bineensi kuniis mataa torbaa fi gaanfa kudhan qaba ture; qaama isaa hundumaa irratti maqaaleen ulfina Rabbii arrabsan katabamanii ti turan.
[4] Dubartittiin uffata hinnaa halluu diimaa uffattee, ziqeeya, lu'ulu'aa fi callee faayaaf naqattee, kubbayyaa ziqeeyaa kan waan nama jibbisiisuu fi najisummaa gumnummaa isii tiin guutame, harkatti qabattee ti turte.
[5] Adda isii irratti maqaa hiccitii tahe tokko, “Baabiloon guddittii, haadha gumnootaa tii fi waan biyya addunyaa keeysaa nama jibbisiisu” kan jedhu katabamee ti ture.
[6] Ammaas dubartittiin dhiiga warra Rabbiif qulqullaawanii tiin, dhiiga warra Yesuusiif ragaa bahuu jecha ajjeefamanii tiiniis tan farshaanteen arke; hogguun isii arkees, hedduu dha baasa natti taate.
[7] Ammoo maleeykichi, “Maaltu baasa sitti tahe? Hiikaa hiccitii dubartittii tii fi tan bineensa isii baadhate, kan mataa torbaa fi gaanfa kudhan qabuu, anaatu sitti hima” naan jedhe.
[8] “Bineensi ati agarte sun, wayta takka jiraachaa ti ture, ammoo amma hin jiru; bakka boolla lafa jalaa keeysaa ol bahuufi deema, booddee ammoo gara itti balleeyfamutti deema. Sababa inni takka jiraataa tureef, amma ammoo hin jirreef jecha, deebi'ee ammaas waan dhufa jiruuf, warri biyya addunyaa irra jiraatan, warri uumamuu biyya addunyaa tii jalqabee maqaan isaanii Kitaaba Jireenyaa keeysatti hin barreeyfamin, bineensa arkanii baaseeyfachuufi taa'u.”
[9] “Wanni kun surrii hikmaa qabdu barbaada; mataan torban gaara torban dubartittiin irra teeysu.
[10] Akkasumatti ammaas mataan torban mootoota torbaasi, isaan keeysaa shan duruun kaafamanii ti jiru, tokko ammuma illee mootummaa irra jira, inni kaan tokko ammoo amma illee hin kaane; wayta ka'u ammoo, waytuma gabaabduu qofaafi mootoma.
[11] Bineensi wayta takka jiraataa ture kan amma hin jirre sun ammoo mootii saddeeteeysa; inni niis warruma torban kana keeysaa tokko tahee kanuma balleeyfamuuf deemu.
[12] Gaanfoonni kurnan ati agarte ammoo, mootoota kudhan warra kanaan dura mootummaa hin fudhatini; ammoo isaan bineensichaa wajjiin za'uma takkaaf warra mootomuuf deemu.
[13] Isaan kurnanuu akeeka tokko qabu, humna isaanii tii fi amrii isaanii tiis dabarsanii ti bineensatti kannu.
[14] Isaan hoolicha irratti duula ni kaasu; hoolichi ammoo Gooftaa gooftotaa, mootii mootootaatiis waan taheef jecha, isaan ni mooha; warri isaan wajjiin moohanii jiraniis warra yaamaman, warra filatamanii fi warra amanamani” jedhe.
[15] Ammaas maleeykichi itti dabalee ti, “Bishaan kanneen ati arkitu kun, bakka gumnittiin irra teeysifamte, saba hedduu dha, ummata hedduu dha, qomoo hedduu dha, ammaas afaan hedduu dhaasi.
[16] Ammaas gaanfoonni kurnan ati agartee fi bineensi niis gumnittii san jibbuufi taa'u; isaan waan isiin qabdu hundumaa irraa fudhatanii, hoongotti isii hambisu; foon isii tiis ni nyaatu, ibiddaaniis ni gubu.
[17] Isaan hanga Qoowliin Rabbii raawwatamtutti warra akeeka tokko qabu tahuu dhaan, mootummaa isaanii dabarsanii bineensichatti kannuu dhaan, akeeka Rabbii hojii irra akka oolchaniif jecha, inni tana qalbii isaanii keeysa kaayee ti jira.
[18] Ammaas dubartittiin ati arkite, magaalaa guddittii tan mootoota biyya addunyaa irratti mootummaa qabdu” naan jedhe.