[1] Ammaas tana booda maleeykaan biraa tokko amrii guddoo fudhatee, samii keeysaa kan gadi bu'uutti jiruun arke; durrii ulfina isaa tiin dachiin ni ifte.
[2] Inni sagalee guddoon: “Kuftee ti jirti, Baabiloon guddittiin kuftee ti jirti, bakka ruhaanoonni hamoon keeysa jiraatan taatee ti jirti; lafa ruuhaan najisni keeysa bobbahu, lafa allaattiin najisninii fi jibbamoon keeysa deddeebi'an taate!
[3] Saboonni hundinuu daadhii lola si'oo najisa isii irraa dhufu dhuganii ti jiru, mootoonni biyya addunyaa isii wajjiin zinaa godhanii ti jiru; naggaadonni lafa irraa tiis qananii taajirummaa isii tan quufa hin qabneen sooreyfamanii ti jiru” jedhee ti eyye.
[4] Eegasii sagalee biraa takkaan samii keeysatti dhagaye; isiiniis, “Yaa saba koo! Dilii isii keeysatti akka hin laaqanne, balaa isii irraa hiis akka hin hirmaanneef, koottaa tii isii keeysaa bahaa!
[5] Diliin isii hanga samiitti ol tuulamtee ti jirti, Rabbiis karaa jallina isii hundumaa huu yaadatee ti jira.
[6] Waan isiin nama irraan geeysees, isuma irratti deebisaa, waan isiin hojjattees, dachaa lama godhaa tii deebisaafi! Geeba isiin itti namaaf bulbultetti, harka lama kan hammaatu bulbulaafi!
[7] Akkuma isiin ulfina ifiif kannitee, qananii keeysatti jiraattetti, qunnuma saniin cinqii fi naasuus kannaafi! Isiin garaa isii keeysatti, ‘Ani mootittiin bakka tanaan taa'a, ani gursummeeytii dhaa miti, naasuus gonkumaa hin arku’ ifiin jettee ti jirti.
[8] Rabbi Gooytaan isiitti firdii godhu humna-qabeeysa waan taheef, balaan adda addaa, dhukkubni, naasuunii fi abaariis, guyyuma tokkotti isiitti dhufuufi deemu, ibiddaaniis gubamuuf deemti!” jedhe.
[9] Mootoonni biyya addunyaa warri isii wajjiin zinaa godhanii, qananii isii irraa raabsatan aara isii gubattu irraa ka'u arkanii, isiif booyanii waywaachuufi taa'u.
[10] Cinqiin isii akka isaan irra hin geenyeef sodaatanii irraa fagaatanii dhadhaabbatanii ti, “Yaa Baabiloon magaalaa guddittii! Magan kaa! Yaa magaalaa humna-qabeeytittii, firdiin tee sa'uma takka keeysatti dhuftee ti jirti, magan kaa!” isiin jedhu.
[11] Naggaadonni biyya addunyaa tiis, kanaan booda namni meeshaa isaanii irraa bitu waan hin jirreef jecha, isiif nahanii ti booyuuf.
[12] Meeshaa ziqeeyaa, meetaa, lu'ulua'a, callee, uffata quncee qoonxar aslii irraa hojjatame, uffata bifa diimaa, hariira, uffata hullaa diimaa, muka urgaawu hundumaa huu, meeshaa ilkee arbaa irraa hojjatamte, meeshaa muka gatiin qaalii taate irraa hojjatamte, meeshaa sibiila diimaa, kan sibiilaa, kan dhagaa miidhagaa, gati-qabeeysaa tiis,
[13] qarafaa, waan urgooytuu dibatan, libaanata, qumbii, haphee, dhugaatii cuunfaa inabaa, dhadhaa ejersaa, ficaa xiina, qamadii, loon, hoolaa, farda, konkolaataa fardaan harkifamu, gabrootaa fi lubbuma namaa illee kan isaan irraa bitu hin jiru.
[14] Isaan hogguus, “Wanni lubbuun tee arkachuuf hawwitee turte si harkaa baatee ti jirti, qabeenyi kee tii fi bareedni kee kan nama ifitti harkisu hundinuu si harkaa badanii ti jiru, deebi'anii tiis gonkumaa hin argaman!” isiin jedhu.
[15] Naggaadonni meeshaa kanneen bitanii gurguran, warri isii irraa taajiroomanii turaniis, musiibaa isii sodaatanii ti halaala irraa dhadhaabbatanii nahanii sagalee ol kaasanii ti booyu.
[16] Booyicha isaanii keeysatti, “Magaalaa guddittii, tan uffata quncee qoonxar aslii dhaa uffata diimaa fi hullaa diimaa uffachaa turteef, tan ziqeeyaa fi lu'ulu'a qaqqaalii callees naqachaa turte saniif magan! Magan!
[17] Sa'uma takka keeysatti badhaadhummaan kun hundinuu waan gatii hin qabne tahee ti jira!” jedhu. Warri markaba irratti ajajanii fi, ammaas warri markabaan deeman, warri markaba keeysa hojjataniis, warri hojii bahar irratti hojjatamuun jiraatan hundinuu, isii irraa achi fagaatanii ti dhadhaabbatan.
[18] Aara isii gubattu irraa ka'u hogguu arkan, “Mandarri akkanaa guddaan eeysa jira?” jedhanii ti iyyan.
[19] Biyyees mataa isaanii irratti firfirsanii ti booyan, naasuuniis ni iyyan, “Magaalaa guddittii, tan warri markaba bahar irraa qaban hundinuu badhaadhummaa isii tiin sooromaniif, magan! Magan! Sa'uma takka keeysatti kunoo dirgim taate!” jechaa ti turan.
[20] Sagaleen biraa takka ammaas, “Yaa bantii samii, isii tana irratti gammadi! Isin warri Rabbiif qulqullooytan, ergamoonninii fi nabiyyoonni niis, Rabbi isii irratti isiniif waan firdii godheef jecha gammadaa!” jette.
[21] Kana booddee maleeykaan jabaan tokko, dhagaa guddaa akka dhagaa daakuu dhaa tokko, fudhatee ti bahar keeysatti darbee, “Baabiloon mandarri guddittiin akkasitti furgugeeyfamtee ti, gadi darbamte, kunoo, deebitee tiis hin arkamtu!
[22] ‘Sagaleen warra kiraara rukutuu, kan warra wallisanii tiis, kan warra uluullee fi garri afuufanii tiis, deebi'ee si keeysatti hin dhagayaman; namoonni waan adda addaa babbareechanii tolchutti beekamaniis, deebi'anii si keeysatti hin arkaman; sagaleen dhagaa daakuutiis, deebi'ee si keeysatti hin dhagayamu.
[23] Ifni ibsaa dhaa deebi'ee si keeysatti hin ifu; sagaleen aruuztichaa tii fi aruuztittii dhaa deebitee si keeysatti hin dhagayamtu; naggaadonni kee namoonni beekamoon biyya addunyaa irra turan, saboonni hundinuu falfala namatti godhuu kee tiin gowwoomfamanii turanii ti jiru.’
[24] Amma ammoo, dhiiyni nabiyyootaa tii fi kan warra Rabbiif qulqullaawanii, kan warra lafa irratti qalaman hundi niis, isii keeysatti arkamuu isaanii tiif jecha, kun itti tasniifame” jedhe.