[1] Kana booddee ammaas, bineensi tokko kan bahar keeysaa ol bahaa jiruun arke; bineensichi niis gaanfa kudhanii fi mataa torba qaba ture; gaanfan isaa irratti gonfoo kudhan, mataa isaa torban irrattiis maqaa ulfina Rabbii arrabsuu tu ture.
[2] Bineensi sun qeerransa fakkaata ture; miilli isaa akka miila warbaa ti, afaan isaa tiis akka afaan leencaa ti; bineensichi akka jawwee suniis humna isaa, arshii isaa tii fi amrii isaa guddoos bineensicha kanaaf kanne.
[3] Mataalee isaa torban keeysaa tokko akkuma waan silaa isa ajjeesutti madaawee ti ture, ammoo madaan isaa ni dhinte; namoonni biyya addunyaa hundinuu ajaa'ibanii ti bineensicha kana duukaa dha bu'an.
[4] Namayyuu bineensichi akka jawwee sun amrii isaa bineensicha kanaaf waan kanneef, akkan jechaa ti bineensa kana ibaaduuf, “Eenyu mee kan akka bineensaa? Eenyuu tu bineensichaan loluu dandaya?” jechaa ti turan.
[5] Bineensichi ji'a afurtamii lamaaf, Rabbi arrabsuuf afaanuma isaa guutuun akka dhaytaa dubbatuuf, amriin kannamtee tiifi turte.
[6] Hogguus bineensichi Rabbi arrabsutti ka'e, maqaa Rabbii, bakka teeysoo isaa qulqulluttiis, warra samii keeysa isa bira jiraataniis afaanuma isaa guutuuni arrabse.
[7] Warra Rabbiif qulqullaawaniin lolee, akka isaan moohuufiis ni hayyamameefi; shanyii hundumaa irratti, ummata hundumaa irratti, afaan hundumaa irratti, saboota hundumaa irrattiis amriin ni kannamteefi.
[8] Warra lafa irra jiraatan keeysaa, uumamuu biyya addunyaa tii jalqabee maqaan isaanii kitaaba hoolicha qalamee, kanneen warri jireenya arkachuuf deeman keeysatti galmeeyfaman irratti hin arkamne hundinuu, bineensichaafi sagaduuf taa'u.
[9] Namni gurra dhagayu qabu haa dhagayuu!
[10] Namtichi booji'amuu deemu, booji'amuun isaa hin hafu; namtichi habaleen nama ajjeesees, habalumaan ajjeefamuun isaa hin hafu; kana keeysatti warri Rabbiif qulqullaawan obsaa fi amantitti jabaachuu tu irraa eegama.
[11] Kana malees bineensa biraa tokko, kan lafa keeysaa ol bahaa jiruun arke; gaanfa akka hoolaa dhaa lama qaba, akkuma bineensa akka jawwee sanitti dubbataasi ture.
[12] Bineensi lammaffaa kun amrii bineensicha isa duraa hundumaan, fayyadama ture; dachiinii fi warri isii irra jiraatan hundinuu bineensicha duraa, kan madaan du'aan isa gahuuf turte dhintee saniif akka sagadani dirqa ture.
[13] Bineensi kun milikkita gurguddaa dha agarsiisa; ibidda illee ija namootaa duratti samii keeysaa lafatti gadi buusa ture.
[14] Ammaas milikkita ittiin dalaguuf hayyamameef saniini bineensi duraa san bakka jirutti, ummata biyya lafaa irra jiraatan ni gowwoomsa, ummanni bifa fakkeenya bineensa habaleen rukutamee madaawee ammaas deebi'ee jiraate saniin akka tolfatani isaan ajaja.
[15] Bifa fakkeenya bineensa duraa sanitti lubbuu akka itti godhuuf, bineensa lamadaa saniif amriin kannamtee tiif turte; akkasitti bifti fakkeenya bineensichaa sun dubbachuu illee dha dandeeyse, warra bifa fakkeenyaa kanaaf hin sagadiniis akka ajjeefaman godhe.
[16] Bineensichi namni hundinuu, xiqqaa fi guddaan, sooreysaa fi hiyyeeysi, bilisninii fi gabri niis harka mirga isaanii irratti yookiin adda isaanii irratti asxaa akka qabaatan goosiise.
[17] Tana godhuun isaa tiis, namni asxaa bineensicha duraa, maqaa isaa yookiin lakkooysa maqaa isaa mullisu if irraa hin qabne, bituus taanaan, gurguruus akka hin dandeenye godhamuufi ture.
[18] Tun hikmaa dha barbaachifti; lakkooysi kun lakkooysa namaa waan taheef jecha, namni aaqilli qabu lakkooysa hisaabee beekuu ni dandaya. Lakkooysichi niis dhibba jahaa fi jahaatamii jaha.