[1] Hogguus Beeytal Maqdas san keeysaa sagalee guddoo, tan maleeykota torban saniin, “Deemaa tii lola Rabbii qoriilee torbanuu keeysaa lafa irratti gadi naqaa!” jettuun dhagaye.
[2] Eegaa, maleeykaan duraa achii bahee ti, qorii isaa keeysaa lafa irratti gadi naqe; madaan musiibaa fi laalaa qabdu namoota asxaa bineensaa if irraa qaban irratti, ammaas warra bifa fakkeenya isaa tiif sagadan irrattiis ni baate.
[3] Maleeykaan lammeeysaan ammaas qorii isaa keeysaa bahar irratti gadi naqe; bishaan bahariis akka dhiiga nama du'e keeysaa yaa'uu ti tahe; wanni lubbuu qabaa kanneen bahar keeysa jiraatan hundinuu ni dhuman.
[4] Maleeykaan sadeeysaan ammaas qorii isaa keeysaa laga irrattii fi maddoota bishaanii irratti gadi naqe; isaaniis dhiigatti garagalan.
[5] Hogguus ani, maleeykicha amrii bishaan irratti qabu san, “Ati yaa Gooytaa qulqulluu, kan jirtu, kan jiraattees, firdii tana kannuun tee qaceelaa dha!
[6] Namoonni kanneen dhiiga warra siif qulqullaawanii, kan nabiyyootaa tiis dhangalaasanii ti jiru; atiis amma dhiiga akka dhuganiif isaaniif kannitee ti jirta; kuniis waanuma isaaniin male!” isaa jedhuun dhaga'e.
[7] Ammaas sagaleen takkaas bakka aarsaatii, “Eeyye, yaa Rabbi Gooytaa hundumaa dandeeysu, firdiin tee dhugaa dha, qaceeltuu dhaasi!” tan jettuun dhagaye.
[8] Maleeykaan afreeysaan ammaas qorii isaa keeysaahi aduu irratti gadi naqe; aduuniis ibidda isii tiin akka ummata waxaltu amriin ni kannamteefi.
[9] Ummanni niis oowwa zaliil saniin waxalaman. Tana keeysatti isaan Rabbi kan uzrii balaa tana hundumaa irratti amrii qabu arrabsuu malee, isaan toowbatanii ulfina Rabbiif hin galchine.
[10] Maleeykaan shaneeysaan ammaas qorii isaa keeysaahi arshii bineensichaa irratti gadi naqe; mootummaan bineensaa tiis dukkanaani hagoogamte; namoonni niis laalachuu isaanii irraa kan ka'e arraba if nyaachaa ti turan.
[11] Laalaa fi madaa isaanii tiif jecha, Rabbi Gooytaa samii keeysaa arrabsu turan malee, dalagaa isaanii irraa deebi'anii hin toowbanne.
[12] Maleeykaan jaheeysaan ammaas qorii isaa keeysaa laga guddicha Efraaxiis irratti gadi naqe; bishaan isaa tiis ni goggoge, kuniis wanni taheef mootoonni warra baha-biiftuu dhaa, deemanii akka dhufuu dandayaniifi godhame.
[13] Hogguus ani afaan bineensa akka jawwee sanii keeysaa, afaan bineensicha kaanii keeysaa, ammaas afaan nabiyyicha sobaa keeysaahiis ruuhaanonni hamoon sadih raacha fakkaatanii odoo bahanii tiin arke.
[14] Isaan ruuhaanota Sheeyxaanaa warra baasa adda addaa agarsiisani; isaan kun warra mootoota guutummaa biyya addunyaa, lola guyyaa guddicha Rabbii hundumaa dandayu saniin loluuf, walitti qabuufi bahani.
[15] Sagaleen takkaas, “Kunoo, ani akkuma hattuun daydee dhuftuttiin dhufa, namticha dammaqee qullaa saaxil bahee qaaniin akka isa mudanne, uffata isaa tiin kan if sattaree eegu eeybifamaa dha!” jette.
[16] Ruuhaanonni hamoon sun mootoota san bakka afaan Ibrootaatti “Armaagedoon” jedhamtutti walitti qaban.
[17] Maleeykaan torbeeysaan ammaas qorii isaa keeysaa qilleensa keeysatti gadi naqe; sagaleen guddoon takkaas, arshii Beeytal Maqdas keeysa jirtu irraa, “Raawwatamte tamaam!” tan jettuu tu dhufe.
[18] Hangaasuun ni hangaate; didichaanii fi mandiisuuniis wal jalaa qaban, dachiiniis hedduu dha sossoote; eega Banii Aadam uumamee jalqabee dachiin hangana takkumaa tuu sossootee hin beeytu, sossooni dachii dhaa sun hangas takka guddaa ture.
[19] Mandarri guddichi niis bakka sadihiitti gargar caphe, mandaroonni saba biyya addunyaa ni jijjigan; Rabbi ammoo Baabiloon guddittii yaadatee ti, geeba lola isaa kan zaliil keeysaa akka dhuuyduufi isiif kanne.
[20] Biiyti bishaan keeysaa hundinuu baqatanii ti yaa'an; gaarri hundi niis bakkaa dhabaman.
[21] Ammaas dhagaa cabbii gurguddaa, kan matumatti toora kiilo jahaatamaa ulfaatuu tu, samii keeysaa namoota irratti bubu'e; sababa aafaata cabbii saniif jecha, namoonni Rabbumaa huu hanga arrabsan takka gayan; aafaanni suniis hangas takka nama sodaachisa ture.