[1] Hogguu hoolichi sumuda torbeeysaa bane, bantii samii keeysatti, hanga walakkaa sa'aatiif, calii tu tahee ture.
[2] Kana booddee maleeykoota torba warra fuula Rabbii dura dhaabbataniin arke; isaaniifiis garriin torba ni kannamaniif.
[3] Maleeykaan Rabbii kan biraa tokkoos, girgiraa libaanata itti aarsan, tan ziqeeya irraa tolfamte harkaa qabu dhufee, bakka aarsaa sani dhaabbate; bakka aarsaa ziqeeya irraa tolfame, kan arshii fuula dura jiru san irratti, kadhata warra Rabbiif qulqullaawanii hundumaa wajjiin akka inni dhiheeysuuf, libaanatni hedduun maleeykichatti kanname.
[4] Aarri libaanataa kadhata warra Rabbiif qulqullaawanii wajjiin, harka maleeykicha sanii keeysaa gara fuula Rabbitti ol ka'e.
[5] Hogguus maleeykichi girgiraa libaanata itti aarsan san fuudhee ti, bakka aarsaa san irraa ibidda itti guutee, lafatti gadi furgugeeyye; kunoo, sagaleen mandiisuu dhaa, sagaleen biraa tiis wal jalaa qaban, hangaasuun ni walaqqifti, dachiiniis ni sossooti turte.
[6] Maleeykoonni torban kanneen garriin torba kannamaniifiis, garrii isaanii afuufuuf qophii dha tahan.
[7] Maleeykaan inni duraa garrii isaa ni afuufe. Cabbii dhaa fi ibiddi dhiigaan walitti makamee tu itti aane, isaaniis gara dachitti gadi darbaman; dachiiniis harka sadih keeysaa harki tokko ni gubatte; mukkeeniis harka sadih keeysaa harki tokko ni gubatan; meeyri citaa hundi niis ni gubate.
[8] Kana booddee maleeykaan lamadaa garrii isaa ti afuufe. Wanni akka gaara guddaa ibiddaan gubatuu tokkoos bahar keeysatti darbame; bahariis harka sadih keeysaa harki tokko dhiiga tahe.
[9] Uumamni lubbuu qaban kanneen bahar keeysa jiraataniis harka sadih keeysaa harki tokko ni dhuman; markaboonni niis harka sadih keeysaa harki tokko dirgim tahan.
[10] Maleeykaan sadeeysaan ammaas garrii isaa ni afuufe. Urjiin guddoon tan akka ichima bobawuu tokkoos samii keeysaa gadi buutee lagootaa fi maddoota bishaanii harka sadih keeysaa harka tokko irratti kufte.
[11] Maqaan urjii sanii tiis “Hadheeyso” jedhama; bishaaniis harka sadih keeysaa harki tokko ni hadhaawe; sababa bishaan hadhaaweef jecha, namni hedduun bishaan saniin karraqaman.
[12] Maleeykaan afreeysaaniis garrii isaa ni afuufe. Aduun harka sadih keeysaa harki tokko, jiini niis harka sadih keeysaa harki tokko, urjoonni niis harka sadih keeysaa harki tokko, ifni isaanii harka sadih keeysaa harki tokko, akka dukkanaawu godhame; akkasitti ifni guyyaa harka sadih keeysaa harki tokko, ifni halkanii tiis ammaas harka sadih keeysaa harki tokko akka hin ibsine godhaman.
[13] Kana booddees risaa bantii samii walakkaa bararu tokkoon arke; inni niis sagalee guddoo dhaan iyyee ti, “Sagaleen garrii dhaa tan maleeykoonni sadih warri biraa dhageeysisuuf deeman, dhageeysifamuu bira waan gaheef, warra lafa irra jiraniif magan! Magan! Magan!” jechuu isaa niin dhagaye.