[1] Matigi ko Musa ka nin kuma fɔ Israɛl bɔnsɔn ye ko:
[2] «Ni mɔgɔ dɔ ye i dafale, ni mɔgɔw ko don, u na kɛ Matigi ta ye ka kɛɲɛ ni i ka kunmabɔ sara fɔlen ye.
[3] Ni i bɛ cɛ kunmabɔ sara fɔ k'a daminɛ a si san mugan la fo ka taa bila a si san biwɔɔrɔ la, i ka a sɔngɔ kɛ warijɛ sikle biduuru ye ka kɛɲɛ ni yɔrɔ senuma jate cogo ye.
[4] Ni muso don, i ka a kunmabɔ sara kɛ sikle bisaba ye.
[5] Ka daminɛ cɛ si san duurunan la fo ka taa bila a si san mugan la, i ka a kunmabɔ sara kɛ sikle mugan ye. Ni muso don, sikle tan.
[6] K'a daminɛ cɛ si kalo kelen la fo ka taa bila a si san duuru la, i ka a kunmabɔ sara kɛ warijɛ sikle duuru ye, ni muso don, i ka a kunmabɔ sara kɛ warijɛ sikle saba ye.
[7] K'a daminɛ cɛ si san biwɔɔrɔ la ka taa ɲɛ, i ka a kunmabɔ sara kɛ sikle tan ni duuru ye. Ni muso don, sikle tan.
[8] Mɔgɔ min y'i dafale, ni faantan don fo a tɛ se ka kunmabɔ sara fɔlen sara, u ka taa n'a ye sarakalasebaa yɔrɔ, sarakalasebaa ka a kunmabɔ sara fɔ. Sarakalasebaa ka a kunmabɔ sara fɔ ka kɛɲɛ ni a se ko ye.
[9] «Bagan min bɛ se ka kɛ saraka ye Matigi ye, ni o ko don, mɔgɔ bɛ bagan fɛn o fɛn di Matigi ma, o na kɛ fɛn senuma ye.
[10] A tigi kana a yɛlɛma, a kana a ɲuman falen juguman la, a kana juguman falenɲuman la. Ni a ye o bagan falen bagan wɛrɛ la, minw falennaɲɔgɔn na, olu fila bɛɛ ye fɛn senumaw ye.
[11] Bagan nɔgɔlen min tɛ se ka kɛ saraka ye Matigi ye, ni o ko don, a tigi ka o bagan jira sarakalasebaa la.
[12] Sarakalasebaa ka a sara fɔ ka kɛɲɛ ni a ɲuman wala a juguman ye. Sarakalasebaa ye kunmabɔ sara min fɔ, a kaɲɛnabɔ ka kɛɲɛ ni o ye.
[13] Nka ni bagantigi b'a fɛ ka a kunmabɔ, a ka i ka kunmabɔ sara fɔlen tila duurunan fara a kunmabɔ sara kan.
[14] «Ni mɔgɔ dɔ bɛ a ka so bila ka a saniya Matigi ye, o tuma la sarakalasebaa ka a sara fɔ ka kɛɲɛ ni a ɲuman wala a juguman ye. Sarakalasebaa ye sara min fɔ, a ka to ten.
[15] Mɔgɔ min ye a ka so bila ka a saniya, ni a b'a fɛ ka a ka so kunmabɔ, o tuma la a ka i ka sara fɔlen tila duurunan fara a sara kan, a na kɛ a ta ye.
[16] «Ni cɛ dɔ b'a fɛ ka a ciyɛn foro dɔ bila ka a saniya Matigi ye, i ka a sara fɔ ka kɛɲɛ ni o foro la danni si ye. Kilo kɛmɛ saba orje si bɛ dan foro min na, o sara na kɛ sikle biduuru ye.
[17] Ni a bɛ a ka foro bila k'a saniya k'a daminɛ jubile san na, i ye sara min fɔ, a ka to ten.
[18] Nka ni a ye a ka foro bila k'a saniya jubile san tɛmɛnnen kɔ, san tɔ minw tora sani jubile ka se, sarakalasebaa ka a sara fɔ a ye ka kɛɲɛ ni o sanw dama ye. Dɔ na bɔ i ka sara fɔlen na.
[19] Mɔgɔ min ye a ka foro bila k'a saniya, ni o b'a fɛ ka a kunmabɔ, a ka i ka sara fɔlen tila duurunan fara a sara kan. A na kɛ a ta ye, a tɛ yɛlɛma.
[20] Ni a t'a fɛ ka o foro kunmabɔ, wala ni a ye o foro feere mɔgɔ wɛrɛ ma, a tɛna kunmabɔ tun.
[21] Nka ni o foro sanbaa bɔra a la jubile san na, a na kɛ senuma ye Matigi ye, foro bilalen don kudayi. A na kɛ sarakalasebaa ta ye.
[22] «Mɔgɔ ye foro min san, ni a yɛrɛ ciyɛn foro tɛ, ni a ye o bila k'a saniya Matigi ye,
[23] o tuma la i ka sara fɔlen tɔ min tora sani jubile san ka se, sarakalasebaa ka o jate. O tigi ka i ka sara fɔlen wari di o don na ka a kɛ senuma ye Matigi ye.
[24] Jubile san na, o foro sanna mɔgɔ min fɛ ka kɔrɔ, o min ciyɛn tun don, a ka segin o tigi ma.
[25] «I ka sara fɔlenw bɛɛ ka kɛɲɛ ni yɔrɔ senuma sikle ye. Gera mugan ye sikle kelen ye.
[26] «Bagan den fɔlɔ min ye Matigi ta ye ka ban, sabu den fɔlɔ don, mɔgɔ si kana o bila k'a saniya, ni a kɛra misi wala saga ye, katuguni Matigi ta don.
[27] Ni bagan nɔgɔlen ko don, a tigi ka a kunmabɔ ka kɛɲɛ ni i ka sara fɔlen ye, ka o sara tila duurunan fara a kan. Ni a ma kunmabɔ, a ka feere ka kɛɲɛ ni i ka sara fɔlen ye.
[28] «Mɔgɔ ye a bolo fɛn min bila Matigi ye kudayi, bagan fara mɔgɔ kan ani a yɛrɛ ciyɛn foro, fɛn o fɛn bilara ten, o si kana feere, o si kana kunmabɔ. Fɛn minw bilara kudayi, olu bɛɛ ye fɛn senuma senumaw ye Matigi ye.
[29] Hali mɔgɔ fɛn o fɛn bilara kudayi, o si kana kunmabɔ. O ka faga.
[30] «Dugukolo jaka bɛɛ, ni a kɛra sɛnɛkɛ suman wala jiriden ye, o ye Matigi ta ye. A senuma don Matigi ye.
[31] Ni mɔgɔ dɔ b'a fɛ ka a ka jaka dɔ kunmabɔ, a ka a tila duurunan fara a kan.
[32] Bagan jaka bɛɛ, fɛn o fɛn bɛ tɛmɛn bere kɔrɔ, bagan misɛn fara misiw kan, olu bɛɛ jaka ka kɛ senuma ye Matigi ye.
[33] A tigi kana a lajɛ yala a ka ɲi, yala a manɲi, a kana a falen fana. Ni a y'a falen, minw falennaɲɔgɔn na, olu fila bɛɛ ye fɛn senuma ye. U kana kunmabɔ.»
[34] Matigi ye ci minw fɔ Musa ye Sinayi kulu kan, ko a ka u lase Israɛl bɔnsɔn ma, olu don.