[1] «Ni mɔgɔ dɔ welela seereya la, ko a ka tiɲɛ fɔ Ala ɲɛ kɔrɔ, nka a ye ko min ye ani a ye ko min mɛn, a ma sɔn ka o fɔ, o ye jurumu ye. O tigi ka tilenbaliya na kɛ a yɛrɛ kun.
[2] Ni mɔgɔ dɔ magara fɛn nɔgɔlen dɔ la, i n'a fɔ dantan fɛn su, ni a kɛra kungo kɔnɔ fɛn nɔgɔlen su ye, wala fɛn fofota nɔgɔlen su, k'a sɔrɔ a ma bɔ o seere ma, a yɛrɛ na nɔgɔ ka jalaki.
[3] Ni a magara mɔgɔ ka nɔgɔlenya sifa o sifa la, k'a sɔrɔ a ma bɔ o seere ma, ni a ye o dɔn tuma min na, o tuma la a na jalaki.
[4] Ni mɔgɔ dɔ da tɛliyara ka i kali ko a na ko jugu dɔ kɛ wala ka ko ɲuman kɛ, mɔgɔ da bɛ tɛliya ka i kali fɛn o fɛn na, k'a sɔrɔ a ma i miiri a la, ni a ye o dɔn tuma min na, a na jalaki o ko la.
[5] «Ni mɔgɔ min jalakira o kow dɔ la, o ka jɔ a ka jurumu kɛlen na.
[6] O kɔ, a ka na Matigi ma ni a ka jurumu kɛlen jalaki yafa saraka ye. A ka bagan musoma dɔ bɔ, sagamuso wala bamuso, k'a kɛ jurumu yafa saraka ye. Sarakalasebaa ka a ka jurumu kɛlen kafari.
[7] «Ni a ma se ka saga wala ba sɔrɔ, a ka na ni a ka jurumu kɛlen jalaki yafa saraka ye Matigi ma, ntubanni fila wala jɛnɛntubanden fila. Kelen ka kɛ jurumu yafa saraka ye, kelen ka kɛ saraka jenita ye.
[8] A ka na ni u ye sarakalasebaa ma, o ka jurumu yafa saraka fɔlɔ lase. Sarakalasebaa ka o kan tigɛ ni a sɔnin ye, nka a kana a kunkolo bɔ a la.
[9] A ka o jurumu yafa saraka joli dɔ seriseri saraka bɔlan kɛrɛ la. A joli tɔ bɛɛ ka seri saraka bɔlan ju kɛrɛ la. Jurumu yafa saraka don.
[10] A ka kɔnɔ filanan lase ka kɛ saraka jenita ye ka kɛɲɛ ni cogo latigɛlen ye. Sarakalasebaa ka o mɔgɔ ka jurumu kɛlen kafari, yafa na kɛ a ma.
[11] «Nka ni a ma se ka ntubanni fila wala jɛnɛntubanden fila sɔrɔ, a ka na ni a ka saraka ye a ka jurumu kɛlen kosɔn, mugu tɛntɛnnen kilo kelen ka o kɛ jurumu yafa saraka ye. A kana tulu kɛ a kan, a kana wusulan suma duman fara a kan, katuguni jurumu yafa saraka don.
[12] A ka na n'a ye sarakalasebaa yɔrɔ. Sarakalasebaa ka boloɲɛ kelen mugu bɔ a la. Hakili jigin fɛn don o saraka la. A ka a jeni saraka bɔlan kan, i ko Matigi ka tasuma la sarakaw. Jurumu yafa saraka don.
[13] A ye jurumu kɛ ko min na, sarakalasebaa ka a ka jurumu kafari, yafa na kɛ a ma. O saraka tɔ tolen na kɛ sarakalasebaa ta ye i ko mugu saraka.»
[14] Matigi kumana Musa fɛ ko:
[15] «Fɛn min bilara Matigi ye, ni mɔgɔ dɔ filila ka hakɛma ko kɛ o kow la ka jurumu kɛ, a ka na ni a ka jalaki yafa saraka ye Matigi ma. O ka kɛ sagajigi fiɲɛntan kelen ye ka bɔ sagakulu la ka kɛɲɛ ni i ka sɔngɔ fɔlen ye warijɛ siklew la ka kɛɲɛ ni yɔrɔ senuma sikle ye.
[16] A ye hakɛma ko min kɛ o ko senuma ko la, a ka o sara ka a tila duurunan fara a kan ka a di sarakalasebaa ma. Sarakalasebaa ka a ka jurumu kafari ni o jalaki yafa saraka sagajigi ye, yafa na kɛ a ma.
[17] «Ni mɔgɔ dɔ ye jurumu kɛ Matigi ka ci fɔlenw ko la, hali ni a ma bɔ o seere ma, a jalaki don. A ka tilenbaliya na kɛ a yɛrɛ kun.
[18] Sagajigi fiɲɛntan min sɔngɔ bɛ kɛɲɛ ni i ka sɔngɔ fɔlen ye, a ka na ni o ye sarakalasebaa ma k'a kɛ jalaki yafa saraka ye. A filila ka hakɛma ko kɛ ko min na, k'a sɔrɔ a ma bɔ o seere ma, sarakalasebaa ka a ka jurumu kafari, yafa na kɛ a ma.
[19] O ye jalaki yafa saraka ye, a jalaki don Matigi ɲɛ kɔrɔ.»
[20] Matigi kumana Musa fɛ ko:
[21] «Ni mɔgɔ dɔ ye jurumu kɛ ka tilenbaliya ko kɛ Matigi ɲɛ kɔrɔ, ni a ye nkalon tigɛ a mɔgɔɲɔgɔn ye fɛn kalifalen ko la a ma, wala tɔnɔmada ko la wala fɛn sonyalen ko la, wala ni a ye fɛn bɔsi a la ni fanga ye,
[22] ni a ye fɛn tununnen ye ka i kali nkalon kan o ko la, ni a ye mɔgɔ ka jurumu kɛta fɛn o fɛn kɛ,
[23] ni a ye jurumu kɛ ka jalaki ko dɔ la, a ka o sara. A ye fɛn min sonya, wala a ye fɛn min sɔrɔ fanga digili la, wala fɛn min kalifalen bɛ a ma, wala a ye fɛn tununnen min ye,
[24] wala ni a ye i kali nkalon kan fɛn dɔ ko la, a ka o bɛɛ sara. A ka a tila duurunan fara a kan ka a di a tigi ma, ni a ye a ka jalaki yafa saraka bɔ don min na.
[25] A ka sagajigi fiɲɛntan bɔ a ka sagakulu la ka kɛɲɛ ni i ka sɔngɔ fɔlen ye, ka na ni o ye sarakalasebaa ma k'a kɛ jalaki yafa saraka ye Matigi ye.
[26] Sarakalasebaa ka a ka jurumu kafari Matigi ɲɛ kɔrɔ. A ye jalakima ko fɛn o fɛn kɛ, o na yafa a ma.»