[1] Aron denkɛ fila madonna Matigi la ka sa, u salen kɔ, Matigi kumana Musa fɛ.
[2] Matigi y'a fɔ Musa ye ko: «I ka kuma i kɔrɔkɛ Aron fɛ ko a kana don yɔrɔ senuma kɔnɔ tuma bɛɛ, so cɛtigɛ fini kɔ fɛ, wagande kan jurumu kafari yɔrɔɲɛ fɛ, walisa a kana na sa, katuguni ne na ne yɛrɛ jira sankaba la jurumu kafari yɔrɔ sanfɛ.
[3] «Aron ka don yɔrɔ senuma kɔnɔ cogo min na, o filɛ nin ye. A ka na ni jurumu yafa saraka ntura bɔlan ni saraka jenita sagajigi ye.
[4] A ka a ka lenfu turuti senuma don a kan na ka a ka lenfu kurusi don a fari la, ka a cɛ siri ni lenfu cɛ sirilan ye. Lenfu jalamugu ka don a kun na. Olu ye a ka fini senumaw ye. A ka i ko ji la ka o finiw don a kan na.
[5] A ka bakɔrɔ fila minɛ Israɛl bɔnsɔn jama fɛ ka u kɛ jurumu yafa saraka ye ka sagajigi kelen minɛ k'a kɛ saraka jenita ye.
[6] Aron ka na ni a yɛrɛ ka jurumu yafa saraka ntura ye ka a yɛrɛ ni a ka so ka jurumu kafari.
[7] A ka na ni o bakɔrɔ fila ye ka u bila Matigi ɲɛ kɔrɔɲɔgɔn kunbɛn finiso da la.
[8] Aron ka kalaw da o bakɔrɔ fila kan. Kala kelen ka kɛ Matigi ta ye, kala kelen ye bakɔrɔ bilata ta ye.
[9] Matigi ka kala dara bakɔrɔ min kan, Aron ka na ni o ye ka a lase k'a kɛ jurumu yafa saraka ye.
[10] Bakɔrɔ bilata ka kala dara bakɔrɔ min kan, o ɲɛnama ka bila Matigi ɲɛ kɔrɔ, walisa jurumu ka kafari o kan. A ka bila ka taa kungokolon kɔnɔ ka kɛ bakɔrɔ bilata ye.
[11] «Aron ka na ni a yɛrɛ ka jurumu yafa saraka ntura ye ka a yɛrɛ ni a ka so ka jurumu kafari ka a yɛrɛ ka jurumu yafa saraka ntura kan tigɛ.
[12] A ka wusulan dagaɲɛ kelen takami bɔ saraka bɔlan kan tasuma la Matigi ɲɛ kɔrɔ ka wusulan suma duman susulen boloɲɛ fila ta ka na n'a ye so cɛtigɛ fini kɔ fɛ.
[13] Aron ka o wusulan suma duman kɛ tasuma la Matigi ɲɛ kɔrɔ, walisa jurumu kafari yɔrɔ min bɛ layidu wagande kan, wusulan sisi ka o datugu, walisa Aron kana na sa.
[14] A ka ntura joli dɔ ta ka a seriseri ni a bolonkɔni ye jurumu kafari yɔrɔ kan a kɔrɔn yanfan fɛ. A ka o joli dɔ seriseri ni a bolonkɔni ye siɲɛ wolonwula jurumu kafari yɔrɔɲɛ fɛ.
[15] «O kɔ, a ka mɔgɔw ka jurumu yafa saraka bakɔrɔ kan tigɛ ka na ni o joli ye so cɛtigɛ fini kɔ fɛ. A ye ntura kɛ cogo min na, a ka o bakɔrɔ joli fana kɛ ten ka a seriseri jurumu kafari yɔrɔ kan jurumu kafari yɔrɔɲɛ fɛ.
[16] A ka jurumu kafari o yɔrɔ senuma ye, Israɛl bɔnsɔn ka nɔgɔlenya kow ni u ka sariya tiɲɛnni kow ni u ka jurumuw bɛɛ kosɔn. Ɲɔgɔn kunbɛn finiso min sigilen bɛ u fɛ u ka nɔgɔlenya kow cɛma, a ka o ɲɔgɔn kɛ o fana ye.
[17] A bɛ don yɔrɔ senuma kɔnɔ ka jurumu kafari tuma min na, mɔgɔ si kana sɔrɔɲɔgɔn kunbɛn finiso kɔnɔ o tuma la, sani a ka bɔ o yɔrɔ la. A na a yɛrɛ ka jurumu ni a ka so mɔgɔw ka jurumu ani Israɛl jama bɛɛ ka jurumu kafari.
[18] A bɔlen kɔ, saraka bɔlan min bɛ Matigi ɲɛ kɔrɔ, a ka taa yen ka jurumu kafari o ye ka ntura joli dɔ ni bakɔrɔ joli dɔ ta k'a kɛ saraka bɔlan biɲɛkolow fan bɛɛ kan.
[19] O kɔ, a ka o joli dɔ seriseri saraka bɔlan kan ni a bolonkɔni ye siɲɛ wolonwula ka a jɛya ka a saniya ka Israɛl bɔnsɔn ka nɔgɔlenya kow bɔ a la.
[20] «A tilalen kɔ jurumu kafarili la yɔrɔ senuma niɲɔgɔn kunbɛn finiso ni saraka bɔlan ye, a ka bakɔrɔɲɛnama madon.
[21] Aron ka a bolo fila da o bakɔrɔɲɛnama kunkolo kan ka jɔ Israɛl bɔnsɔn ka tilenbaliya kow bɛɛ ani u ka sariya tiɲɛnni kow bɛɛ ani u ka jurumuw bɛɛ la ka u bɛɛ da bakɔrɔ kun kan. O kɔ, a ka a bila ka taa kungo kɔnɔ cɛɲɛnatɔmɔlen bolo.
[22] O bakɔrɔ ka u ka tilenbaliya kow bɛɛ doni ka taa ni u ye fo yɔrɔ lankolon na. O bakɔrɔ na gɛn ka taa kungo kɔnɔ.
[23] «O kɔ, Aron ka donɲɔgɔn kunbɛn finiso kɔnɔ. A ye lenfu fini minw don a la a don tuma la yɔrɔ senuma kɔnɔ, a ka olu bɔ ka u bila yen.
[24] A ka i ko ji la yɔrɔ senuma dɔ la ka a yɛrɛ ka finiw don a la ka bɔ yen. A ka a yɛrɛ ka saraka jenita ni mɔgɔw bɛɛ ka saraka jenita lase ka a yɛrɛ ni mɔgɔw bɛɛ ka jurumu kafari.
[25] A ka jurumu yafa saraka kɛn jeni saraka bɔlan kan.
[26] «Cɛ min ye bakɔrɔ bilalen gɛn ka taa, o ka a ka finiw ko ka a yɛrɛ ko ji la. O kɔ, a na segin bugufyɛ la.
[27] «Jurumu yafa saraka ntura ani jurumu yafa saraka bakɔrɔ minw joli donna yɔrɔ senuma la ka jurumu kafari, u ka taa ni olu ye bugufyɛ kɔ fɛ ka u wolo ni u sogo ni u bo jeni ni tasuma ye.
[28] Mɔgɔ min ye u jeni, o ka a ka finiw ko ka a yɛrɛ ko ji la. O kɔ, a na segin bugufyɛ la.
[29] «Nin na kɛ sariya wulibali ye aw ye. San kalo wolonwulanan tile tannan don, aw ka sun, aw kana baara si kɛ o don na, siginfɛ fara dugulen kan,
[30] katuguni aw ka jurumu na kafari o don na ka aw jɛya. Aw ka jurumu bɛɛ na bɔ aw la Matigi ɲɛ kɔrɔ.
[31] O don ye lafiɲɛ don ye aw ye. Aw ka aw lafiya ka aw sun fana. O ye sariya wulibali ye.
[32] «Sarakalasebaa min munna ka bila sarakalasebaaya la a fa nɔ na, o ka jurumu kafari. A ka lenfu finiw don a la, o fini senumaw kɔni.
[33] A ka jurumu kafari yɔrɔ senuma senuma ye, ka jurumu kafariɲɔgɔn kunbɛn finiso ni saraka bɔlan ye, ka sarakalasebaaw ni jama bɛɛ ka jurumu kafari fana.
[34] O na kɛ sariya wulibali ye aw ye ka Israɛl bɔnsɔn ka jurumu bɛɛ kafari siɲɛ kelen san o san.» Matigi ye min fɔ Musa ye, a ye o kɛ.