[1] Matigi ko Musa ka nin ci fɔ Aron ni a denkɛw ye, ko:
[2] «Nin ye sariya ye saraka jenita ko la. Saraka jenita ka si saraka bɔlan kan, tasuma manalen ka to saraka bɔlan kan.
[3] Sarakalasebaa ka a ka lenfu fini don a kan na ka a ka lenfu kurusi don a fari la. Tasuma ye saraka jenita min jeni saraka bɔlan kan, sarakalasebaa ka o bugurijɛ cɛ ka a bila saraka bɔlan kɛrɛ fɛ.
[4] O kɔ, a ka o finiw bɔ a kan na ka fini dɔ wɛrɛw don ka taa ni o bugurijɛ ye bugufyɛ kɔ fɛ yɔrɔ jɛlen dɔ la.
[5] Saraka bɔlan kan tasuma manalen ka to yen, a kana sa. Sɔgɔma o sɔgɔma sarakalasebaa ka dɔgɔ dɔ don a la ka saraka jenita labɛn a kan ka nisɔndiya saraka la kɛn jeni a kan.
[6] Tasuma manalen ka to saraka bɔlan kan tuma bɛɛ, a kana sa.
[7] «Nin ye sariya ye mugu saraka ko la. Aron denkɛw ka o lase Matigi ɲɛ kɔrɔ saraka bɔlanɲɛ fɛ.
[8] Sarakalasebaa ka boloɲɛ kelen ta mugu tɛntɛnnen ni a tulu la ka wusulan suma duman bɛɛ fara o kan. A ka olu bɛɛ jeni saraka bɔlan kan. O ye hakili jigin fɛn ye o saraka la. O suma ka di Matigi ye.
[9] Aron ni a denkɛw ka saraka mugu tɔ tolen dun. U ka a fununbali dun yɔrɔ senuma dɔ la, ɲɔgɔn kunbɛn finiso dukɛnɛ la.
[10] Funun fɛn kana kɛ mugu saraka la ka a wusu. Ne y'a kɛ u niyɔrɔ ye ka bɔ ne ka tasuma la sarakaw la. Fɛn senuma senuma don, i ko jurumu yafa saraka ni jalaki yafa saraka.
[11] Aron denkɛw bɛɛ kelen-kelen ka a dun. O ye sariya wulibali ye aw bɔnsɔn nataw bɛɛ kan Matigi ka tasuma la sarakaw ko la. Ni mɔgɔ o mɔgɔ magara u la, o na kɛ mɔgɔ senuma ye.»
[12] Matigi kumana Musa fɛ ko:
[13] «Aron ni a denkɛw ka saraka fɛn min di Matigi ma u munli don na, o filɛ nin ye. Mugu tɛntɛnnen kilo kelen, o ye don o don mugu saraka ye. A tilancɛ bɛ bɔ sɔgɔma da fɛ, a tɔ bɛ bɔ wula da fɛ.
[14] A ka dila ni tulu ye furufuru jiran faa kɔnɔ. I ka na ni a jirannen ye. I ka mugu saraka mɔnnen kunkurunw lase, o suma ka di Matigi ye.
[15] Aron denkɛw la kelen min bɛna kɛ sarakalasebaa ye a nɔ na, o ka a lase. Sariya wulibali don.
[16] A bɛɛ ka jeni Matigi ye. Sarakalasebaa ka mugu sarakaw bɛɛ kelen-kelen ka jeni ka u ban pewu, u kana dun.»
[17] Matigi ko Musa ka nin kuma fɔ Aron ni a denkɛw ye ko:
[18] «Nin ye sariya ye jurumu yafa saraka ko la. Saraka jenita bɛ kan tigɛ yɔrɔ min na, jurumu yafa saraka ka kan tigɛ yen Matigi ɲɛ kɔrɔ. Fɛn senuma senuma don.
[19] Sarakalasebaa min bɛ jurumu yafa saraka lase, o yɛrɛ ka a dun. A ka a dun yɔrɔ senuma la, ɲɔgɔn kunbɛn finiso dukɛnɛ la.
[20] Ni fɛn o fɛn magara o sogo la, o na kɛ fɛn senuma ye. Ni a joli serila fɛn dɔ kan, a serila fini min kan, i ka o ko yɔrɔ senuma dɔ la.
[21] Ni a sogo balabalala bɔgɔ daga kɔnɔ, o ka ci. Ni a balabalala nsiranɛgɛ daga kɔnɔ, o ka josi kosɛbɛ ka sananko ji la.
[22] Sarakalasebaa cɛmaw bɛɛ ka a dun. Fɛn senuma senuma don.
[23] Jurumu yafa saraka min joli dɔ bɛ ladonɲɔgɔn kunbɛn finiso kɔnɔ ka jurumu kafari yɔrɔ senuma la, o si kana dun. A bɛɛ ka jeni ni tasuma ye.