[1] A tile seginnan don Musa ye Aron ni a denkɛw ni Israɛl cɛkɔrɔbaw wele.
[2] A y'a fɔ Aron ye ko: «I ka ntura bɔlan kelen kɛ jurumu yafa saraka ye ka sagajigi kɛ saraka jenita ye ka u lase Matigi ɲɛ kɔrɔ, u fila bɛɛ ka kɛ fiɲɛntan ye.
[3] I ka kuma Israɛl bɔnsɔn fɛ ko u ka bakɔrɔ kelen kɛ jurumu yafa saraka ye ka san kelen misiden ni san kelen sagajigi kɛ saraka jenita ye, u bɛɛ ka kɛ fiɲɛntan ye.
[4] U ka ntura kelen ni sagajigi kelen kɛ nisɔndiya sarakaw ye ka u kan tigɛ Matigi ɲɛ kɔrɔ. U ka na ni mugu saraka ye, tulu kaɲaami o la, k'a masɔrɔ Matigi na i jira aw la bi.»
[5] Musa ye fɛn minw ko fɔ, u nana ni olu ye ɲɔgɔn kunbɛn finisoɲɛ fɛ. Jama bɛɛ y'u madon ka u jɔ Matigi ɲɛ kɔrɔ.
[6] Musa ko: «Matigi y'a fɔ ko aw ka min kɛ, o filɛ nin ye. O kɛlen kɔ, Matigi nɔɔrɔ na i jira aw la.»
[7] Musa y'a fɔ Aron ye ko: «I madon saraka bɔlan na ka i ka jurumu yafa saraka ni i ka saraka jenita lase ka i yɛrɛ ni mɔgɔw bɛɛ ka jurumu kafari. I ka mɔgɔw ka saraka fɛnw lase fana ka u ka jurumu kafari, i ko Matigi y'a fɔ cogo min na.»
[8] Ayiwa, Aron y'i madon saraka bɔlan na ka a yɛrɛ ka jurumu yafa saraka misiden kan tigɛ.
[9] Aron denkɛw ye o joli don a bolo. A ye a bolonkɔni su o joli la ka a da saraka bɔlan biɲɛkolow kan ka o joli tɔ seriseri saraka bɔlan ju kɛrɛ la.
[10] O jurumu yafa saraka kɛn ni a kɔla kuru fila ani a biɲɛ, a ye olu jeni saraka bɔlan kan, i ko Matigi y'a fɔ Musa ye cogo min na.
[11] Nka a ye a sogo ni a wolo jeni ni tasuma ye bugufyɛ kɔ fɛ.
[12] A ye saraka jenita kan tigɛ. Aron denkɛw ye o joli don a bolo. A y'o seriseri saraka bɔlan fan bɛɛ kan.
[13] U ye saraka jenita sogo warakalen ani o kunkolo don a bolo. A ye u jeni saraka bɔlan kan.
[14] A ye a kɔnɔ fɛnw ni a senw ko ji la ka u jeni saraka jenita kan saraka bɔlan kan.
[15] O kɔ, a nana ni mɔgɔw bɛɛ ka saraka ye ka mɔgɔw bɛɛ ka jurumu yafa saraka bakɔrɔ kan tigɛ ka a lase jurumu kosɔn i ko fɔlɔ ta.
[16] O kɔ, a nana ni mɔgɔw bɛɛ ka saraka jenita ye ka o lase ka kɛɲɛ ni a cogo latigɛlen ye.
[17] A nana ni mugu saraka ye ka a boloɲɛ kelen ta o la ka a jeni saraka bɔlan kan ka a fara sɔgɔma saraka jenita kan.
[18] A ye mɔgɔw bɛɛ ka nisɔndiya saraka ntura ni sagajigi fana kan tigɛ. Aron denkɛw ye olu joli don a bolo. A y'o seriseri saraka bɔlan fan bɛɛ kan.
[19] A ye ntura ni sagajigi kɛn ni a kukala ni kɛn falafala ni kɔla kuru fila ani a biɲɛ fana don a bolo.
[20] U ye o kɛn da disiw kan, Aron ye o kɛn jeni saraka bɔlan kan.
[21] Aron ye o disiw ni kininfɛ woro finifana Matigi ɲɛ kɔrɔ ka a kɛ saraka finifanata ye, i ko Musa y'a fɔ cogo min na.
[22] Aron ye a bolo kɔrɔta mɔgɔw bɛɛ fan fɛ ka dubaw kɛ u ye. O kɔ, a jiginna ka bɔ yen jurumu yafa saraka ni saraka jenita ani nisɔndiya saraka laselen kɔ.
[23] Musa ni Aron donnaɲɔgɔn kunbɛn finiso kɔnɔ. U bɔra yen tuma min na, u ye dubaw kɛ mɔgɔw ye. O kɔ, Matigi nɔɔrɔ ye i jira mɔgɔw bɛɛ la.
[24] Tasuma bɔra Matigi ɲɛ kɔrɔ ka saraka jenita ni kɛn jeni saraka bɔlan kan. Mɔgɔw bɛɛ ye o ye tuma min na, u ye ɲagalikanba bɔ ka u bi ka u ɲɛ biri duguma.