[1] Aron denkɛw Nadab ni Abihu ye u ka wusulan dagaw ta ka tasuma kɛ u kɔnɔ ka wusulan suma duman kɛ o kan ka na ni tasuma sure ye Matigi ɲɛ kɔrɔ, k'a sɔrɔ o tun ma fɔ u ye.
[2] Ayiwa, tasuma bɔra Matigi ɲɛ kɔrɔ ka u jeni ka u faga. U sara Matigi ɲɛ kɔrɔ.
[3] Musa y'a fɔ Aron ye ko: «Matigi ye min fɔ, o filɛ nin ye, ko: ‹Mɔgɔ minw bɛ u madon ne la, ne b'a fɛ olu ka ne ka senumaya bonya, ne na bonya sɔrɔ mɔgɔw bɛɛ ɲɛ na.›» Aron ye i makun.
[4] Musa ye Misaɛl ni Elzafan wele, Aron fa balimakɛ Uziɛl denkɛw don. A y'a fɔ u ye ko: «Aw ka aw madon ka aw balimakɛw suw ta ka u bɔ yɔrɔ senuma la ka taa ni u ye bugufyɛ kɔ fɛ.»
[5] Olu ye u madon ka o suw ta ka u ka finiw to u la ka taa ni u ye bugufyɛ kɔ fɛ, i ko Musa y'a fɔ cogo min na.
[6] Musa y'a fɔ Aron ni a denkɛw Eleazar ni Itamar ye ko: «Aw kana aw kun lankolon bila, aw kana aw ka finiw fara, walisa aw kana na sa ani Matigi kana na dimin jama bɛɛ kɔrɔ. Aw k'a to aw balimaw, Israɛl ka so bɛɛ ka Matigi ka mɔgɔ jenilenw su kasi.
[7] Aw kana bɔɲɔgɔn kunbɛn finiso da la, walisa aw kana na sa, katuguni Matigi ka munli tulu bɛ aw la.» U y'a kɛ ka kɛɲɛ ni Musa ka kuma fɔlen ye.
[8] Matigi kumana Aron fɛ ko:
[9] «Ni i yɛrɛ ni i denkɛw bɛ donɲɔgɔn kunbɛn finiso kɔnɔ tuma min na, aw kana diwɛn wala minni fɛn farinma min, walisa aw kana na sa. O ye sariya wulibali ye aw bɔnsɔnw bɛɛ kan,
[10] walisa aw ka faranfasi don fɛn saniyalen ni fɛn saniyabali cɛ, ani fɛn nɔgɔlen ni fɛn jɛlen cɛ,
[11] walisa Matigi ye sariya sigilen minw fɔ Israɛl bɔnsɔn ye Musa da la, aw ka u kalan olu bɛɛ la.»
[12] Musa kumana Aron ni a denkɛ tɔw Eleazar ni Itamar fɛ ko: «Saraka mugu tɔ min tora ka bɔ Matigi ka tasuma la sarakaw la, aw ka o ta ka a fununbali dun saraka bɔlan kɛrɛ fɛ, o ye senuma senuma ye.
[13] Aw ka a dun yɔrɔ senuma dɔ la, i yɛrɛ ni i denkɛw niyɔrɔ don ka bɔ Matigi ka tasuma la sarakaw la. O ci fɔra ne ye o cogo la.
[14] Aw ka disi finifanata ni woro kɔrɔtata fana dun yɔrɔ jɛlen na, i yɛrɛ ni i denkɛw ani i denmusow ɲɔgɔn fɛ, katuguni olu dira ka kɛ i yɛrɛ ni i denkɛw niyɔrɔ ye ka bɔ Israɛl bɔnsɔn ka nisɔndiya sarakaw la.
[15] U ka na ni woro kɔrɔtata ni disi finifanata ye, ani tasuma la sarakaw kɛn, ka u finifana Matigi ɲɛ kɔrɔ ka kɛ saraka finifanata ye. Olu na kɛ i yɛrɛ ni i denkɛw ta ye. O ye sariya wulibali ye, i ko Matigi y'a fɔ cogo min na.»
[16] Musa ye jurumu yafa saraka bakɔrɔ ko ma ɲininkali kɛ. A y'a sɔrɔ o jenina ka ban. O tuma la a diminna Aron denkɛ tɔw Eleazar ni Itamar kɔrɔ. A ko:
[17] «Mun y'a to aw ma jurumu yafa saraka sogo dun yɔrɔ senuma la, katuguni a senuma don? Matigi y'a di aw ma, walisa aw ka jama ka tilenbaliya doni ta, ka u ka jurumu kafari Matigi ɲɛ kɔrɔ.
[18] A filɛ sa, saraka fɛn joli ma ladon yɔrɔ senuma kɔnɔ. Aw tun ka kan ka a dun yɔrɔ senuma kɔnɔ, i ko ne y'a fɔ aw ye cogo min na.»
[19] Aron y'a fɔ Musa ye ko: «A filɛ, Israɛl bɔnsɔn ye u ka jurumu yafa saraka ni u ka saraka jenita lase Matigi ɲɛ kɔrɔ bi. Ko minw kɛra ne la, ni ne tun ye jurumu yafa saraka dun bi, o tun na diya Matigi ye wa?»
[20] Musa ye o mɛn tuma min na, o diyara a ye.