[1] Matigi kumana Musa fɛ ko:
[2] «Nin ye sariya ye kunatɔ ko la a jɛyali don na. U ka na n'a ye sarakalasebaa yɔrɔ.
[3] Sarakalasebaa ka bɔ ka taa bugufyɛ kɔ fɛ. Sarakalasebaa ka a filɛ. Ni a y'a ye ko kunatɔ ka bana kɛnɛyara,
[4] sarakalasebaa k'a fɔ ko u ka na ni kɔnɔ jɛlen ɲɛnama fila ye o mɔgɔ jɛyata kosɔn. U ka sedere jiri dɔ ni gaari bilenman ani hisope jiri fura fana ta.
[5] Sarakalasebaa k'a fɔ ko u ka o kɔnɔw la kelen kan tigɛ bɔgɔ daga kɔnɔ ji woyota kun na.
[6] Sarakalasebaa ka o kɔnɔ ɲɛnama tɔ kelen ni sedere jiri dɔ ani gaari bilenman ani hisope jiri fura fana ta, a ka olu su o kɔnɔ fagalen joli la, o min fagara ji woyota kun na.
[7] A ka seriserili kɛ o kunatɔ jɛyata kan siɲɛ wolonwula k'a fɔ ko a jɛlen don. O kɔ, a ka o kɔnɔ ɲɛnama bila ka taa kungo kɔnɔ.
[8] «O mɔgɔ jɛyata ka a ka finiw ko ka a fari la si bɛɛ di, ka a yɛrɛ ko ji la, a na jɛya. O kɔ, a ka segin bugufyɛ la, nka a ka sigi a ka finiso kɔ fɛ ka tile wolonwula kɛ.
[9] A tile wolonwulanan don, a ka a fari la si bɛɛ di, a kunkolo ni a bonbonsi ni a ɲɛ kan kunsi. A ka a fari la si bɛɛ di ka a ka finiw ko ka a yɛrɛ ko ji la, a na jɛya.
[10] A tile seginnan don, a ka na ni sagaden cɛma fiɲɛntan fila ye ani san kelen sagamuso fiɲɛntan kelen. A ka mugu tɛntɛnnen kilo saba ta, tulu kaɲaami o la ka kɛ mugu saraka ye. A ka tulu litiri kelen tila sabanan fana ta.
[11] Sarakalasebaa min bɛ jɛyali kɛ, o ka taa ni o mɔgɔ jɛyata ni o fɛnw bɛɛ ye Matigi ɲɛ kɔrɔɲɔgɔn kunbɛn finiso da la.
[12] «Sarakalasebaa ka na ni o sagaden cɛma kelen ye ka a lase k'a kɛ jalaki yafa saraka ye ka o tulu litiri kelen tila sabanan fana ta ka u fila bɛɛ finifana Matigi ɲɛ kɔrɔ ka kɛ saraka finifanata ye.
[13] Jurumu yafa sarakaw ni saraka jenitaw bɛ kan tigɛ yɔrɔ min na yɔrɔ senuma la, a ka o sagaden cɛma faga yen. Jurumu yafa saraka ye sarakalasebaa ta ye cogo min na, jalaki yafa saraka fana bɛ ten, a senuma senuma don.
[14] Sarakalasebaa ka jalaki yafa saraka joli dɔ ta k'a kɛ o mɔgɔ jɛyata kininfɛ tulo nunkun kan ani a kininfɛ bolonkɔni kunba kan ani a kininfɛ sennkɔni kunba kan.
[15] Sarakalasebaa ka o tulu litiri tila sabanan dɔ ta k'a kɛ a yɛrɛ numanfɛ tɛgɛ kɔnɔ.
[16] Sarakalasebaa ka a yɛrɛ kininfɛ bolonkɔni su a numanfɛ tɛgɛ kɔnɔ tulu la ka o tulu dɔ seriseri Matigi ɲɛ kɔrɔ ni a bolonkɔni ye siɲɛ wolonwula.
[17] Sarakalasebaa ka a tɛgɛ kɔnɔ tulu tɔ tolen dɔ kɛ mɔgɔ jɛyata kininfɛ tulo nunkun kan ani a kininfɛ bolonkɔni kunba kan ani a kininfɛ sennkɔni kunba kan, jalaki yafa saraka joli kɛra o yɔrɔ minw la.
[18] Sarakalasebaa ka a tɛgɛ kɔnɔ tulu tɔ tolen kɛ mɔgɔ jɛyata kun na. Sarakalasebaa ka o jurumu kafari a ye Matigi ɲɛ kɔrɔ.
[19] O kɔ, sarakalasebaa ka jurumu yafa saraka lase ka mɔgɔ jɛyata ka jurumu kafari a ka nɔgɔlenya kosɔn.
[20] O kɔ, a ka saraka jenita kan tigɛ. Sarakalasebaa ka saraka jenita ni mugu saraka lase saraka bɔlan kan. Sarakalasebaa ka o mɔgɔ ka jurumu kafari, a na jɛya.
[21] «Ni o mɔgɔ ye faantan ye, ni a ma se ka o bɛɛ sɔrɔ, a ka na ni sagaden cɛma kelen ye k'a kɛ jalaki yafa saraka finifanata ye ka a ka jurumu kafari. A ka mugu tɛntɛnnen kilo kelen ta ka tuluɲaami o la k'a kɛ mugu saraka ye ani tulu litiri tila sabanan.
[22] A ka na ni ntubanni fila wala jɛnɛntubanden fila ye ka kɛɲɛ ni a se ko ye. Kelen ka kɛ jurumu yafa saraka ye, a tɔ kelen ka kɛ saraka jenita ye.
[23] A tile seginnan don, a ka na ni o fɛnw ye sarakalasebaa yɔrɔ a jɛyali kamaɲɔgɔn kunbɛn finiso da la Matigi ɲɛ kɔrɔ.
[24] Sarakalasebaa ka jalaki yafa saraka sagaden cɛma ni tulu litiri kelen tila sabanan ta. Sarakalasebaa ka u finifana Matigi ɲɛ kɔrɔ ka kɛ saraka finifanata ye.
[25] A ka jalaki yafa saraka sagaden cɛma kan tigɛ. Sarakalasebaa ka jalaki yafa saraka joli dɔ ta k'a kɛ mɔgɔ jɛyata kininfɛ tulo kunba kan.
[26] Sarakalasebaa ka o tulu dɔ kɛ a yɛrɛ numanfɛ tɛgɛ kɔnɔ.
[27] Sarakalasebaa ka a numanfɛ tɛgɛ kɔnɔ tulu dɔ seriseri ni a kininfɛ bolonkɔni ye Matigi ɲɛ kɔrɔ siɲɛ wolonwula.
[28] Sarakalasebaa ka a tɛgɛ kɔnɔ tulu dɔ kɛ mɔgɔ jɛyata kininfɛ tulo nunkun kan ani a kininfɛ bolonkɔni kunba kan ani a kininfɛ sennkɔni kunba kan, jalaki yafa saraka joli kɛra o yɔrɔ minw la.
[29] Sarakalasebaa ka a tɛgɛ kɔnɔ tulu dɔ kɛ mɔgɔ jɛyata kun na walisa a ka a ka jurumu kafari Matigi ɲɛ kɔrɔ.
[30] O kɔ, a ka ntubanni kelen wala jɛnɛntubanden kelen bɔ, a bɛ se ka o minw sɔrɔ.
[31] Kelen ka kɛ jurumu yafa saraka ye, a tɔ kelen ka kɛ saraka jenita ye. Olu ni mugu saraka ka bɔɲɔgɔn fɛ, sarakalasebaa ka o mɔgɔ jɛyata ka jurumu kafari Matigi ɲɛ kɔrɔ.
[32] «Kuna bɛ mɔgɔ min na, ni a jɛyali fɛnw se tɛ a ye, o ye sariya ye a ko la.»
[33] Matigi kumana Musa ni Aron fɛ ko:
[34] «Ne bɛ Kanan jamana min di aw ma ka kɛ aw ta ye, ni aw sera yen tuma min na, ni ne ye bugun da aw ka jamana so dɔ la,
[35] o sotigi ka na k'a fɔ sarakalasebaa ye, ko a bɛ a kɔnɔ ko fɛn dɔ bɛ so la, i n'a fɔ bugun.
[36] Sarakalasebaa k'a fɔ ko u ka fɛn bɛɛ bɔ so kɔnɔ sani a ka don ka o bugun yɔrɔ filɛ, walisa so kɔnɔ fɛnw bɛɛ kana na nɔgɔ. O kɔ, sarakalasebaa ka don o so kɔnɔ ka a filɛ.
[37] «Sarakalasebaa ka o bugun yɔrɔ filɛ. Ni a y'a ye ko o bugun bɛ so kogow la ka dingɛ finmanw wala bilenmanw kɛ, ni a y'a ye ko a jiginnen bɛ so kogo la,
[38] a ka bɔ o so kɔnɔ ka taa so da la ka so da sɔgɔ ka tile wolonwula kɛ.
[39] O tile wolonwulanan don, sarakalasebaa ka na ko kura ka a filɛ. Ni a y'a ye ko o bugun jɛnsɛnna so kogow la,
[40] a k'a fɔ ko bugun bɛ kabakurun minw na, u ka olu bɔ yen ka u fili yɔrɔ nɔgɔlen dɔ la dugu kɔ fɛ.
[41] A k'a fɔ ko o so kɔnɔ yɔrɔ bɛɛ ka shyɛn. U bɛ bɔgɔ min shyɛn ka bɔ a la, u ka o fili dugu kɔ fɛ yɔrɔ nɔgɔlen dɔ la.
[42] U ka kabakurun dɔ wɛrɛw ta ka u don o fɔlɔtaw nɔ na, ka bɔgɔ dɔ wɛrɛ ta ka so bari.
[43] «Kabakurunw bɔlen kɔ so la ka so kɔnɔ yɔrɔ shyɛn k'a bari, ni bugun dara o so la ko kura,
[44] sarakalasebaa ka don o so kɔnɔ ka a filɛ. Ni a y'a ye ko o bugun jɛnsɛnna so kɔnɔ, o ye bugun tiɲɛnnikɛla ye so la, a nɔgɔlen don.
[45] U ka o so ci ka a kabakurunw ni a jiriw ni o so bɔgɔ bɛɛ bi ka taa ni olu ye dugu kɔ fɛ yɔrɔ nɔgɔlen dɔ la.
[46] O so da tugulen bɛ don minw na, mɔgɔ o mɔgɔ donna a kɔnɔ o donw la, o nɔgɔlen na to fo wula da fɛ.
[47] Nin mɔgɔ min dara o so kɔnɔ, o ka a ka finiw ko. Min ye dumuni kɛ o so kɔnɔ, o fana ka a ka finiw ko.
[48] «Ni sarakalasebaa donna o so kɔnɔ ka a filɛ, k'a ye ko bugun ma jɛnsɛn so la o so barilen kɔ, o tuma la sarakalasebaa k'a fɔ ko o so jɛlen don, katuguni bugun banna.
[49] A ka kɔnɔ fila ni sedere jiri dɔ ni gaari bilenman ni hisope jiri fura dɔ ta ka so jɛya.
[50] A ka kɔnɔ kelen kan tigɛ bɔgɔ daga kɔnɔ ji woyota kun na.
[51] A ka sedere jiri ni hisope jiri fura ni gaari bilenman ni o kɔnɔ ɲɛnama ta ka u su o kɔnɔ kan tigɛlen joli ni ji woyota la ka seriserili kɛ so kan siɲɛ wolonwula.
[52] A ka o so jɛya ni kɔnɔ joli ni ji woyota ni o kɔnɔ ɲɛnama ni sedere jiri ni hisope jiri fura ani gaari bilenman ye.
[53] O kɔ, a ka o kɔnɔ ɲɛnama bila ka bɔ dugu kɔnɔ ka taa kungo kɔnɔ. O cogo la a ka jurumu kafari o so ye, a na jɛya.
[54] «O ye sariya ye kuna sifaw bɛɛ ko la, ani kaba
[55] ani fini la bugun ni so la bugun
[56] ani kuru ni joli fara jalan ani yɔrɔ nugulen ko la,
[57] ka a jira ni a nɔgɔlen bɛ, wala ni a jɛlen bɛ. O ye sariya ye kuna ko la.»