[1] «Ni mɔgɔ ka saraka fɛn ye nisɔndiya saraka ye Matigi ye, ni a ye misi bɔ, ntura wala misimuso, a ka na ni o fiɲɛntan ye Matigi ɲɛ kɔrɔ.
[2] A ka a bolo da a ka saraka fɛn kunkolo kan ka a kan tigɛɲɔgɔn kunbɛn finiso da la. Sarakalasebaaw, Aron denkɛw ka a joli seriseri saraka bɔlan fan bɛɛ kan.
[3] A ka dɔ bɔ a ka nisɔndiya saraka la k'a kɛ tasuma la saraka ye Matigi ye, a kɛn falafala ni a nugula kɛn bɛɛ
[4] ani a kɔla kuru fila ni kɔla kuruw la kɛn min bɛ a solo kɛrɛ fɛ, ani a biɲɛ, a ka o bɔ kɔla kuruw fɛ.
[5] Aron denkɛw ka o jeni saraka bɔlan kan saraka jenita kan, o min bɛ tasuma la dɔgɔ kan. Tasuma la saraka don, a suma ka di Matigi ye.
[6] «Ni a bɛ Matigi sɔn ni bagan misɛn nisɔndiya saraka ye, a cɛma wala a musoma, a ka na ni o fiɲɛntan ye.
[7] Ni a ka saraka fɛn ye sagaden ye, a ka na ni o ye Matigi ɲɛ kɔrɔ.
[8] A ka a bolo da a ka saraka fɛn kunkolo kan ka a kan tigɛɲɔgɔn kunbɛn finiso da la. Aron denkɛw ka a joli seriseri saraka bɔlan fan bɛɛ kan.
[9] A ka dɔ bɔ a ka nisɔndiya saraka la k'a kɛ tasuma la saraka ye Matigi ye, a kɛn ni a kukala bɛɛ. A ka o tigɛ ka bɔ a kɔ kolo la, ani a kɛn falafala ni a nugula kɛn bɛɛ
[10] ani a kɔla kuru fila, ni kɔla kuruw la kɛn, min bɛ a solo kɛrɛ fɛ, ani a biɲɛ. A ka o bɔ kɔla kuruw fɛ.
[11] Sarakalasebaa ka o jeni saraka bɔlan kan. O ye dumuni fɛn tasuma la saraka ye Matigi ye.
[12] «Ni a ka saraka fɛn ye ba ye, a ka na ni o ye Matigi ɲɛ kɔrɔ.
[13] A ka a bolo da o kun na k'a kan tigɛɲɔgɔn kunbɛn finiso da la. Aron denkɛw ka a joli seriseri saraka bɔlan fan bɛɛ kan.
[14] A ka dɔ bɔ a la k'a kɛ tasuma la saraka ye Matigi ye, a kɛn falafala ani a nugula kɛn bɛɛ
[15] ani a kɔla kuru fila ni kɔla kuruw la kɛn, min bɛ a solo kɛrɛ fɛ, ani a biɲɛ. A ka o bɔ kɔla kuruw fɛ.
[16] Sarakalasebaa ka olu jeni saraka bɔlan kan. O ye dumuni fɛn tasuma la saraka ye. Kɛn bɛɛ ye Matigi ta ye. O suma ka di Matigi ye.
[17] Aw kana kɛn wala joli dun. O na kɛ sariya wulibali ye aw bɔnsɔn nataw bɛɛ kan aw sigi yɔrɔw bɛɛ la.»