[1] Matigi ko Musa ka nin kuma fɔ Israɛl bɔnsɔn ye ko:
[2] «Ni mɔgɔ dɔ filila ka jurumu kɛ ka Matigi ka ci fɔlen fɛn o fɛn tiɲɛn ka ko kɛbali dɔ kɛ k'a sɔrɔ a ma bɔ o kala ma, o tigi ka nin kɛ.
[3] «Ni sarakalasebaa kuntigi ye jurumu kɛ ka jalaki lase mɔgɔw bɛɛ ma, o ka ntura bɔlan fiɲɛntan bɔ k'a kɛ jurumu yafa saraka ye Matigi ye a ka jurumu kɛlen kosɔn.
[4] A ka na ni o ntura ye ɲɔgɔn kunbɛn finiso da la Matigi ɲɛ kɔrɔ. A ka a bolo da ntura kunkolo kan ka ntura kan tigɛ Matigi ɲɛ kɔrɔ.
[5] Sarakalasebaa kuntigi ka o ntura joli dɔ ta ka na n'a ye ɲɔgɔn kunbɛn finiso kɔnɔ.
[6] O sarakalasebaa ka a bolonkɔni su o joli la ka o joli seriseri siɲɛ wolonwula Matigi ɲɛ kɔrɔ yɔrɔ senuma cɛtigɛ finiɲɛ fɛ.
[7] Sarakalasebaa ka o joli dɔ kɛ o wusulan suma duman saraka bɔlan biɲɛkolow kan Matigi ɲɛ kɔrɔɲɔgɔn kunbɛn finiso kɔnɔ. A ka o joli tɔ bɛɛ seriseri saraka jenita saraka bɔlan ju kɛrɛ la, o min bɛɲɔgɔn kunbɛn finiso da la.
[8] A ka o jurumu yafa saraka ntura kɛn bɛɛ bɔ a la, a kɛn falafala ani a nugula kɛn bɛɛ
[9] ani a kɔla kuru fila ni kɔla kuruw la kɛn min bɛ a solo kɛrɛ fɛ, ani a biɲɛ. A ka o bɔ kɔla kuruw fɛ,
[10] i ko a bɔra nisɔndiya saraka ntura la cogo min na. Sarakalasebaa ka o bɛɛ jeni saraka jenita saraka bɔlan kan.
[11] Nka ntura wolo ni a sogo bɛɛ ani a kunkolo ni a senw ni a kɔnɔ nugu ani a bo,
[12] o kɔrɔ, ntura yɔrɔ bɛɛ, sarakalasebaa ka taa ni olu ye bugurijɛ bɔn yɔrɔ la bugufyɛ kɔ fɛ yɔrɔ jɛlen na. A ka a jeni tasuma la dɔgɔ kan. A ka o jeni bugurijɛ bɔn yɔrɔ la.
[13] «Ni Israɛl jama bɛɛ filila ka jurumu kɛ k'a sɔrɔ u ma bɔ a kala ma, ka Matigi ka ci fɔlen fɛn o fɛn tiɲɛn ka ko kɛbali dɔ kɛ ka u yɛrɛw jalaki,
[14] ni u ka jurumu kɛlen jirala u la tuma min na, o tuma la jama bɛɛ ka ntura bɔlan kelen bɔ ka a kɛ jurumu yafa saraka ye. U ka na n'a ye ɲɔgɔn kunbɛn finiso da la.
[15] Jama la cɛkɔrɔbaw ka u bolow da ntura kun na Matigi ɲɛ kɔrɔ, ntura ka kan tigɛ Matigi ɲɛ kɔrɔ.
[16] Sarakalasebaa kuntigi ka na ni o ntura joli dɔ ye ɲɔgɔn kunbɛn finiso kɔnɔ.
[17] Sarakalasebaa ka a bolonkɔni su o joli la ka a seriseri siɲɛ wolonwula Matigi ɲɛ kɔrɔ so cɛtigɛ finiɲɛ fɛ.
[18] A ka o joli dɔ kɛ saraka bɔlan biɲɛkolow kan, o min bɛ Matigi ɲɛ kɔrɔɲɔgɔn kunbɛn finiso kɔnɔ. A ka o joli tɔ bɛɛ seriseri saraka jenita saraka bɔlan ju kɛrɛ la, o min bɛɲɔgɔn kunbɛn finiso da la.
[19] A ka a kɛn bɛɛ bɔ a la ka o jeni saraka bɔlan kan.
[20] A ka nin ntura kɛ i ko jurumu yafa saraka ntura kɛ cogo. A ka u kɛ cogo kelen na. Sarakalasebaa ka u ka jurumu kafari, yafa na kɛ u ma.
[21] A ka taa ni o ntura ye bugufyɛ kɔ fɛ k'a jeni, i ko a ye ntura fɔlɔ jeni cogo min na. O ye jama ka jurumu yafa saraka ye.
[22] «Ni kuntigi dɔ filila ka jurumu kɛ ka Matigi ka ci fɔlen fɛn o fɛn tiɲɛn ka ko kɛbali kɛ ka jalaki,
[23] ni a ka jurumu kɛlen jirala a la tuma min na, o tuma la a ka bakɔrɔ bɔ k'a kɛ saraka ye.
[24] A ka a bolo da bakɔrɔ kunkolo kan ka a kan tigɛ saraka jenita kan tigɛ yɔrɔ la Matigi ɲɛ kɔrɔ. Jurumu yafa saraka don.
[25] Sarakalasebaa ka o jurumu yafa saraka joli dɔ ta a bolonkɔni la ka a da saraka jenita saraka bɔlan biɲɛkolow kan. A ka a joli tɔ bɛɛ seri saraka jenita saraka bɔlan ju kɛrɛ la.
[26] A ka a kɛn bɛɛ jeni saraka bɔlan kan, i ko nisɔndiya saraka la kɛn bɛ jeni cogo min na. Sarakalasebaa ka o kuntigi ka jurumu kafari, yafa na kɛ a ma.
[27] «Ni jama la mɔgɔ dɔ filila ka jurumu kɛ ka Matigi ka ci fɔlen fɛn o fɛn tiɲɛn ka ko kɛbali kɛ ka jalaki,
[28] ni a ka jurumu kɛlen jirala a la tuma min na, o tuma la a ka bamuso fiɲɛntan bɔ k'a kɛ a ka saraka ye a ka jurumu kɛlen kosɔn.
[29] A ka a bolo da o jurumu yafa saraka kunkolo kan ka jurumu yafa saraka kan tigɛ saraka jenita kan tigɛ yɔrɔ la.
[30] Sarakalasebaa ka a saraka joli dɔ ta a bolonkɔni la k'a kɛ saraka jenita saraka bɔlan biɲɛkolow kan ka a joli tɔ bɛɛ seri saraka bɔlan ju kɛrɛ la.
[31] A ka a kɛn bɛɛ bɔ a la, i ko nisɔndiya saraka kɛn bɔra a la cogo min na. Sarakalasebaa ka a jeni saraka bɔlan kan. O suma ka di Matigi ye. Sarakalasebaa ka o mɔgɔ ka jurumu kafari, yafa na kɛ a ma.
[32] «Ni a bɛ sagaden bɔ k'a kɛ a ka jurumu yafa saraka ye, a ka na ni sagamuso fiɲɛntan ye.
[33] A ka a bolo da jurumu yafa saraka kunkolo kan ka a kan tigɛ saraka jenita kan tigɛ yɔrɔ la k'a kɛ jurumu yafa saraka ye.
[34] Sarakalasebaa ka o jurumu yafa saraka joli dɔ ta a bolonkɔni la ka a da saraka jenita saraka bɔlan biɲɛkolow kan ka a joli tɔ bɛɛ seri saraka bɔlan ju kɛrɛ la.
[35] A ka a kɛn bɛɛ bɔ a la, i ko nisɔndiya saraka sagaden kɛn bɔra a la cogo min na. Sarakalasebaa ka u jeni saraka bɔlan kan i ko tasuma la sarakaw Matigi ɲɛ kɔrɔ. Sarakalasebaa ka o mɔgɔ ka jurumu kɛlen kafari, yafa na kɛ a ma.