[1] «Nin ye sariya ye jalaki yafa saraka ko la. Fɛn senuma senuma don.
[2] Saraka jenita bɛ kan tigɛ yɔrɔ min na, jalaki yafa saraka ka kan tigɛ o yɔrɔ la. A joli ka seriseri saraka bɔlan fan bɛɛ kan.
[3] A kɛn bɛɛ ka lase, a kukala ni a kɛn falafala
[4] ani a kɔla kuru fila ni kɔla kuruw la kɛn min bɛ a solo kɛrɛ fɛ, ani a biɲɛ, olu ka bɔ kɔla kuruw fɛ.
[5] Sarakalasebaa ka o bɛɛ jeni saraka bɔlan kan. Tasuma la saraka don Matigi ye. Jalaki yafa saraka don.
[6] Sarakalasebaa bɔnsɔn cɛma bɛɛ ka o dun. A ka dun yɔrɔ senuma dɔ la, fɛn senuma senuma don.
[7] Jurumu yafa saraka bɛ kɛ cogo min na, jalaki yafa saraka fana bɛ kɛ o cogo la. U fila bɔ cogo sariya ye kelen ye. Sarakalasebaa min bɛ jurumu kafari n'a ye, a na kɛ o ta ye.
[8] Sarakalasebaa min bɛ mɔgɔ ka saraka jenita lase, o saraka jenita laselen wolo na kɛ o sarakalasebaa yɛrɛ ta ye.
[9] Sarakalasebaa min bɛ mugu saraka lase, ni a wusura furu kɔnɔ, ni a kɛra ŋɔmi jiran faa ni furufuru jiran faa kɔnɔ, u na kɛ o ta ye.
[10] Mugu sarakaw bɛɛ, tuluɲaaminen bɛ minw na, ani minw jalen bɛ, olu na kɛ Aron denkɛw ta ye, u bɛɛ ka kan u la.
[11] «Mɔgɔ bɛ nisɔndiya saraka minw bɔ Matigi ye, sariya filɛ nin ye olu ko la.
[12] Ni mɔgɔ dɔ bɛ nisɔndiya saraka bɔ ni barika dali ye, a ka ninw fara nisɔndiya saraka kan, buuru misɛn tuluma fununbaliw, ani furufuru fununbaliw, tulu funfunnen u kan, ani mugu tɛntɛnnen buuru misɛn tulumaw jirannen.
[13] A ka buuru misɛn fununnen fara a ka saraka fɛn kan ka olu ni a ka barika dali saraka ni a ka nisɔndiya sarakaw bɔɲɔgɔn fɛ.
[14] A ka buurukun misɛn kelen-kelen bɔ a ka saraka fɛn sifaw bɛɛ la ka u kɛ saraka kɔrɔtata ye Matigi ye. Sarakalasebaa min bɛ nisɔndiya sarakaw joli seriseri, a na kɛ o ta ye.
[15] A ka barika dali nisɔndiya sarakaw bɛ lase don min na, a sogo ka dun o don na, a tɔ kana si.
[16] «Ni mɔgɔ ka saraka ye dafale bɔ wala diyaɲe saraka fɛn ye, a bɛ a ka saraka bɔ don min na, a sogo ka dun o don na, a tɔ tolen ka dun o dugusajɛ.
[17] Ni o saraka sogo tɔ tora fo a tile sabanan don, a ka jeni ni tasuma ye.
[18] Ni a ka nisɔndiya sarakaw sogo dunna a tile sabanan don na, o saraka tɛ minɛ, a tɛ jate a bɔbaa ye. A na kɛ fɛn haramulen ye. Ni mɔgɔ dɔ y'a dun, o ka tilenbaliya na kɛ a yɛrɛ kun.
[19] Sogo min magara fɛn nɔgɔlen na, o kana dun, a ka jeni ni tasuma ye. «Mɔgɔ minw jɛlen bɛ, olu bɛ se ka o saraka sogo dun.
[20] Nka mɔgɔ min ye Matigi ka nisɔndiya saraka sogo dun, k'a sɔrɔ a yɛrɛ nɔgɔlen don, o mɔgɔ ka gɛn ka bɔ a ka mɔgɔw la.
[21] Ni mɔgɔ dɔ magara fɛn nɔgɔlen na, mɔgɔ ka nɔgɔlenya wala bagan nɔgɔlen wala fɛn haramulen nɔgɔlen, o kɔ, ka Matigi ka nisɔndiya saraka sogo dɔ dun, o tigi ka gɛn ka bɔ Israɛl mɔgɔw la.»
[22] Matigi kumana Musa fɛ ko a k'a fɔ Israɛl bɔnsɔn ye ko:
[23] «Aw kana kɛn si dun, misi kɛn wala saga kɛn wala ba kɛn.
[24] Jufa ni waradatɔ, aw bɛ se ka aw magoɲɛ ni olu kɛn ye, nka aw kana o dun fewu.
[25] Ni mɔgɔ min ye Matigi ka tasuma la saraka bagan kɛn dun, o tigi ka halaki ka bɔ a ka mɔgɔw la.
[26] Aw kana joli si dun aw ka sigi yɔrɔ si la, kɔnɔ joli wala bagan joli.
[27] Mɔgɔ o mɔgɔ bɛ joli fɛn o fɛn dun, o tigi ka halaki ka bɔ a ka mɔgɔw la.»
[28] Matigi kumana Musa fɛ ko a k'a fɔ Israɛl bɔnsɔn ye ko:
[29] «Ni mɔgɔ dɔ bɛ a ka nisɔndiya saraka bɔ Matigi ye, a ka na ni a ka saraka fɛn ye Matigi ma k'a bɔ a ka nisɔndiya saraka la.
[30] A yɛrɛ bolo ka na ni Matigi ka tasuma la saraka ye. A ka na ni a kɛn ni a disi ye, walisa a disi ka finifana Matigi ɲɛ kɔrɔ.
[31] Sarakalasebaa ka a kɛn jeni saraka bɔlan kan, nka a disi na kɛ Aron ni a denkɛw ta ye.
[32] Aw ka nisɔndiya sarakaw la, aw ka kininfɛ woro di sarakalasebaa ma, a ka kɛ saraka kɔrɔtata ye.
[33] Aron denkɛw la mɔgɔ min bɛ nisɔndiya sarakaw joli ni a kɛn lase, a kininfɛ woro na kɛ o yɛrɛ niyɔrɔ ye.
[34] Ne ye disi finifanata ni woro kɔrɔtata minɛ Israɛl bɔnsɔn fɛ ka bɔ u ka nisɔndiya sarakaw la ka u di Aron ni a denkɛw ma, o ye sariya wulibali ye Israɛl bɔnsɔn ye.
[35] Olu ye Aron niyɔrɔ ni a denkɛw niyɔrɔw ye ka bɔ Matigi ka tasuma la sarakaw la u munli kosɔn, a nana ni u ye don min na, walisa u ka sarakalasebaaya kɛ Matigi ye.
[36] Matigi ye u mun don min na, a y'a fɔ ko Israɛl bɔnsɔn ka o fɛnw di u ma. O ye sariya wulibali ye u bɔnsɔn nataw bɛɛ kan.
[37] «O ye sariya ye saraka jenita ko la, ani mugu saraka ni jurumu yafa saraka ani jalaki yafa saraka ni mɔgɔ bilali ko a dan na saraka ani nisɔndiya sarakaw ko la.»
[38] Matigi ye o fɔ Musa ye Sinayi kulu kan, a ye ci fɔ Israɛl bɔnsɔn ye don min na ko u ka u ka nili fɛnw di Matigi ma ka u to Sinayi kungokolon kɔnɔ.