[1] Matigi ko Musa ka nin kuma fɔ sarakalasebaaw, Aron denkɛw ye ko: «Sarakalasebaa si kana a yɛrɛ nɔgɔ su kosɔn a ka mɔgɔw cɛma,
[2] ni a so mɔgɔ tɛ. Mɔgɔ min ka surun a la, a ba kɔni, ani a fa ni a denkɛ ni a denmuso ni a balimakɛ,
[3] ani a balimamuso npogotigima min ka surun a la, k'a sɔrɔ o ma furu, a bɛ se ka a yɛrɛ nɔgɔ olu de kosɔn.
[4] A kɛra kuntigi ye a ka mɔgɔw cɛma, a kana a yɛrɛ nɔgɔ ka a yɛrɛ saniyali tiɲɛn.
[5] «Sarakalasebaaw kana u kun di, u kana u karangafe di. U kana u farisogo cici.
[6] U ka kɛ mɔgɔ senumaw ye u ka Ala ye. U kana u ka Ala tɔgɔ tiɲɛn k'a masɔrɔ u bɛ Matigi ka tasuma la sarakaw lase, u ka Ala ka dumuni fɛn kɔni. U ka kɛ mɔgɔ senumaw ye.
[7] «U kana jatɔmuso wala muso tiɲɛnnen furu. U kana muso furu salen furu, katuguni u ye mɔgɔ senumaw ye u ka Ala ye.
[8] I ka sarakalasebaa jate senuma ye, katuguni a bɛ i ka Ala ka dumuni fɛn lase. A ka kɛ mɔgɔ senuma ye i ɲɛ na, katuguni ne, Matigi, aw saniyabaa, ne ka senu.
[9] «Ni sarakalasebaa denmuso ye kakalaya kɛ ka a yɛrɛ tiɲɛn, a ye a fa tɔgɔ tiɲɛn. A ka jeni ni tasuma ye.
[10] «Mɔgɔ min kɛra sarakalasebaaw kuntigi ye a balimaw cɛma, ni munli tulu kɛra a kun na, ni a bilara Ala ye ka fini senumaw don a kan na, o kunnankolon kana to, a kana a ka finiw fara.
[11] A kana gɛrɛ mɔgɔ su la. A kana a yɛrɛ nɔgɔ a fa wala a ba kosɔn.
[12] A kana bɔ yɔrɔ senuma la. A kana a ka Ala ka yɔrɔ senuma nɔgɔ, katuguni a ka Ala ka munli tulu kɛra masafugula ye a kun na. Ne ye Matigi de ye.
[13] «A ka npogotigi furu.
[14] Muso cɛ salen wala muso furu salen wala muso tiɲɛnnen wala jatɔmuso, a kana olu si furu. A ka a yɛrɛ siya la npogotigi dɔ furu,
[15] walisa a kana bɔnsɔn nɔgɔlen wolo a ka mɔgɔw cɛma, katuguni ne ye Matigi, a saniyabaa de ye.»
[16] Matigi ko Musa ka nin kuma fɔ Aron ye ko:
[17] «Fiɲɛ bɛ i bɔnsɔn fɛn o fɛn na, olu si kana madon ka a ka Ala ka dumuni fɛn lase bɔnsɔn nataw bɛɛ la.
[18] Fiɲɛ bɛ mɔgɔ min na, fiyentɔ wala sen kelen walaɲɛda tiɲɛnnen wala cɛ min farikolo yɔrɔ dɔ bɔra a cogo la,
[19] wala cɛ sen karilen wala cɛ bolo karilen,
[20] wala dantɔ wala mɔgɔ kɔsɔnnen walaɲɛ jɛ wala kabatɔ sifa o sifa wala cɛ kɔbɔlen, olu si kana madon.
[21] Fiɲɛ bɛ sarakalasebaa Aron bɔnsɔn min na, o si kana madon ka Matigi ka tasuma la sarakaw lase. Fiɲɛ b'a la, a kana madon ka Ala ka dumuni fɛn lase.
[22] A bɛ se ka a ka Ala ka dumuni fɛn dun, fɛn senumaw ani fɛn senuma senumaw bɛɛ,
[23] nka a kana don so cɛtigɛ fini kɔ fɛ. A kana gɛrɛ saraka bɔlan na, katuguni fiɲɛ b'a la. A kana ne ka yɔrɔ senuma nɔgɔ. Ne ye Matigi, u saniyabaa de ye.»
[24] Musa kumana Aron ni a denkɛw ani Israɛl bɔnsɔn bɛɛ fɛ o cogo la.