[1] Matigi kumana Musa fɛ ko:
[2] «I ka kuma Aron ni a denkɛw fɛ walisa Israɛl bɔnsɔn ye fɛn senuma minw di ne ma, u ka tanga olu ma, u kana ne tɔgɔ senuma tiɲɛn. Ne ye Matigi de ye.
[3] I k'a fɔ u ye ko, Israɛl bɔnsɔn ye fɛn senuma minw di Matigi ma, aw bɔnsɔn nataw bɛɛ la, ni mɔgɔ o mɔgɔ gɛrɛla olu la k'a nɔgɔlen to, o mɔgɔ na gɛn ka bɔ ne ɲɛ kɔrɔ. Ne ye Matigi de ye.
[4] «Kuna wala damajalan bɛ Aron bɔnsɔn fɛn o fɛn na, o si kana fɛn senumaw dun sani a ka jɛya. Mɔgɔ min magara mɔgɔ nɔgɔlen na su ko la ani mɔgɔ min lawa bɔra,
[5] ani mɔgɔ min magara fɛn fofota fɛn o fɛn na min bɛ mɔgɔ nɔgɔ, ani min magara nɔgɔ dɔ la min bɛ se ka mɔgɔ nɔgɔ cogo o cogo la,
[6] mɔgɔ min magara olu fɛn o fɛn na, o nɔgɔlen na to fo wula da fɛ. A kana fɛn senumaw dun sani a ka i ko ji la.
[7] Tile bilen kɔ, a na jɛya. O kɔ, a ka fɛn senumaw dun, katuguni o ye a ka dumuni fɛn ye.
[8] «A kana jufa wala waradatɔ dun ka a yɛrɛ nɔgɔ u fɛ. Ne ye Matigi de ye.
[9] «U ka ne ka ko fɔlenw kɛ, walisa jurumu kana kɛ u kun u ka dumuni fɛn kosɔn, u kana na sa, ni u ye fɛn senumaw nɔgɔ tuma min na. Ne ye Matigi, u saniyabaa de ye.
[10] «Dunan si kana o fɛn senuma dun. Sarakalasebaa ka siginfɛ ani a ka baaraden, olu kana o fɛn senuma dun,
[11] nka ni sarakalasebaa ye mɔgɔ min san ni a ka wari ye, o ka a dun. Mɔgɔ minw bangera a ka so kɔnɔ, olu ka a ka dumuni fɛn dun.
[12] «Ni sarakalasebaa denmuso furula mɔgɔ ma min tɛ sarakalasebaa ye, o denmuso kana fɛn senuma saraka kɔrɔtata dun.
[13] Ni sarakalasebaa denmuso cɛ sara, wala ni a furu sara, k'a sɔrɔ den t'a fɛ, ni a kɔseginna a fa ka so i ko a denmisɛnma tuma, a ka a fa ka dumuni fɛn dun, nka dunan si kana a dun.
[14] «Ni mɔgɔ filila ka fɛn senuma dɔ dun, o tuma la a ka o tila duurunan fara a kan ka o fɛn senuma di sarakalasebaa ma.
[15] Israɛl bɔnsɔn bɛ u ka fɛn senuma minw di Matigi ma, ka olu kɛ saraka kɔrɔtataw ye, sarakalasebaaw kana o di mɔgɔ gwansan ma ka a dun, o na a nɔgɔ.
[16] Ni u ye u ka fɛn senumaw dun, o na tilenbaliya ni jalaki lase u ma. Ne ye Matigi, u saniyabaa de ye.»
[17] Matigi ko Musa ka nin kuma fɔ Aron ni a denkɛw ani Israɛl bɔnsɔn bɛɛ ye ko:
[18] «Ni Israɛl ka so mɔgɔ o mɔgɔ wala Israɛl ka siginfɛ fɛn o fɛn bɛ saraka jenita bɔ Matigi ye, ni dafale bɔ fɛn don, wala ni diyaɲe nili fɛn don,
[19] a ka ntura wala sagajigi wala bakɔrɔ fiɲɛntan bɔ, walisa Matigi ka sɔn a la.
[20] Fiɲɛ bɛ fɛn min na, aw kana o bɔ. A tɛna minɛ aw ye.
[21] Ni mɔgɔ ye misi wala bagan misɛn bɔ nisɔndiya saraka ye, walisa a ka dafale bɔ wala k'a kɛ diyaɲe nili fɛn ye, o bagan ka kɛ dafalen ye. Fiɲɛ si kana sɔrɔ a la. Ni o tɛ, a tɛna minɛ.
[22] Bagan fiyentɔ wala kolo karilen wala sen kelen wala joginnen wala jolitɔ wala kabatɔ, aw kana olu bɔ Matigi ye. Aw kana u kɛ tasuma la saraka ye saraka bɔlan kan Matigi ye.
[23] Ni ntura wala sagajigi farikolo yɔrɔ dɔ tɛ a cogo la wala ni a kɔsɔnnen don, i bɛ se ka o bɔ ka a kɛ diyaɲe saraka ye, nka a tɛna minɛ dafale bɔ ko la.
[24] Bagan min kili birindilen bɛ, wala a kɔ gosilen bɛ, wala a faralen bɛ, wala a tigɛlen bɛ, aw kana olu bɔ Matigi ye, aw kana olu si kɛ saraka ye aw ka jamana kɔnɔ.
[25] Aw kana olu si minɛ dunan bolo ka u lase ka kɛ aw ka Ala ka dumuni fɛn ye, sabu tiɲɛn yɔrɔ bɛ u la. Fiɲɛ bɛ u la, u tɛna minɛ aw ye.»
[26] Matigi kumana Musa fɛ ko:
[27] «Ni misiden wala sagaden wala baden wolola, o ka tile wolonwula kɛ a ba kɔrɔ. A tile wolonwulanan tɛmɛnnen kɔ, a bɛ se ka minɛ ka kɛ tasuma la saraka ye Matigi ye.
[28] Misimuso wo, sagamuso wo, i kana o si ni a den faga tile kelen na.
[29] «Ni aw bɛ barika dali saraka bɔ Matigi ye tuma min na, aw ka a bɔ cogo bɛnnen na walisa a ka minɛ aw ye.
[30] A ka dun o don kelen na, a tɔ kana si. Ne ye Matigi de ye.
[31] «Aw ka ne ka ci fɔlenw mara ka u kɛ. Ne ye Matigi de ye.
[32] Aw kana ne tɔgɔ senuma tiɲɛn, nka ne ka saniya Israɛl bɔnsɔn cɛma. Ne ye Matigi, aw saniyabaa de ye.
[33] Ne ye aw labɔ Misira jamana la walisa ne ka kɛ aw ka Ala ye. Ne ye Matigi de ye.»