[1] «Aw kana boliw dila aw yɛrɛw ye. Aw kana ja dɛsɛnen wala boli samasen jɔ aw ye. Aw kana kabakurunɲɛgɛnnen si bila aw ka jamana la ka biri a kɔrɔ. Ne ye Matigi, aw ka Ala de ye.
[2] Aw ka ne ka lafiɲɛ donw bila ka ne ka yɔrɔ senuma bonya. Ne ye Matigi de ye.
[3] «Ni aw ye ne ka sariyaw taama ka ne ka ci fɔlenw mara ka u kɛ,
[4] o tuma la ne na sanji di aw ma a waati la. Dugukolo sɛnɛ fɛnw naɲɛ, jiriw na den.
[5] Aw ka suman gosilen tɛna ban fo rezɛn kari tuma ka se. Rezɛn kari tɛna ban fo danni tuma ka se. Aw na dumuni kɛ ka wasa ka aw lakanalen sigi aw ka jamana la.
[6] Ne na jamana to hɛrɛ la. Aw na aw da, mɔgɔ si tɛna aw lasiran. Ne na wara juguw ban jamana la. Kɛlɛ tɛna don aw ka jamana kɔnɔ.
[7] Aw na aw juguw gɛn. U na bi aw ɲɛ npan fɛ.
[8] Aw ka mɔgɔ duuru na mɔgɔ kɛmɛ gɛn, aw ka mɔgɔ kɛmɛ na mɔgɔ waa tan gɛn. Aw juguw na bi aw ɲɛ npan fɛ.
[9] Ne na ne janto aw la ka aw jiidi ka aw caya ka ne ka layidu mara aw ye.
[10] Aw na suman maralen kɔrɔ dun ka a kɔrɔlen labɔ ka a kura ladon.
[11] Ne na ne ka so sigi aw cɛma, ne tɛnaɲigin aw la.
[12] Ne na taama aw cɛma ka kɛ aw ka Ala ye, aw na kɛ ne ka mɔgɔw ye.
[13] Ne ye Matigi, aw ka Ala ye. Ne ye aw labɔ Misira jamana la, walisa aw kana kɛ u ka jɔnw ye. Ne ye aw ka zu juruw tigɛ k'a to aw kun kɔrɔtalen ka taama.
[14] «Nka ni aw ma sɔn ka ne kan lamɛn ka nin ci fɔlenw bɛɛ kɛ,
[15] ni aw banna ne ka sariyaw ma, ni aw mago tɛ ne ka ko fɔlenw la fewu fo ka ban ne ka ci fɔlenw ma, ni aw ye ne ka layidu tiɲɛn,
[16] ne fana na nin kɛ aw la. Ne na siran kobaw lase aw ma. Sɔgɔsɔgɔninjɛ ani farigwan, olu na aw ɲɛ tiɲɛn ka aw dusu tɔɔrɔ. Aw na sɛnɛ kɛ fuu, katuguni aw juguw na o suman dun.
[17] Ne na neɲɛ sin aw ma, aw juguw na aw gɛn. Aw koniyabaaw na kɛ aw kuntigiw ye. Aw na boli k'a sɔrɔ mɔgɔ si tɛ aw nɔ fɛ.
[18] «O bɛɛ kɛlen kɔ, ni aw ma sɔn ka ne kan lamɛn, ne na o ɲɛgwan bɔɲɔgɔnko wolonwula kɛ aw la aw ka jurumu kosɔn.
[19] Ne na aw ka yɛrɛ jiranciya fanga tiɲɛn ka aw ka sankolo kɛ i n'a fɔ nɛgɛfin ka aw ka dugukolo kɛ i n'a fɔ nsiranɛgɛ.
[20] Aw kɔ fasaw na ja fuu, katuguni aw ka sɛnɛ fɛnw tɛnaɲɛ, jamana jiriw tɛna den.
[21] «Ni aw bɛ ban ne ye, ni aw ma sɔn ka ne kan lamɛn, ne na o ɲɛgwan bɔɲɔgɔnko wolonwula bi aw kan tun ka kɛɲɛ ni aw ka jurumuw ye.
[22] Ne na wara juguw bila aw la. U na aw denw minɛ ka aw ka baganw tiɲɛn. Aw tɔ tolenw tɛna kɛ bɛrɛ ye. Aw ka siraw na lankolonya.
[23] «Ni o kow si ma aw kolo, ni aw tora ka ban ne sago kɛli ma,
[24] o tuma la ne fana na ban aw la. Ne yɛrɛ na aw gosi siɲɛ wolonwula aw ka jurumuw kosɔn.
[25] Ne na npan lase aw ma, o na ne ka layidu hakɛ bɔ aw la. Ni aw bɛɲɔgɔn lajɛ aw ka dugubaw kɔnɔ, ne na fiɲɛbana bila aw la. Aw na don aw juguw bolo.
[26] Ni ne ye aw ka dumuni fɛn ban tuma min na, muso tan na aw ka buuru wusu fuuru kelen kɔnɔ. U na aw ka buuru suma kilo la ka a kɔsegin aw ma. Aw na dumuni kɛ, aw tɛna fa.
[27] «O bɛɛ kɛlen kɔ, ni aw ma sɔn ka ne kan minɛ, nka ni aw tora ka ban ne sago ma,
[28] o tuma la ne diminnen na ban aw la. Ne na aw ɲɛgwan siɲɛ wolonwula aw ka jurumuw kosɔn.
[29] Aw na aw denkɛw sogo dun ka aw denmusow fana sogo dun.
[30] Ne na aw ka batoli kɛ yɔrɔw tiɲɛn ka aw ka tile bato samasenw tigɛ ka aw yɛrɛw suw bila aw ka boli salenw kan. Ne naɲigin aw la.
[31] Ne na aw ka dugubaw kɛ tomon ye ka aw ka yɔrɔ senumaw tiɲɛn. Ne tɛna sɔn ka aw ka wusulan suma duman sarakaw suma mɛn tun.
[32] Ne na aw ka jamana lankolonya. Aw jugu minw bɛna sigi a la, olu na kabakoya o la.
[33] Ne na aw jɛnsɛn siyaw cɛma ka npan ci aw nɔ fɛ. Aw ka jamana na lankolonya, aw ka dugubaw na kɛ tomon ye.
[34] «O tuma la, ka aw to aw juguw ka jamana la, dugukolo na a ka lafiya sɔrɔ a lankolonya waati bɛɛ la. Dugukolo na a ka lafiɲɛ sanw sɔrɔ a sɛnɛbaliya waati bɛɛ la.
[35] Ka jamana lankolon to, a na lafiya sɔrɔ. A ma lafiya min sɔrɔ aw ka lafiɲɛ sanw la ka aw to a kɔnɔ, a na o sɔrɔ.
[36] Aw tɔ minw ɲɛnama tora u juguw ka jamana la, ne na jatigɛ bila olu dusu la fo u bɛ boli jiri fura jalan mankanɲɛ. U na boli, i n'a fɔ mɔgɔw bɛ boli npanɲɛ. U na bi k'a sɔrɔ mɔgɔ si tɛ u nɔ fɛ.
[37] U senw na talonɲɔgɔn na, i n'a fɔ npan bɛ u kɔ, k'a sɔrɔ mɔgɔ si ma u nɔgɛn. Aw tɛna se ka jɔ ka aw juguw kɔnɔ.
[38] Aw na halaki siyaw cɛma. Aw na silatunun aw juguw ka jamana la.
[39] Aw tɔ minw ɲɛnama tora, olu na nagasi u ka tilenbaliya kosɔn ka u to u juguw ka jamanaw la ka nagasi u faw fana ka tilenbaliya kow kosɔn.
[40] «Ayiwa, u na jɔ u ka tilenbaliya ni u faw ka tilenbaliya la, katuguni u ye ne hakɛ ta, u n'a fɔ fana ko u banna ne la.
[41] O de y'a to ne fana banna u la ka u bila u juguw ka jamana la. O tuma la u dusu gɛlɛn na majigin, u na u ka tilenbaliya doni ta.
[42] O tuma la ne na ne hakili to ne ka layidu la u bɛnbaw Yakuba ni Isaka ani Ibrahima ye, ka ne hakili to o jamana fana la.
[43] Jamana bilalen na to yen, u tɛ to a la. Ka jamana lankolon to, ni u tɛ a la, a na a ka lafiɲɛ sanw sɔrɔ. U na u ka tilenbaliya doni ta, katuguni u banna ne ka ko fɔlenw ma. U ɲiginna ne ka sariyaw la.
[44] O bɛɛ n'a ta ka u to u juguw ka jamana la, ne tɛna u fili, ne tɛnaɲigin u la ka u silatunun. Ne tɛna ne ka layidu tiɲɛn. Ne ye Matigi, u ka Ala de ye.
[45] Ne na ne hakili to ne ka layidu la u ye, ne ye o min ta u bɛnbaw ye, ne ye olu minw labɔ Misira jamana la siyaw ɲɛ na, walisa ne ka kɛ u ka Ala ye. Ne ye Matigi de ye.»
[46] Matigi ye a ka ko fɔlenw ani ciw ani sariya minw sigi a yɛrɛ ni Israɛl bɔnsɔn cɛ Musa bolo ka a to Siɲai kulu kan, olu don.