[1] Matigi ko Musa ka nin kuma fɔ Israɛl bɔnsɔn ye ko:
[2] «Ni muso ye kɔnɔ ta ka denkɛ bange, a nɔgɔlen na to ka tile wolonwula kɛ, i ko laada b'a la don minw na, a nɔgɔlen bɛ ten.
[3] A jiginni tile seginnan don, denkɛ na boloko.
[4] O muso ka to ka a yɛrɛ jɛya a joli ko la tile bisaba ni saba kɔnɔ. A kana maga fɛn saniyalen si la, a kana don yɔrɔ senuma la, fo ka a jɛyali donw dafa.
[5] Ni a ye denmuso bange, a nɔgɔlen na to ka tile tan ni duuru kɛ, i ko laada b'a la cogo min na. A ka to ka a yɛrɛ jɛya a joli ko la tile biwɔɔrɔ ni wɔɔrɔ kɔnɔ.
[6] «Ni a jɛyali donw dafara tuma min na, denkɛ ko la wala denmuso ko la, a ka na ni san kelen sagajigi ye k'a kɛ saraka jenita ye, ani jɛnɛntubanden wala ntubanni k'a kɛ jurumu yafa saraka ye. A ka na ni olu ye ɲɔgɔn kunbɛn finiso da la ka olu di sarakalasebaa ma.
[7] Sarakalasebaa ka u lase Matigi ɲɛ kɔrɔ ka jurumu kafari a ye, a na jɛya a joli woyo la. Muso min jiginna denkɛ wala denmuso la, o ye sariya ye o muso ko la.
[8] Ni a ma se ka sagaden sɔrɔ, a ka na ni ntubanni fila wala jɛnɛntubanden fila ye, kelen ka kɛ saraka jenita ye, a tɔ kelen ka kɛ jurumu yafa saraka ye. Sarakalasebaa ka jurumu kafari a ye, a na jɛya.»