[1] Matigi ko Musa ni Aron ka nin kuma fɔ Israɛl bɔnsɔn ye ko:
[2] «Aw bɛ se ka dantan fɛn minw dun dugukolo kan fɛnɲɛnamaw bɛɛ la, olu filɛ ninw ye.
[3] Dantan fɛn minw sen ntɔrɔn cilen bɛ ka kɛ fila ye, ni u bɛ ɲa ɲimi kɛ fana, aw bɛ se ka olu dun.
[4] Nka minw bɛ ɲa ɲimi dɔrɔn kɛ wala min sen ntɔrɔn cilen bɛ dɔrɔn, aw kana olu dun. O kɔrɔ, aw kana ɲaamɛ dun, a bɛ ɲa ɲimi kɛ, nka a sen ntɔrɔn cilen tɛ. A nɔgɔlen don aw ye.
[5] Aw kana kulubani dun. A bɛ ɲa ɲimi kɛ, nka a sen ntɔrɔn cilen tɛ. A nɔgɔlen don aw ye.
[6] Aw kana sonsanni dun. A bɛ ɲa ɲimi kɛ, nka a sen ntɔrɔn cilen tɛ. A nɔgɔlen don aw ye.
[7] Aw kana lɛ dun, a sen ntɔrɔn cilen bɛ ka kɛ fila ye, nka a tɛɲaɲimi kɛ, a nɔgɔlen don aw ye.
[8] Aw kana u sogo dun, aw kana maga u suw la. U nɔgɔlen don aw ye.
[9] «Aw bɛ se ka dantan fɛn minw dun ji la fɛnw bɛɛ la, olu filɛ ninw ye. Nɔnnikaman ni fara bɛ ji la fɛn, fɛn o fɛn na, kɔgɔji ni baji la, aw bɛ se ka olu dun.
[10] Nka nɔnnikaman ni fara tɛ fɛnɲɛnama lamagata minw na, kɔgɔji ni baji la, olu bɛɛ na kɛ aw tana ye.
[11] Aw ka u haramu, aw kana u sogo dun, aw ka u suw haramu.
[12] Nɔnnikaman ni fara tɛ ji la fɛn minw na, aw ka olu haramu.
[13] «Aw ka kɔnɔ minw haramu, aw kana minw dun, olu filɛ ninw ye. Bɔn ni duga ni kɔgɔji la bɔn,
[14] ani sɛgɛ sifaw bɛɛ
[15] ani nkankan kɔnɔ sifaw bɛɛ,
[16] ani kɔnɔsogonti ni gingin ni ginginjɛ ni sogodun kɔnɔ sifaw bɛɛ
[17] ani ginginba ni plonjɔn ni ntori dun gingin
[18] ani bumukɔrɔ ni jɛgɛdun kɔnɔ sifaw bɛɛ,
[19] ani baninkɔnɔ ni tentan sifaw bɛɛ ni hupɛ ani tonso.
[20] «Fɛn ncinin kamanma sen naanimaw, aw ka olu bɛɛ lajɛlen haramu.
[21] Nka fɛn ncinin kamanma, sen naanimaw la, woro jamanjanw bɛ minw na, ka u panpan, aw bɛ se ka olu dun.
[22] Aw bɛ se ka minw dun, olu filɛ ninw ye: ntɔn sifaw bɛɛ ni ntɔn bilen sifaw bɛɛ ni jarantɔn sifaw bɛɛ ani konintɔn sifaw bɛɛ,
[23] nka fɛn ncinin kamanma sen naanima tɔw, aw ka olu bɛɛ haramu.
[24] Aw na nɔgɔ o fɛnw fɛ, mɔgɔ o mɔgɔ magara u suw la, o nɔgɔlen na to fo wula da fɛ.
[25] Ni mɔgɔ min ye u suw yɔrɔ dɔ ta, o ka a ka finiw ko. A nɔgɔlen na to fo wula da fɛ.
[26] «Sen ntɔrɔn bɛ sen naanima fɛn minw la, nka u sen cilen tɛ, ni u tɛɲaɲimi kɛ, olu nɔgɔlen don aw ye. Ni mɔgɔ o mɔgɔ magara u la, o na nɔgɔ.
[27] Sen naanima fɛn, fɛn o fɛn, ni a bɛ taama a sentɛgɛw la, o nɔgɔlen don aw ye. Ni mɔgɔ min magara o su la, o nɔgɔlen na to fo wula da fɛ.
[28] Mɔgɔ min ye u suw ta, o ka a ka finiw ko, a nɔgɔlen na to fo wula da fɛ. Olu nɔgɔlen don aw ye.
[29] «Dugukolo kan fɛn lamagata minw nɔgɔlen bɛ aw ye, olu filɛ ninw ye, kuleɲinɛ niɲinɛ ni basa sifaw bɛɛ
[30] ani jugunin ni ntori ni korokara ni kɔtɛ ani nɔnsi.
[31] Aw ka olu bɛɛ jate fɛn nɔgɔlen ye fɛn lamagataw bɛɛ la. Mɔgɔ min magara u suw la, o nɔgɔlen na to fo wula da fɛ.
[32] Ni u suw bira fɛn o fɛn kan, o nɔgɔlen don. Jiri minan wo, fini wo, wolo wo, bɔrɛ wo, baarakɛ minan fɛn o fɛn, o ka bila ji la. A nɔgɔlen na to fo wula da fɛ. O kɔ, a na jɛya.
[33] O fɛnw bira bɔgɔ minan fɛn o fɛn kɔnɔ, o kɔnɔ fɛn nɔgɔlen don. Aw ka o minan ci.
[34] Ni o minan kɔnɔ ji dɔ sera dumuni fɛn min na, o nɔgɔlen don. Minni fɛn, fɛn o fɛn bɛ o minan sifa o sifa kɔnɔ, o nɔgɔlen don.
[35] Ni o fɛnw suw yɔrɔ dɔ bira fɛn o fɛn kan, buuru wusulan wala tobili kɛ yɔrɔ, o ka ci, a nɔgɔra. A nɔgɔlen don aw ye.
[36] Ni o fɛnw suw bira ji boyi wala kɔlɔn jiman la, o ji nɔgɔlen tɛ, nka mɔgɔ min ye o fɛnw suw labɔ ji la, o nɔgɔlen don.
[37] Ni u suw bira danni si fɛn o fɛn kan, o nɔgɔlen tɛ,
[38] nka ni ji kɛra o danni si la, o kɔ, ni u suw yɔrɔ dɔ bira a jiman kan, a nɔgɔlen don aw ye.
[39] Ni bagan dunta fɛn o fɛn sara, mɔgɔ min magara o su la, o nɔgɔlen na to fo wula da fɛ.
[40] Mɔgɔ min ye o sogo dun, o ka a ka finiw ko, a nɔgɔlen na to fo wula da fɛ. Min ye fɛn su ta, o fana ka a ka finiw ko, a nɔgɔlen na to fo wula da fɛ.
[41] «Fɛnɲɛnama fɛn o fɛn bɛ fofo dugukolo kan, olu bɛɛ haramulen don, u kana dun.
[42] Fɛn o fɛn bɛ fofo a kɔnɔbara kan, ani fɛn o fɛn taamatɔ a sen naani la, ni a bɛ fofo, ani fɛn o fɛn taamatɔ sen caman na, ni a bɛ fofo, fɛn fofota, fɛn o fɛn bɛ fofo dugukolo kan, aw kana olu si dun, katuguni u haramulen don.
[43] Aw kana aw yɛrɛw kɛ fɛn haramulen ye fɛn fofota si fɛ, aw kana aw nɔgɔ u fɛ, ka kɛ mɔgɔ saniyabaliw ye u fɛ.
[44] Ne ye Matigi aw ka Ala ye. Aw ka aw yɛrɛw saniya ka kɛ mɔgɔ senumaw ye, katuguni ne ka senu. Fɛn fofota minw bɛ fofo dugukolo kan, aw kana aw yɛrɛw nɔgɔ olu si fɛ.
[45] Ne ye Matigi ye, o min ye aw labɔ Misira jamana la ka kɛ aw ka Ala ye. O de kosɔn aw ka kɛ mɔgɔ senumaw ye, katuguni ne ka senu.
[46] «O ye sariya ye baganw ko la, ani kɔnɔw ni fɛnɲɛnama minw bɛɛ bɛ lamaga ji la ani dugukolo kan fɛn fofotaw bɛɛ ko la,
[47] ka faranfasi don fɛn nɔgɔlen ni fɛn jɛlen cɛ ani fɛnɲɛnama dunta ni fɛn dunbali cɛ.»