[1] Matigi ko Musa ka nin kuma fɔ Israɛl bɔnsɔn ye ko:
[2] «Aw ka Matigi ka seli minw ko fɔ walisa u ka kɛ jamalajɛ senumaw ye, olu filɛ.
[3] Baara ka kɛ tile wɔɔrɔ kɔnɔ, nka tile wolonwulanan don ye lafiɲɛ don ye, jamalajɛ senuma ka kɛ. Aw kana baara si kɛ. O ye Matigi ka lafiɲɛ don ye aw sigi yɔrɔw bɛɛ la.
[4] Matigi ka seliw filɛ ninw ye. Jamalajɛ senumaw don. Aw ka u welewele da u waatiw la.
[5] «San kalo fɔlɔ tile tan ni naaninan don wula da fɛ, aw ka Matigi ka Tɛmɛnkan seli daminɛ.
[6] O kalo tile tan ni duurunan ye buuru fununbali seli ye Matigi ye. Aw ka buuru fununbali dun tile wolonwula kɔnɔ.
[7] A tile fɔlɔ la aw ka jamalajɛ senuma kɛ. Aw kana baara si kɛ.
[8] Aw ka tasuma la saraka bɔ Matigi ye tile wolonwula kɔnɔ. A tile wolonwulanan don ye jamalajɛ senuma ye. Aw kana baara si kɛ o don.»
[9] Matigi ko Musa ka nin kuma fɔ Israɛl bɔnsɔn ye ko:
[10] «Ne bɛ jamana min di aw ma, ni aw sera yen tuma min na ka a suman tigɛ, aw ka na ni aw ka suman kura bɛɛ kun fɔlɔ kansiri ye sarakalasebaa yɔrɔ.
[11] Sarakalasebaa ka o kansiri finifana Matigi ɲɛ kɔrɔ walisa o ka minɛ aw ye. Lafiɲɛ don dugusajɛ, sarakalasebaa ka a finifana.
[12] Aw bɛ kansiri finifana don min na, aw ka san kelen sagajigi fiɲɛntan bɔ k'a kɛ saraka jenita ye Matigi ye.
[13] Ka fara o kan, aw ka mugu tɛntɛnnen kilo wɔɔrɔ ta ka tuluɲaami o la k'a kɛ tasuma la saraka ye Matigi ye, o suma ka di. Diwɛn litiri kelen ni tilancɛ ka kɛ o saraka bɔnta ye.
[14] Aw kana suman kura buuru dun, aw kana a kisɛ jirannen wala a tinzan kɛnɛɲimi sani aw ka a kɛ saraka ye aw ka Ala ye don min na. O ye sariya wulibali ye aw bɔnsɔn nataw bɛɛ la aw sigi yɔrɔw bɛɛ la.
[15] «K'a daminɛ lafiɲɛ don dugusajɛ la, aw nana ni saraka finifanata kansiri ye don min na, aw ka dɔgɔkun wolonwula dafalen jate minɛ.
[16] Aw ka tile biduuru jate fo ka taa se lafiɲɛ don wolonwulanan dugusajɛ ma. O tile biduurunan don, aw ka mugu saraka kura bɔ Matigi ye.
[17] Aw ka na ni buurukun fila ye ka bɔ aw sigi yɔrɔw la, ka u kɛ saraka finifanata ye. Aw ka buuru bɛɛ kelen-kelen dila ni mugu tɛntɛnnen kilo saba-saba ye ka funun fɛn kɛ o la ka a wusu. O ye suman kura bɛɛ kun fɔlɔ saraka ye Matigi ye.
[18] I ka o buurukunw ni san kelen sagajigi fiɲɛntan wolonwula ani ntura bɔlan kelen ani sagajigi fila bɔɲɔgɔn fɛ. Olu na kɛ saraka jenita ye Matigi ye, u ni mugu sarakaw ni saraka bɔntaw. Tasuma la saraka don, o suma ka di Matigi ye.
[19] Aw ka bakɔrɔ kelen bɔ k'a kɛ jurumu yafa saraka ye ka san kelen sagajigi fila bɔ ka u kɛ nisɔndiya saraka ye.
[20] Sarakalasebaa ka olu ni suman kura bɛɛ kun fɔlɔ buurukunw ni sagajigi fila finifana Matigi ɲɛ kɔrɔɲɔgɔn fɛ ka kɛ saraka finifanata ye. U na kɛ senumaw ye Matigi ye ka kɛ sarakalasebaa ta ye.
[21] Aw ka seli welewele da ka jamalajɛ senuma kɛ o don yɛrɛ la. Aw kana baara si kɛ. O ye sariya wulibali ye aw sigi yɔrɔw bɛɛ la aw bɔnsɔn nataw bɛɛ kan.
[22] «Ni aw bɛ aw ka jamana suman tigɛ tuma min na, forotigi ka yɔrɔ dɔw to a ka foro selekew la, a kana olu suman tigɛ, i kana i ka suman nɔɔrɔ bɔ. I ka olu to faantanw ni siginfɛw ye. Ne ye Matigi, aw ka Ala de ye.»
[23] Matigi ko Musa ka nin kuma fɔ Israɛl bɔnsɔn ye ko:
[24] «San kalo wolonwulanan tile fɔlɔ ka kɛ lafiɲɛ don ye aw fɛ. Aw ka buru fyɛ ka mɔgɔw hakili jigin o seli la, jamalajɛ senuma don.
[25] Aw kana baara si kɛ. Aw ka tasuma la saraka bɔ Matigi ye.»
[26] Matigi kumana Musa fɛ ko:
[27] «O kalo wolonwulanan tile tannan don ye jurumu kafari don ye. Aw ka jamalajɛ senuma kɛ. Aw ka aw sun ka tasuma la saraka bɔ Matigi ye.
[28] Aw kana baara si kɛ o don na. O ye jurumu kafari don ye ka aw ka jurumu kafari Matigi aw ka Ala ɲɛ kɔrɔ.
[29] Mɔgɔ min tɛ a sun o don na, o tɛna jate Ala ka mɔgɔ ye tun.
[30] Mɔgɔ min bɛ baara kɛ o don na, ne yɛrɛ na o halaki ka bɔ Israɛl bɔnsɔn cɛma.
[31] Aw kana baara si kɛ. O ye sariya wulibali ye aw bɔnsɔn nataw bɛɛ kan aw sigi yɔrɔw bɛɛ la.
[32] O na kɛ lafiɲɛ don ye aw ye, aw ka aw sun. K'a daminɛ o kalo tile kɔnɔntɔnnan don wula da la ka taa bila o dugusajɛ wula da la, aw ka o lafiɲɛ don bila.»
[33] Matigi ko Musa ka nin kuma fɔ Israɛl bɔnsɔn ye ko:
[34] «San kalo wolonwulanan tile tan ni duurunan don, gwakɔrɔsigi seli ka daminɛ ka tile wolonwula kɛ a la Matigi ye.
[35] O tile fɔlɔ la, jamalajɛ senuma ka kɛ. Aw kana baara si kɛ.
[36] Aw ka tasuma la saraka bɔ Matigi ye tile wolonwula kɔnɔ. A tile seginnan don, jamalajɛ senuma ka kɛ aw fɛ, aw ka tasuma la saraka bɔ Matigi ye. Jamalajɛ senuma don, aw kana baara si kɛ.
[37] «Olu ye Matigi ka seliw ye. Aw ka u welewele da ka u kɛ jamalajɛ senumaw ye, walisa tasuma la sarakaw ka bɔ Matigi ye, saraka jenitaw ni mugu sarakaw ni saraka kan tigɛtaw ani saraka bɔntaw, olu bɛɛ ka bɔ u don fɔlen na.
[38] O sarakaw ka fara Matigi ka lafiɲɛ donw ani aw ka nili fɛnw ni aw ka dafale kow ani aw ka diyaɲe nili fɛnw kan, aw bɛ o minw di Matigi ma.
[39] «San kalo wolonwulanan tile tan ni duurunan don, aw ka sɛnɛ kɛ suman lasagonnen kɔ, aw ka Matigi ka seli kɛ tile wolonwula kɔnɔ. O seli tile fɔlɔ ka kɛ lafiɲɛ don ye. A tile seginnan fana ka kɛ lafiɲɛ don ye.
[40] O seli tile fɔlɔ la aw ka jiriɲumanw denw ta ka ntamaro bolow ni jiri bolo furamaw ani kɔ da la jiriw bolow ta ka ɲagali Matigi aw ka Ala ɲɛ kɔrɔ tile wolonwula kɔnɔ.
[41] Aw ka o kɛ Matigi ka seli ye tile wolonwula kɔnɔ san o san. O ye sariya wulibali ye aw bɔnsɔn nataw bɛɛ kan. Aw k'a kɛ san kalo wolonwulanan na.
[42] Aw ka sigi gwaw kɔrɔ tile wolonwula kɔnɔ. Israɛl jamanadenw bɛɛ ka sigi gwaw kɔrɔ,
[43] walisa aw bɔnsɔn nataw k'a dɔn ko ne ye Israɛl denw labɔ Misira jamana la tuma min na, ne ye u sigi gwaw kɔrɔ. Ne ye Matigi, aw ka Ala de ye.»
[44] O cogo la Musa ye Matigi ka seliw ko fɔ Israɛl bɔnsɔn ye.