[1] Matigi ko Musa ka nin kuma fɔ Aron ni a denkɛw ni Israɛl bɔnsɔn bɛɛ ye,
[2] ko Matigi ye ci min fɔ, o filɛ nin ye:
[3] «Israɛl ka so mɔgɔ o mɔgɔ bɛ ntura wala saga wala ba faga bugufyɛ kɔnɔ wala bugufyɛ ko fɛ,
[4] ni a ma na n'a ye ɲɔgɔn kunbɛn finiso da la ka a kɛ saraka ye Matigi ye Matigi ka so da la, joli hakɛ na jate o mɔgɔ kun, a ye joli bɔn. O mɔgɔ ka gɛn ka bɔ a ka mɔgɔw cɛma.
[5] O ka kɛ walisa Israɛl bɔnsɔn tun bɛ saraka minw faga kungokolon kɔnɔ, u ka na ni olu ye sarakalasebaa yɔrɔɲɔgɔn kunbɛn finiso da la Matigi ɲɛ kɔrɔ, ka u faga ka u kɛ nisɔndiya sarakaw ye Matigi ye.
[6] Sarakalasebaa ka u joli seriseri Matigi ka saraka bɔlan kanɲɔgɔn kunbɛn finiso da la ka u kɛn jeni. O suma ka di Matigi ye.
[7] U tun bɛ muruti Matigi ma ka bakɔrɔ ja dilalen minw sɔn, u kana u ka sarakaw faga olu ye tun. O ye sariya wulibali ye u ni u bɔnsɔnw bɛɛ kan.
[8] I k'a fɔ u ye ko ni Israɛl ka so mɔgɔ o mɔgɔ wala u ka siginfɛ fɛn o fɛn bɛ saraka jenita wala saraka sifa wɛrɛ bɔ,
[9] ni a ma na n'a ye ɲɔgɔn kunbɛn finiso da la k'a kɛ saraka ye Matigi ye, o mɔgɔ ka gɛn ka bɔ a ka mɔgɔw cɛma.
[10] «Ni Israɛl ka so mɔgɔ o mɔgɔ wala u ka siginfɛ, fɛn o fɛn, ye joli dun, ne na wuli o joli dunbaa kama ka a gɛn ka bɔ a ka mɔgɔw cɛma,
[11] k'a masɔrɔ dafɛn bɛɛ ɲɛnamaya bɛ a joli la. Ne ye yamaruya di aw ma aw ka jurumu kafari ni joli ye saraka bɔlan kan, sabu ni bɛ joli la, o de kosɔn a bɛ jurumu kafari.
[12] O de y'a to ne y'a fɔ Israɛl bɔnsɔn ye ko, u ka mɔgɔ si kana joli dun, u ka siginfɛ si kana joli dun.
[13] Ni Israɛl bɔnsɔn mɔgɔ o mɔgɔ wala u ka siginfɛ, fɛn o fɛn, bɛ sogo wala kɔnɔ dunta sɔrɔ donsoya la, a ka o fɛn joli bɔn duguma ka a datugu ni buguri ye.
[14] Dafɛn bɛɛ ɲɛnamaya bɛ a joli la. O de y'a to ne y'a fɔ Israɛl bɔnsɔn ye, ko u kana dafɛn si joli dun, sabu dafɛn bɛɛ ɲɛnamaya bɛ a joli la. Ni mɔgɔ o mɔgɔ ye joli dun, o na gɛn ka bɔ a ka mɔgɔw cɛma.
[15] «Ni mɔgɔ o mɔgɔ ye jufa wala waradatɔ dun, jamanaden wo, siginfɛ wo, o ka a ka finiw ko ka a yɛrɛ ko ji la. A nɔgɔlen na to fo wula da fɛ, o kɔ, a na jɛya.
[16] Nka ni a ma a ka finiw ko ka a yɛrɛ ko, a ka tilenbaliya na kɛ a yɛrɛ kun.»