[1] «Ni mɔgɔ dɔ bɛ Matigi sɔn ni mugu saraka ye tuma min na, a ka saraka fɛn ka kɛ mugu tɛntɛnnen ye. A ka tulu kɛ a kan ka wusulan suma duman fara a kan.
[2] A ka taa n'a ye sarakalasebaaw Aron denkɛw, yɔrɔ. Sarakalasebaa ka a boloɲɛ kelen ta mugu tɛntɛnnen ni a tulu la ka wusulan suma duman bɛɛ ta, ka o bɛɛ jeni saraka bɔlan kan, hakili jigin fɛn don o saraka fɛn na. Tasuma la saraka don, o suma ka di Matigi ye.
[3] Saraka mugu tɔ tolen na kɛ Aron ni a denkɛw ta ye sabu fɛn senuma senuma don ka bɔ Matigi ka tasuma la sarakaw la.
[4] «Ni i bɛ mugu saraka bɔ min bɛ wusu furu kɔnɔ, o ka dila ni mugu tɛntɛnnen ye ka kɛ buuru misɛn tuluma fununbaliw ye, wala furufuru fununbaliw, tulu funfunnen u kan.
[5] «Ni i ka saraka fɛn ye mugu saraka ye min bɛ jiran faa la, a fununbali ka dila ni mugu tɛntɛnnen ye, tulu kaɲaami o la.
[6] I ka a karikari ka tulu kɛ a kan, k'a kɛ mugu saraka ye.
[7] «Ni i ka saraka fɛn ye mugu saraka ye min bɛ jiran pooli kɔnɔ, a ka dila ni mugu tɛntɛnnen ye, tulu kaɲaami o la.
[8] Mugu saraka dilalen kɔ ni o fɛnw ye, i ka na ni a ye Matigi yɔrɔ. A ka di sarakalasebaa ma, ale ka na n'a ye saraka bɔlan na.
[9] Sarakalasebaa ka dɔ bɔ o mugu saraka la ka o jeni saraka bɔlan kan, o ye hakili jigin fɛn ye. Tasuma la saraka don, o suma ka di Matigi ye.
[10] Saraka mugu tɔ tolen na kɛ Aron ni a denkɛw ta ye. Fɛn senuma senuma don ka bɔ Matigi ka tasuma la sarakaw la.
[11] «Aw bɛ mugu saraka minw bɔ Matigi ye, funun fɛn kana kɛ u si la. Aw kana funun fɛn wala di jeni k'a kɛ tasuma la saraka ye Matigi ye.
[12] Aw bɛ se ka u kɛ suman kura bɛɛ kun fɔlɔ nili fɛn ye ka Matigi sɔn ni u ye, nka u kana jeni saraka bɔlan kan ka kɛ suma duman ye.
[13] I ka kɔgɔ kɛ i ka mugu sarakaw bɛɛ la. I kana sɔn i ka mugu saraka si kɔgɔntan ka to, sabu kɔgɔ ye i ka Ala ka layidu taamashyɛn ye. I ka kɔgɔ kɛ i ka sarakaw bɛɛ la.
[14] «Ni i bɛ suman kura bɛɛ kun fɔlɔ mugu saraka bɔ Matigi ye, o ka kɛ tinsan kura kisɛ jirannen ye, a susulen, i ka o bɔ k'a kɛ i ka suman kura bɛɛ kun fɔlɔ mugu saraka ye.
[15] I ka tulu kɛ a kan ka wusulan suma duman fara a kan, o de ye mugu saraka ye.
[16] Sarakalasebaa ka a kisɛ susulen dɔ ani tulu dɔ bɔ a la ka wusulan suma duman bɛɛ bɔ a la ka o jeni k'a kɛ hakili jigin fɛn ye o saraka fɛn na. Tasuma la saraka don Matigi ye.