[1] Matigi ko Musa ka nin kuma fɔ Israɛl bɔnsɔn jama bɛɛ ye ko:
[2] «Aw ka kɛ mɔgɔ senumaw ye, k'a masɔrɔ ne, Matigi aw ka Ala, ne ka senu.
[3] «Aw bɛɛ kelen-kelen ka aw fa ni aw ba bonya. Aw ka ne ka lafiɲɛ donw bila. Ne ye Matigi aw ka Ala de ye.
[4] «Aw kana yɛlɛma ka tugu boliw la. Aw kana nɛgɛ si yeele k'a kɛ bato fɛn ye. Ne ye Matigi aw ka Ala de ye.
[5] «Ni aw bɛ nisɔndiya saraka bɔ Matigi ye, aw ka o bɔ cogo bɛnnen na, walisa Matigi ka sɔn a la.
[6] Aw b'a bɔ don min na, a ka dun o don na ani o dugusajɛ. Ni a tɔ tora fo tile sabanan don, o ka jeni ni tasuma ye.
[7] Ni a dɔ dunna a tile sabanan don, o na kɛ fɛn haramulen ye, a tɛna minɛ.
[8] Ni mɔgɔ o mɔgɔ y'a dun, o ka jurumu na kɛ a yɛrɛ kun, katuguni a ye Matigi ka fɛn senuma nɔgɔ. O mɔgɔ na gɛn ka bɔ a ka mɔgɔw cɛma.
[9] «Ni aw bɛ suman tigɛ aw ka jamana kɔnɔ, forotigi ka yɔrɔ dɔ to a ka foro selekew la, a kana olu suman tigɛ, a kana a ka suman nɔɔrɔ bɔ.
[10] I kana i ka rezɛn nakɔtu nɔɔrɔ bɔ, i kana i ka rezɛnden tɔnilen fana tɔmɔ. I ka olu to faantanw ni siginfɛw ye. Ne ye Matigi aw ka Ala ye.
[11] Aw kana sonyali kɛ. Aw kana nkalon tigɛ ka nanbara kɛɲɔgɔn ye.
[12] «Aw kana aw kali nkalon kan ne tɔgɔ la, o bɛ i ka Ala tɔgɔ tiɲɛn. Ne ye Matigi de ye.
[13] «I kana i fanga digi i mɔgɔɲɔgɔn na. I kana a bolo fɛn bɔsi a la. «I ka baaraden sara kana si i bolo.
[14] «I kana tulo geren danga. I kana sen talon fɛn bila fiyentɔɲɛ, nka i ka siran i ka Ala ɲɛ. Ne ye Matigi de ye.
[15] «I kana tilenbaliya kɛ kiri ko la. I kana faantan fisaya mɔgɔ wɛrɛ ye a ka faantanya kosɔn. I kana faama fisaya mɔgɔ wɛrɛ ye a ka faamaya kosɔn, nka i ka kiri tigɛ i mɔgɔɲɔgɔn kan ni tilennenya ye.
[16] «I kana yaalayaala ka naafigiya kɛ i ka mɔgɔw cɛma. I kana i mɔgɔɲɔgɔn coron walisa a ka faga. Ne ye Matigi de ye.
[17] «I kana i balima koniya i dusu la. I ka i mɔgɔɲɔgɔn kɔrɔfɔ, walisa i kana na jalaki ale kosɔn.
[18] I kana i mɔnɛ bɔ mɔgɔw la. I kana i ɲɔgɔn fasodenw ka juguya kɛlen mara i kɔnɔ. I ka i mɔgɔɲɔgɔn kanu i ko i yɛrɛ. Ne ye Matigi de ye.
[19] «Aw ka ne ka sariyaw mara. «I kana a to i ka bagan sifa fila ka jɛ. I kana danni si sifa fila dan foro kelen na. Fɛn sifa fila kolonsolenɲɔgɔn na ka kɛ fini ye, i kana o don i kan na.
[20] «Jɔnmuso maminɛlen cɛ dɔ fɛ, ni a ma kunmabɔ, ni a ma hɔrɔnya, ni cɛ wɛrɛ dara a fɛ, u fila bɛɛ kaɲangi. U kana faga, katuguni o muso tun tɛ hɔrɔn ye.
[21] O cɛ ka na ni sagajigi ye ka o di Matigi maɲɔgɔn kunbɛn finiso da la a ka jurumu kɛlen kosɔn ka o kɛ jalaki yafa saraka ye.
[22] Sarakalasebaa ka a ka jurumu kɛlen kafari ni o jalaki yafa saraka sagajigi ye Matigi ɲɛ kɔrɔ. A ka jurumu kɛlen na yafa a ma.
[23] «Ni aw sera o jamana la tuma min na, ka jiri dunta sifaw bɛɛ turu, aw ka o jiriw denw jate nɔgɔlen ye. San saba kɔnɔ, o jiridenw ka kɛ nɔgɔlenw ye aw ye, u kana dun,
[24] nka a san naaninan la, o jiridenw bɛɛ ka bila ka kɛ fɛn senumaw ye Matigi tanuli kama.
[25] A san duurunan la, aw ka o jiridenw dun, walisa u ka to ka den aw ye. Ne ye Matigi aw ka Ala de ye.
[26] «Aw kana fɛn si dun, k'a sɔrɔ a joli b'a la. Aw kana dɔnbaaya kɛ. Aw kana filɛli kɛ.
[27] Aw kana aw kun kɔrɔbɔ, aw kana aw karangafɛ di.
[28] Aw kana aw farisogo cici suw kosɔn, aw kanaɲɛgɛɲɛgɛli kɛ aw fari la. Ne ye Matigi de ye.
[29] «I kana i denmuso bila sungurunbaya la, walisa jatɔya kana na caya jamana kɔnɔ. Jamana bɛɛ kana na fa sɔnjuguya la.
[30] «Aw ka ne ka lafiɲɛ donw bila ka ne ka yɔrɔ senuma bonya. Ne ye Matigi de ye.
[31] «Aw kana tugu sukililaw ni dɔnbaaw la. Aw kana filɛli kɛ u fɛ ka aw nɔgɔ u fɛ. Ne ye Matigi aw ka Ala de ye.
[32] «I ka wuli ka i jɔ kunsigijɛtigiɲɛ kɔrɔ ka mɔgɔ kɔrɔba bonya. I ka siran i ka Ala ɲɛ fana. Ne ye Matigi de ye.
[33] «Ni dunan sigira aw ka jamana la, aw kana a tɔɲɔ.
[34] Aw ka siginfɛ minɛ i ko jamanaden. Aw ka siginfɛ kanu i ko aw yɛrɛw, katuguni aw fana tun ye siginfɛ ye Misira jamana la. Ne ye Matigi aw ka Ala de ye.
[35] «Aw kana tilenbaliya kɛ kiri ko la wala sumanikɛ kala la wala sumanikɛ ja la wala sumanikɛ minan na.
[36] Sumanikɛ ja bɛnnen ni kilo jate nɛgɛ bɛnnen ni sumanikɛ minan bɛnnen ani litiri bɛnnen ka kɛ aw fɛ. Ne ye Matigi aw ka Ala de ye, min ye aw labɔ Misira jamana la.
[37] «Aw ka ne ka sariyaw bɛɛ ni ne ka ci fɔlenw bɛɛ kɔlɔsi ka u kɛ. Ne ye Matigi de ye.»