[1] Imisi itandatu ishize, Yesu ajana Petero, Yakobo na mwene nyina Yohana; abadugana igisozi kirekire ari bonyene.
[2] Akayanganira imbere yabo, mu maso hiwe haka nk'izuba, impuzu ziwe zera nk'umuco.
[3] Maze Mose na Eliya barababonekera, bavugana na we.
[4] Petero abwira Yesu ati: “Mugenzi, bitubereye vyiza ko turi hano; ni wabigomba ndubaka amahema atatu hano, rimwe ryiwawe, irindi rya Mose, irindi rya Eliya.”
[5] Akivuga, haza igicu gikayangana, kibatera igitutu; kandi ijwi riva muri nya gicu riti: “Nguwu Umwana wanje nkunda, akampimbara; ni mumwumve.”
[6] Abigishwa bavyumvise, bubama hasi baratinya cane.
[7] Yesu arabegera, abakorako ati: “Ni muve hasi, ntimutinye.”
[8] Bunamuye amaso, ntibagira uwundi babona, atari Yesu wenyene.
[9] Bariko baramanuka ico gisozi, Yesu arabihanikiriza ngo “ntihagire umuntu babwira ivyo beretswe, gushitsa aho Umwana w'umuntu azozukira avuye mu bapfuye.”
[10] Abigishwa baramubaza bati: “None rero ni igiki gituma abahinga b'ivyanditswe bavuga yuko Eliya akwiye kubanza kuza?”
[11] Arabishura ati: “Eliya azoza koko, aroranye vyose neza.
[12] Ariko ndababwira yuko Eliya yamaze kuza, yamara ntibamumenye, ariko bamugize uko bagomba kwose. Uko ni ko n'Umwana w'umuntu agira ababazwe na bo.”
[13] Buno abigishwa batahura ko yababwiye Yohana Umubatizi.
[14] Bashikiriye ishengero, umuntu araza aramupfukamira
[15] ati: “Mwami wanje, girira ikigongwe umwana wanje, kuko arwaye intandara, arasinzikaye cane. Kuko kenshi na kenshi agwa mu muriro no mu mazi.
[16] Namuzaniye abigishwa bawe, ariko vyabananiye kumukiza.”
[17] Yesu arishura ati: “Yemwe abo iki gihe mutizera b'inkozi z'ibibi, nzogeza ryari kubana namwe; nzogeza ryari kubihanganira? Ni mumunzanire hano.”
[18] Yesu aramukankamira, dayimoni amuvamwo, umuhungu aca akira uwo mwanya.
[19] Maze abigishwa baza kuri Yesu biherereye, baramubaza bati: “Tweho ni iki catumye bitunanira kumusenda?”
[20] Arabishura ati: “Ni ukwizera kwanyu guke.” Ndababwire ukuri; namba mufise ukwizera kungana n'akabuto k'igiti, mwobwira kino gisozi muti: “Imuka aha, uje harya, kandi cokwimuka. Kandi nta kitazobashobokera. [
[21] Ariko bene urya ntakurwamwo n'ikindi atari ugusenga no kwisonzesha.]”
[22] Bakigendagenda i Galilaya, Yesu arababwira ko “umwana w'umuntu azoshirwa mu maboko y'abantu,
[23] kandi bazomwica, maze ku musi ugira gatatu azozurwa.” Barababara cane.
[24] Bashitse i Kaperinawumu, abatoza ikori ry'urusengero baza kuri Petero, baramubaza bati: “Harya Umwigisha wanyu ntatanga ikigabane ca shekeli?” Na we ati: “Egome, aragitanga.”
[25] Binjiye mu nzu, Yesu aramwitanga, aramubaza ati: “Uvyiyumvira gute ga Simoni? Abami bo mw'isi batangisha canke batoza abahe? Ni ababo canke ni abandi?”
[26] Aramwishura ati: “Ni abandi.” Yesu aramubwira ati: “Noneho ababo baracuna.”
[27] Ariko kugira ngo ntitubatsitaze, genda ku kiyaga, uteremwo igera, wakire ifi ifatwa ubwa mbere, uyasamike, urasangamwo shekeli, ube ari yo ujana, uyatange mw'izina ryanje n'iryiwawe.